Romaindjé 9 - Testament ke Siki 1960 (Kabba Laka)

¹ Ma mpa tar ke tokoro mè Christ té, ma mere ngem ang, kedji né geré lom pa tar nadji lom mè Ndil té ke madji toï.

² Ke ma méh ke ongou nya ke mem toom ke ndò toï.

³ Mbata mem ndiki ke ma ndja minga tadji ke ta kaim ke Christ mbata ngakömdjé ke to gel koudjoum.

⁴ Dèdè nto ngan Israëldjé, ke to tar lodè ta dé to ngandjé, ke tar ndokoo to lodè, ke tar kwaana medji, ke ta kare tar ndedji, ke tar ta wal, ke tar ke Allah tò, to to né lodè.

⁵ Tokou dooudjé ke leo to kadèdè, deo gel koudjoudè, deo té lo da rò Christ téh, nè ke nto do né té toï, Allah ke éh ke tar ke madji ke ndò ke ndò. Amen.

⁶ A tar lo Allah dé to né ke ba ang. Mbata dèdè toï ke nto Israëldjé, dèdè nto ngä Israël toï ang.

⁷ Dèdè toï nto ngandjé lo Abraham ang, mbata dèdè nto gel koudjou la, a, Ntoura gel dooudjé loi deo té lo Isaac.

⁸ Yèn pana, dèdè ke nto ngandjé deo da rò té, dèdè nto ngandjé lo Allah ang, a ngandjé ke Allah tò mbä, ntouradè to gel dooudjé la.

⁹ Mbata tar nèn to to tar ke Allah to mbä, Ma ma tél nai nèn, ke Sara a koudjou ngon ke dingao.

¹⁰ Sè tar nèn kadaba ang, a tokou Rebecca waa sem deo té lo doou kada ke to bòdjèdjè Isaac,

¹¹ Tokou nè nai noudjou ngandjé lé ang bai, ke dèdè nai nda madji aséh madjang ang bai, ta kare né ke Allah ndiki deo té lo tar toura ase dé to tar ke tokoro, deo koula té ang, a deo té lo nè ke mmardè,

¹² Mpa ke Rebecca, Ngon dere a da kare ngon doutou.

¹³ Deo kadaba tokou maketourou pa, Mam ndiki Jacob, a ma mbeté Esaü.

¹⁴ Tokou ban dja pana di wa? Allah da né ke gatang wa? Ngadji goto.

¹⁵ Mbata nè mpa nare Moïse, Ma ma da mè madji ke dèdè ke mam nda kedè mè madji, ke ma ma tòdjou mè madji dèdè ke mam nda kedè mè madji.

¹⁶ Tokou ban né nèn to ngä doou ke ndiki aséh doou ke aïn ang, a to ngä Allah ndja ke da mè madji.

¹⁷ Mbata maketourou lo Allah pa are Pharaon, Ma moundai mbai mbata né nèn ndja, ta karem ntòdjou singa lom deo té loi, ke ta kare rim ase bar do nange té nèn toï.

¹⁸ Tokou ban nè nda mè madji ke dèdè ke nè ndiki, ke nè nda mèdè ngeng dèdè ke nè ndiki kare mèdè ngeng.

¹⁹ Bana i a pa karem, Mbata di a nila tar dòdjè té wa? Mbata na ase mbeté né ke nè ndiki wa?

²⁰ A i doou, i to na ke a tél tar kare Allah wa? Andji a tél ke tar kare ndjè kouba djo pana, Mbata di a oubam tokou ban wa?

²¹ Ndjè kouba andji ase kouba tokou mèa ndiki ke andji ang wa, ta koun pila andji ta kouba né djo kada ke wal ke yéh ke kada ke wal ang wa?

²² Tokou ban di wa, mbata Allah ndiki ta tòdjou ongou la ke ta kare ngeré singa la, nè ngebe ke mè ke enge ang ta gange saria ke djo ongou ke ndadè mbata toudjoudè kem pourou té,

²³ Ke mbata nè ndiki ta tòdjou né kinga ndokoo la mbata lo djo mè madji ke nè nouba leo mbata tar ndokoo,

²⁴ Djèdjè ndja ke nè mmardjè, sè horo Juifdjé té ke kadè ang, a horo Gentildjé té to wa?

²⁵ Deo kadaba tokou nè mpa maketourou té lo Osée, Dèdè ke nto dooudjé lom leo ang, ma ma bardè dooudjé lom, Ke nè ke mam ndikè leo ang, ma ma barè nè ke mam ndikè nya.

²⁶ Loou té ndja ke mpa daredè, Sésè etoidjé dooudjé lom ang, Loou té ke nou da bardè ngandjé lo Allah ke tébe.

²⁷ Ésaïe ila mber ke tarr mbata Israël, Lé tokou ngan Israëldjé to baya tokou nangara ke tòkou man katé té, maredjé kada kadaba horodè té a kinga kadji.

²⁸ Mbata Mbaibé Seigneur a gange tar do nange té nèn ke singè ndjange ndjange.

²⁹ Deo kadaba tokou Ésaïe pa leo, Tokou Mbaibé Seigneur lo ndjè dòòdjé ïya ngandjé lodjè aredjè ang, djèdjè dja to tokou Sodome ke da dadjè tokou Gomorrhe.

³⁰ Tokou ban dja pana di wa? Gentildjé ke ndja go tar té ke gaté gaté ang inga tar ke gaté gaté, yèn pana, tar ke gaté gaté ke to deo ko mè té.

³¹ A Israëldjé ke ndja go tar té ke gaté gaté ke to deo tar ndedji té, dèdè dinga deoè ta ngem tar ndedji nèn ang.

³² Mbata di wa? Mbata dèdè nsangè ke deo ko mè té ang, a deo koula té, dèdè ntouka gòldè err touka gòl té.

³³ Deo kadaba tokou maketourou pa, Woidjé, mila mè Sion té err ke a kare dooudjé touka gòldè, err ke a karedè doso, A nè ke no mèa té sa, na kinga ròkoul ngadji ang.