Romaindjé 6 - Testament ke Siki 1960 (Kabba Laka)

¹ Tokou ban djèdjè dja pana di wa? Dja nai ta da né ke madjang ta kare tokou mè madji a kase bar nya wa?

² Ngadji goto. Djèdjè ke djoei leo ta kïya né ke madjang, dja nai mè té mare bai tokou ban wa?

³ Egeridjé ang wa, djèdjè toï ke djinga baptême mè Christ Jésus té, djèdjè djinga baptême mè kwoei té la ang wa?

⁴ Tokou ban ndouboudjè sa deo baptême té mè yo té, mbata deo kadaba tokou dwaa Christ ke tarr mè bwa yo té, deo ndokoo té lo bèdjè ndja, tokou ban djase ndja deo tébe té ke siki tò.

⁵ Mbata tokou djèdjè ndé kadaba sa mè yo té tokou yo la, djèdjè dja dé kadaba sa ke tokoro mè kï té tokou la ndja.

⁶ Djèdjè ngeré ntòl doou ke leo lodjè kake dèse té deo kadaba sa, ta kare da rò né ke madjang ase toudjou, ke ta kare djèdjè djisi bere lo né ke madjang marè ang.

⁷ Mbata doou ke woei mbä téh daka kò né ke madjang té.

⁸ A tokou djèdjè djoei ke Christ mbä, djèdjè djo mèdjè té ke dja kisi ke tébe sa to.

⁹ Mbata djèdjè ngeré mbata dwaa Christ ke tarr mè bwa yo té, nè na kwoei marè ang, yo a köè marè ang.

¹⁰ Mbata kwoei ke nè noei, nè noei ta kïya né ke madjang, ndò kada mbata lo ndò ke ndò, a tébe ke nè néh né, nè néh né mbata lo Allah.

¹¹ Tokou ban woidjé sésè ndja tokou dooudjé ke woei mbä ta kïya né ke madjang, a sésè ndja éhdjé ke tébe mbata lo Allah mè Christ Jésus té.

¹² Tokou ban, aridjé né ke madjang ö ròsè ang, ròsè ke to rò yo, ta karesè ndiki gè ke boo lodè.

¹³ Aridjé barkem ròsè né ke madjang ang, tokou lo né koula ke madjang, a aridjé ròsè ndja Allah tokou dooudjé ke téh horo ndjè yodjé té ta kisi tébe, ke aridjé barkem ròsè Allah tokou né koula ke gaté gaté.

¹⁴ Mbata né ke madjang a kosè marè ang, mbata sésè éhdjé ko tar ndedji té ang, a kò tokou mè madji té.

¹⁵ Tokou ban di wa? Dja da né ke madjang mbata djéh kò tar ndedji té ang, a kò tokou mè madji té wa? Ngadji goto.

¹⁶ Sésè egeridjé ang wa, nè ke arèdjé ròsè ndja tokou beredjé ke woidjé tè, sésè etoidjé beredjé lo nè ke woidjé tè, tokou lo bere lo né ke madjang ke téh kwoei té, aséh tokou lo bere ke wo tar ta téh gaté gaté té wa?

¹⁷ A woio are Allah mbata sésè ke etoidjé to bere lo né ke madjang leo, bashénè sésè woidjé ke mèsè té ta da deo tar té ke ntòdjousè.

¹⁸ Mbata dòrousè mè né ke madjang té, sésè edéidjé bere lo né ke gaté gaté.

¹⁹ Ma mpa tar maresè ke gousou lo dooudjé, mbata da ròsè éh ke singa ang. Mbata deo kadaba tokou leo sésè aridjé barkem ròsè to bere lo né ke gatang, ke ta da né ke madjang wota, tokou ban aridjé barkem ròsè bashénè to bere lo né ke gaté gaté ta ngem ròsè ndja mbata Allah.

²⁰ Ndò ke sésè etoidjé bere lo né ke madjang leo, sésè edaidjé bere lo gaté gaté ang.

²¹ Tokou ban ndò té ke nou, ingaidjé di a ke né ke naresè ròkoul bashénè wa? Mbata lo gel né ke ban to yo.

²² A bashénè mbata dòrousè mè né té ke madjang, sésè edéidjé bere lo Allah, kandé losè to ngä ngem ròsè mbata Allah, ke gelè to tébe ke ke ndò ke ndò.

²³ Mbata kouka lo né ke madjang to yo, a né kare ba lo Allah to tébe ke ke ndò ke ndò mè Christ Jésus té Mbaibé lodjè.