Romaindjé 4 - Testament ke Siki 1960 (Kabba Laka)

¹ Tokou ban dja pa tar lo Abraham to di wa, kadjèdjè ke deo da rò té?

² Mbata tokou Abraham dé gaté gaté deo koula té, nè néh ke mare tar ta ndoi rè, a no Allah té ang.

³ Mbata maketourou lo Allah pana di wa? Abraham wo mèa té ke Allah, ke ntoura yèn to gaté gaté la.

⁴ Bana doou ke da koula, ntoura kouka la to né kare ba ang, a to kouka la.

⁵ A doou ke da koula ang, a no mèa té ke nè ke nare dooudjé ke ndjè né da ke madjang ta dé gaté gaté, ntoura ko mè té la to gaté gaté.

⁶ Tokou ban David to pa tar ke madji do doou té ke Allah tourè gaté gaté, ke deo koula té ang.

⁷ Madji éh ke dèdè ke dïya né ke madjang lodè mbä, ke né ke madjang lodè iyaa mbä.

⁸ Madji éh ke doou ke Mbaibé Seigneur a toura madjang la ang.

⁹ Mpa tar madji nèn do ndjè koudja ta motè té kadèba, aséh do nè té ke noudja ta motè ang to wa? Mbata djèdjè mpana ntoura ko mè té lo Abraham to gaté gaté.

¹⁰ Bana ntoura yèn darè tokou di wa? Tokou noudja ta motè mbä, aséh nai noudja ang bai wa? To gè té ke goukou ang, a to dongor noudja mbä.

¹¹ Nè ninga tar koudja ta mote tokou né tòdjou aséh né ke rëté gaté gaté, mbata ko mè té ke néh né tokou nai noudja ta motè ang bai. Tokou ban ta karè ndé to bòdèdè toï ke do mèdè té, tokou dèdè nai doudja ta motedè ang, tokou ban dase touradè to gaté gaté.

¹² Deo kadaba ke nèn, nè ndé to bo dooudjé ke oudja ta motedè, dèdè ke doudja ba ang, a dèdè ke ndja go ko mè té to, ke éh ke bòdjèdjè Abraham leo, tokou nè nai noudja ta motè ang bai.

¹³ Né ke Allah to ta kare Abraham ke gel dooudjé la, ke dèdè da kwaa né ndouba nange nèn, ndé deo tar ndedji té ang, a ndé deo gaté gaté té lo ko mè té.

¹⁴ Tokou to dèdè ke nto ngä tar ndedji ke ndé to ndjè kwaa né ndouba, tar ko mè té to né ke ba, ke né ke Allah to to to né ke ba.

¹⁵ Mbata tar ndedji to né kare ongou, a loou ke tar ndedji goto, tar mbeté tar ndedji goto tò.

¹⁶ Mbata yèn ase ta dé deo ko mè té, ta kare tar ke Allah to dé deo tòkou mè madji té, ke ta kare dé to tar ke tokoro mbata gel dooudjé té la toï, bè to lo ndjè ke éh ke tar ndedji kadaba ang, a to mbata lo dèdè ke déh ke ko mè té lo Abraham to, mbata nè nto bòdjèdjè toï.

¹⁷ Deo kadaba tokou maketourou pa, Mam ndai to bò gel dooudjé nya no Allah té ke nè no mèa té sa, nè ke nare tébe ndjè yodjé, ke mmar né ke goto to né ke to.

¹⁸ Ke mè ngebe Abraham ngebe tokou mare né ndiki ang, ta kare nè nase dé bo gel dooudjé nya, ase tar ke mpa darè, Gel dooudjé loi a dé tokou ban.

¹⁹ Ko mè té la enge ang tokou nè no rè ndja ke to tokou né ke ata kwoei, mbata bal la dé ngosiba ke dòdòkou, aséh tokou nè nedji Sara to dènè ke ao katé.

²⁰ A mèa to do tar té ke Allah to, nè mmaitar ang, a nè ngeng deo ko mè té la tokou nè nòsou gadji Allah.

²¹ Nè ngeré ke tokoro, Allah ase ta da karè né ke nè ntòè.

²² Mbata lo yèn, ntoura ko mè té la tokou gaté gaté.

²³ Tar nèn ke pana, ntoura darè, nda mè maketourou té mbata la ke kadè ang,

²⁴ A mbata djèdjè tò. Da toura karedjè, djèdjè ke djo mèdjè té sa, nè ke nare Jésus Mbaibé lodjè ï mè bwa yo té.

²⁵ Nè ke ntòlè mbata né ke madjang lodjè, ke narè nï ta dadjè kare ndé gaté gaté.