Romaindjé 8 - Testament ke Siki 1960 (Kabba Laka)

¹ Tokou ban loshénè saria goto do ndjè té ke éh mè Christ Jésus té.

² Mbata tar ndedji lo Ndil ke tébe mè Christ Jésus té òroum tar ndedji té lo né ke madjang ke yo.

³ Mbata né ke tar ndedji ase ta da ang, mbata da rò toudjou singa la, deo koula Ngonè dé asena ke da rò ke to madjang, mbata né ke madjang, Allah gange saria né ke madjang mè da rò té.

⁴ Ban baa ta kare tar ke gaté gaté lo tar ndedji dé tar ke tokoro mèdjè té, djèdjè ke ndja go da rò té ang, a go Ndil té.

⁵ Mbata dèdè ke disi deo té lo da rò, dounda mèdè do né té lo da rò, a dèdè ke disi deo té lo Ndil, dounda mèdè do né té lo Ndil.

⁶ Mbata ta kounda mè dò da rò té to yo, a ta kounda mè dò Ndil té to tébe ke mè woul.

⁷ Mbata ta kounda mè dò da rò té to ngä mbeté Allah, mbata nè ndiki gè ke ndedji lo Allah ang, ke tokoro nase ta ndiki gè ang.

⁸ Ke dèdè ke disi mè da rò té dase ta kare koukou Allah ang.

⁹ A sésè éhdjé mè da rò té ang, sésè éhdjé mè Ndil té, tokou Ndil lo Allah to mèsè té ke tokoro. Doou ke éh ke Ndil lo Christ ang, ndjè to ngë ang.

¹⁰ A tokou Christ éh mèsè té, lé ke da ròsè woei mbata né ke madjang, ndii losè éh ke tébe mbata gaté gaté.

¹¹ Tokou Ndil lo nè ke nwaa Jésus ke tarr mè bwa yo té to mèsè té, nè ke nwaa Christ ke tarr mè bwa yo té, na karesè tébe ròsè té ke to rò yo to, deo té lo Ndil la ke to mèsè té.

¹² Tokou ban, ngakömdjé, djèdjè nto ndjè baange lo da rò ang, ta kisi deo té lo da rò.

¹³ Mbata tokou sésè isidjé deo té lo da rò, sésè a kwoeidjé, a tokou edaidjé ta kare koula da rò woei deo té lo Ndil, a kisidjé tébe.

¹⁴ Mbata dèdè toï ke Ndil lo Allah tòdjoudè deo, dèdè nto ngandjé lo Allah.

¹⁵ Mbata sésè etaaidjé ndii bere ta tél ke bel ang, a etaaidjé ndii ta tourousè ngandjé. Deo té nèn djèdjè djila mber, Abba, Bòdjèdjè.

¹⁶ To Ndil ndja ke pa tar nadji ke ndii lodjè ke djèdjè nto ngandjé lo Allah.

¹⁷ Ke tokou djèdjè nto ngandjé, djèdjè nto ndjè kwaa né ndouba, ndjè kwaa né ndouba lo Allah, ke ndjè kwaa né ndouba naaté ke Christ, tokou djinga né ongou deo kadaba sa, baa ta kare djase ta kinga ndokoo deo kadaba sa tò.

¹⁸ Mbata mem pana, ongou ke loshénè nèn ase ta kase ang ke né ndokoo ke ata téh nòdjè té.

¹⁹ Mbata né ke nda mbä ngebe ke tòkou mè ndiki mbata téh daka lo ngandjé lo Allah.

²⁰ Mbata né ke nda mbä dé to bere lo né ke toudjou ba, ke mè né ndiki té la ang, a mbata ndiki lo nè ke nda né to bere ke mè ngebe té.

²¹ Mbata né ke nda mbä, né ndja ngebe baa dòrè mè tar né té ke toudjou ke dè to bere, ta kinga tar do to lél pè ke piti lo ngandjé lo Allah.

²² Mbata djèdjè ngeré né ke nda mbä toï ila mè tokou ndoo too deo kadaba, nderèng ndò té ke loshénè nèn.

²³ Nèn ke kadè ang, a djèdjè ndja ke djéh ke gel kandé ke dongor lo Ndil, djèdjè djila mèdjè tokou djèdjè ngebe tar ke ta tourou ròdjè ngandjé, ke to kadji ròdjè.

²⁴ Mbata dadjidjè deo mè ngebe té nèn. A tokou doou ngebe né ke nè no, yèn to mè ngebe ang. Mbata doou di a a ngebe né ke yéh wo wa?

²⁵ A tokou djèdjè ngebe né ke djèdjè djo ang, djèdjè ngebe ke mè ke ïya ang.

²⁶ Ndil ndja da kedjè tokou ban to mè né té ke djèdjè djéh ke singa ang, mbata djèdjè ngeré ta doudjou Allah ke deoè ang, a Ndil ndja doudjou Allah mbata lodjè ke kila mè ke doou ase ta pa pi.

²⁷ Ke nè ke nsange mè dooudjé, nè ngeré né ke Ndil ndja ndiki, mbata Ndil doudjou Allah mbata ndjè ko mè tédjé deo né té ke Allah ndiki.

²⁸ Djèdjè ngeré né toï mbona ta da madji ke dèdè ke ndiki Allah, dèdè ke mmardè deo né té ke nè ndiki.

²⁹ Mbata dèdè ke nè ngeredè dongor, nè ntouradè dongor to, ta karedè ndé dasena ke ndii lo Ngonè, tokou ban ta kare nè nase dé to ngon dere horo ngaködjèdjè té ke baya.

³⁰ Dèdè ke Allah touradè dongor, nè mmardè to, ke dèdè ke nè mmardè, nè ndadè ndé gaté gaté to, ke dèdè ke nè ndadè ndé gaté gaté, nè mpitidè tò.

³¹ Tokou ban djase pana di wa ke tar ke nèn? Tokou Allah éh kedjè, na a kase mbetédjè wa?

³² Nè ke nòkou Ngonè ang, a nïyè mbata lodjè toï, nè na karedjè né toï sa ba deo kadaba ang wa?

³³ Na a kase ta koun dò ndjè ke Allah bardè ke daka wa? To to Allah ndja ke dadè ndé gaté gaté.

³⁴ Na a gange saria wa? To to Christ ke woei mbä, aä wota yèn, nè ke nï tarr mè bwa yo té, nè ke néh do dji kòl Allah té, nè ke ndoudjou Allah mbata lodjè.

³⁵ Na a kaidjè ndiki té lo Christ wa? Né ongou aséh ongou ke mè té, aséh ngätar, aséh boo biriri, aséh rò ke ba, aséh né ke ndiki tòl doou, aséh tokou kiaa wa?

³⁶ Deo kadaba tokou maketourou pa, Ntòldjè ke ndò ke ndò mbata loi ndja, Ntouradjè tokou batidjé ke ndiki tòldè.

³⁷ Eë, ke mè nédjé té nèn toï, djèdjè nto djouta ndjè singadjé deo té lo nè ke ndikidjè.

³⁸ Mbata mam ngeré tokoro, yo aséh tébe, aséh angedjé, aséh ndjè ke ö béhdjé, aséh né ke to loshénè, aséh né ke ao dé, aséh né singa,

³⁹ Aséh né ke ngal, aséh né ke ourou, aséh mare né ke nda mbä da kase ta kaidjè ndiki té lo Allah ang ke to mè Christ Jésus té Mbaibé lodjè.