Romaindjé 3 - Testament ke Siki 1960 (Kabba Laka)

¹ Tokou ban, Juifdjé wota mare dooudjé ke deo di té wa? Aséh tar ke madji lo tar koudja to to di wa?

² Baya nya ke deo té toï. Ke dongor toï, Allah are tar tè té djidè té.

³ Di wa tokou maredjé éh ke ko mè té goto? Mbata ko mè té lodè goto yèn da ta kare mè ndaa kaï lo Allah dé to né ke ba wa?

⁴ Ngadji goto, Are Allah to nè ke tokoro, a dooudjé toï to ndjè kere ngem, deo kadaba tokou maketourou pa, Ta kare doi gaté gaté deo tar té loi, Ndò ke i téh loou gange saria té ke i ndaidè ke tar.

⁵ A tokou né ke madjang lodjè to ta tòdjou gaté gaté lo Allah, dja pa tar di wa? Allah to doou ke gatang ta kongou ongou dòdjè té wa? Ma mpa tar deo té lo doou.

⁶ Ngadji goto, Mbata bana Allah ase ta gange saria ke nange nèn tokou di wa?

⁷ A tokou tar ke tokoro lo Allah bar nderèng ndokoo la deo kere ngem té lom, mbata di baa ngange saria dom té tokou lo ndjè né da ke madjang wa?

⁸ A mbata di wa djèdjè nda né ke madjang ta kare né ke madji dé ang wa? Tokou mare dooudjé tourou tar lodjè madjang pana, djèdjè mpa ban mbä. Saria lodè to gaté gaté.

⁹ Bana di wa? Djèdjè Juifdjé, djèdjè nto madji wotadè wa? Eë, ngadji goto, mbata djèdjè ntoura dooudjé toï, Juifdjé ke Grecdjé to, nto ko singa té lo né ke madjang.

¹⁰ Deo kadaba tokou maketourou pa, Doou ke gaté gaté goto, kada goto,

¹¹ Doou kada ke geré gel tar goto, Doou kada ke sange Allah goto,

¹² Toï dïya deoè, toï dao gatang, Doou kada ke da madji goto, kada goto,

¹³ Gòboudè to tokou bwa yo ke doutou ang bai, Dèdè dere ngem ke ndödè. Kouma ke madjang lo li to ko tadè té.

¹⁴ Tadè dousou ke tar tadji ke tar ke ate.

¹⁵ Gòldè ndja ndjange ta kongou mese,

¹⁶ Tar toudjou ke ongou to deo té lodè,

¹⁷ Dèdè ngeré deo mè woul ang,

¹⁸ Ke kemdè té dèdè mmel Allah ang.

¹⁹ Bana djèdjè ngeré tar ke tar ndedji pa, nè mpa nare dèdè ke nto ko tar ndedji té, tokou ban ta kare ta dooudjé toï to do moundou, ke ta kare nange nèn toï to ko saria té lo Allah.

²⁰ Mbata doou kada a dé gaté gaté kèmè té deo koula té lo tar ndedji ang, mbata deo tar ndedji té dooudjé geré né ke madjang.

²¹ A bashénè gaté gaté lo Allah téh mbä, ke to ngà tar ndedji ang, a tar ndedji ke prophètedjé pa tar nadji dè té.

²² Gaté gaté lo Allah deo ko mè té ke Jésus Christ, mbata dèdè toï ke do mèdè té. Mbata dooudjé ke dang goto,

²³ Mbata dooudjé toï da né ke madjang mbä, ke doso dèbè eo ke ndokoo lo Allah.

²⁴ Daredè ndé gaté gaté deo tokou mè madji té la tokou né kinga ba, deo tar kadji té ke éh mè Christ Jésus té.

²⁵ Nè ke Allah arè ntéh daka to né kouka deo ko mè té ke mese la. Yèn to ta tòdjou gaté gaté lo Allah, mbata nè ndai do né ke madjang té ke dongor, deo té lo kourè wour la.

²⁶ Yèn to ta tòdjou ke daka ke nai té nèn, ke nè ndja nto gaté gaté, ke nè nare doou ke wo mèa té ke Jésus to gaté gaté.

²⁷ Bana kòsou gadji lodjè éh da wa? Deo tar ndedji té, ke ngà koula wa? Eë, a deo tar ndedji té ke ngà ko mè té.

²⁸ Mbata djèdjè djo doou dé gaté gaté deo ko mè té, a deo koula té lo tar ndedji ang.

²⁹ Aséh Allah to Allah lo Juifdjé kadaba wa? Nè nto Allah lo Gentildjé to ang wa? Aä, lo Gentildjé to.

³⁰ Mbata Allah to kadaba, nè na kare dooudjé ke ndjè koudja ta motedè dé gaté gaté deo ko mè té lodè, ke dooudjé ke ndjè koudja ta motedè ang mbata ko mè té lodè.

³¹ Bana djèdjè nda ta kare tar ndedji dé to né ke ba deo ko mè té wa? Ngadji goto. Djèdjè nda ta kare tar ndedji dé to tar ke tokoro.