Tite 1 - Testament ke Siki 1960 (Kabba Laka)

¹ Paul, bere lo Allah ke ndjè koula lo Jésus Christ, ta kare ko mè té lodè, dèdè ke Allah bardè ke daka bar wota, ke kemkarè geré tar ke tokoro lodè ke to deo ngem tar té lo Allah.

² Ke mè ngebe ta kinga tébe ke ke ndò ke ndò, ke Allah, nè ke nere ngem kada ang, tò mbä leo bal té ke dongor.

³ Ke ndè té ke ase ntéh daka ke tar maketourou la, deo té lo tar ke ma mpa, ke Allah ndjè kadjidjè pa ta karem ngem.

⁴ Moula mare Tite, ngonem ke tokoro ke ko mè té ke to kadaba. Allah Bòdjèdjè ke Christ Jésus ndjè kadjidjè dari tokou mè madji ke mè woul.

⁵ To mbata yèn ke ma mïyai Crète té, ta kare i ase da né nèn madji ke nai ase ang bai, ke ta bar tokou dooudjé ke daka mè béh té kada kada toï tokou mam ntòdji mbä.

⁶ Mare dingao ke tar to dè té kada ang, ke taa dènè ke kadaba, dèdè ke ngandè to ndjè ko mè tédjé, ke toula do mbata né ke madjang aséh tar mbeténa to dodè té ang.

⁷ Mbata ndjè ke ndja ta ngem kei Allah ke to ndjè ngem né lo Allah, ase ta kéh ke tar dè té kada ang, nè nase ta da tokou mèa ndja ndiki ang, aséh nkòl ndjange ang, aséh bere lo koto ang, aséh doou ke tounda doou ang, aséh boo kinga né dè nya ang.

⁸ A nè nase ta da madji ke ndjè mbaadjé, ndjè ndiki tar ke madji, ke ase ngem rè ndja, ndjè ke gaté gaté, madji toï, ke nto boo da rè ndja.

⁹ Nè nase ta ngem tar ke tokoro ngeng tokou ntòdjè mbä, ta kare nè nase ta tòdjou tar ke madji, ke ta ndaidè ke tar dèdè ke mbeté tar ke madji.

¹⁰ Mbata dooudjé ke ndjè mbeténa to baya ke pa tar ke ba, ke to ndjè kere ngem, dèdè nya ke nto ndjè koudja ta motedè.

¹¹ Ase ta karedè disi tadè moundou, mbata dèdè ntourou do dooudjé toï ke kei kada kada, deo tòdjou tar mbata kinga né, né ke to tar lodè ta tòdjou ang.

¹² Doou kada horodè té ke to prophète kada lodè ndja pa, Crètoidjé ere ngem ke ndò ke ndò, dadjé ke madjang, ndjè dabedjé ke ön mourou nya.

¹³ Tar nadji nèn to tokoro. Tokou ban ndangedè ngeng, baa ta kare dèdè ndé madji deo ko mè té,

¹⁴ Wota ke ta ko tar kòrou sou lo Juifdjé, aséh tar ke dooudjé pa ke to ndjè mbeté tar ke tokoro.

¹⁵ Né toï to madji ke dèdè ke nto madji, a né kada ke madji goto ke dèdè ke nto madjang ke do mèdè té ang. Gousou ke kedji né geré lodè ndja to madjang.

¹⁶ Dèdè mpana dèdè ngeré Allah, a dèdè mbetè deo koula té lodè, dèdè nto madjang nya, do tar ang, dase ta da koula ke madji kada ang.