Romaindjé 5 - Testament ke Siki 1960 (Kabba Laka)

¹ Tokou ban, mbata ndadjè gaté gaté mbä deo ko mè té, djèdjè djisi dèkèkè ke Allah deo té lo Jésus Christ Mbaibé lodjè.

² Ke deo té la, deo ko mè té, djèdjè djinga deo tokou mè madji té nèn ke djisi kendé. Ke djèdjè nda rònèl mè tar ngebe té lodjè mbata dja kinga ndokoo lo Allah.

³ Sè nèn ke kadè ang, a djèdjè nda rònèl mè né ongou té lodjè to, mbata djèdjè ngeré né ongou da baa ta kare mè ïya ang.

⁴ Ke mè ke ïya ang da baa ta kare geré ta kwaa ngeng, ke ta geré ta kwaa ngeng are mè ngebe.

⁵ Mè ngebe are ròkoul ang, mbata ndiki lo Allah ase mèdjè deo té lo Ndil ke madji toï ke nè naredjè leo.

⁶ Mbata tokou djèdjè djéh ke singa ang, ke nai ke ase mbä Christ woei mbata ndjè né da ke madjang.

⁷ Mbata to ngeng nya lo doou ta kwoei mbata doou ke gaté gaté, aséh dòmadjang a mare doou a kwoei mbata doou ke madji tò.

⁸ A Allah tòdjou ndiki la mbata lodjè, mbata tokou djèdjè nai to ndjè né da ke madjangdjé bai, Christ woei mbä mbata lodjè.

⁹ Tokou ban, mbata ndadjè gaté gaté loshénè deo mese té la, da kadjidjè wota nya deo té la mè ongou té lo Allah.

¹⁰ Mbata tokou djèdjè nai ndjè kembaadjé bai, nda ta kare mèdjè woul pè ke Allah deo kwoei té lo Ngonè, nya wota mbata loshénè mèdjè woul pè mbä da kadjidjè deo tébe té la.

¹¹ Sè nèn ke kadè ang, a djèdjè nkoukou mè Allah té deo té lo Mbaibé lodjè Jésus Christ to, mbata deo té la djèdjè djinga deo kongou naaté loshénè.

¹² Mbata deo kadaba tokou né ke madjang dé nange nèn deo té lo doou kada, ke yo dé deo té lo né ke madjang, tokou ban yo ndja ase dooudjé toï mbata dooudjé toï da né ke madjang.

¹³ Mbata madjang éh nange nèn leo dongor tar ndedji dé, a tokou tar ndedji goto, ntoura né ke madjang ang.

¹⁴ A yo ö loou leo ounkotè ke Adam nderèng Moïse, lé do dèdè té ke né ke madjang lodè ase lo né ke madjang lo Adam ang, nè ke nto tokou nè ke nao ndé.

¹⁵ A né kare ba to tokou né ke madjang ang, mbata tokou maredjé nya woei mbata né ke madjang lo doou kada, tokou mè madji lo Allah ke né kare ba deo tòkou mè madji té lo doou kada nèn Jésus Christ, bar nya wota mbata maredjé nya.

¹⁶ Ke né kare ba to tokou gel né ke madjang lo doou kada nèn ang. Mbata gange tar ke dé goukoudang né ke madjang kada, are saria yo dé, a né kare ba ke dé goukoudang né ke madjang nya, are doou dé gaté gaté.

¹⁷ Mbata tokou yo ö loou leo, deo té lo doou kada mbata né ke madjang kada, tokou ban nya wota, dèdè ke dinga tokou mè madji ke bar nya ke né kare ba ke gaté gaté, da ko loou ke tébe deo té lo doou kada Jésus Christ.

¹⁸ Bana deo kadaba tokou né ke madjang lo doou kada are saria yo dé mbata dooudjé toï, tokou ban to, né ke madji ke doou kada da, da ta kare dooudjé toï téh daka ke tébe.

¹⁹ Mbata deo kadaba tokou deo ko tar té ang lo doou kada, da maredjé nya ta dé ndjè né da ke madjang, tokou ban to, deo ko tar té lo doou kada a da maredjé nya ta dé gaté gaté.

²⁰ Tar ndedji dé mè té ta kare né ke madjang bar nya, a loou té ke né ke madjang bar nya, tòkou mè madji bar nya wota.

²¹ Mbata deo kadaba tokou né ke madjang ö loou mè yo té, ban to tokou mè madji ase kö loou deo gaté gaté té mbata tébé ke ke ndò ke ndò, deo té lo Jésus Christ Mbaibé lodjè.