Romaindjé 2 - Testament ke Siki 1960 (Kabba Laka)

¹ Tokou ban i éh ke tar ta tél né ang, i doou ke gange saria do mare doou té, mbata deo gange saria dè té i gange saria dòi té ndja, mbata i ke to ndjè gange saria, i da né nèn ndja deo kadaba.

² Djèdjè ngeré saria ke Allah gange dòdè té ke nda né tokou ban, to deoè té ke gaté gaté.

³ I doou, tokou i gange saria dòdè té, dèdè ke nda né tokou ban ke i ndja da ban tò, mei edji i ase ta kaïn saria lo Allah wa?

⁴ Aséh mei mbeté né kinga ba mè madji la, ke kourè wour la, ke mè ke enge ang wa? I geré ang ke mè madji lo Allah to ta kari mbeté kedji né da ke madjang wa?

⁵ A deo té lo mè ke ngeng ke tar mbeté loi, i da ta kare ongou dousou mbata loi ndja ke ndò ongou té, tokou gange saria ke gaté gaté lo Allah a téh daka.

⁶ Mbata nè na kouka dooudjé kada kada toï deo kadaba ase koula lodè.

⁷ Nè na kare tébe ke ke ndò ke ndò dèdè ke nda madji ke mè ke ïya ang, ke nsange ndokoo ke piti ke tébe ke woei ang.

⁸ A saria ke ongou a to mbata dèdè ke mbeténa ke do tar ke tokoro ang, a dèdè do né ke to madjang.

⁹ Né ke ongou ke né ndoo a to mbata dooudjé kada kada toï ke da né ke madjang, Juifdjé dongor ke Grecdjé to.

¹⁰ A ndokoo ke piti ke mè woul a to mbata dèdè kada kada toï ke nda madji, Juifdjé dongor ke Grecdjé to.

¹¹ Mbata Allah piti doou kada wota maredjé ang.

¹² Dèdè toï ke nda né ke madjang deo tar ndedji té ang, dèdè da kwoei deo tar ndedji té ang, dèdè toï ke nda né ke madjang ko tar ndedji té, da gange saria lodè deo tar ndedji té tò.

¹³ Mbata to dèdè ang ke do tokou ntoura tar ndedji ke nto gaté gaté kem Allah té, a go dèdè ke ngem tar ndedji ke a dé to gaté gaté.

¹⁴ Tokou Gentildjé ke éh ke tar ndedji ang da tokou tar ndedji pa ke mèdè ndja, dèdè nto tar ndedji mbata lodè ndja, bo dèdè déh ko tar ndedji té ang.

¹⁵ Dèdè ntòdjou ke daka né ke tar ndedji pana ta ngem to mèdè té mbä, ke ndii lodè pa tar nadji to, ke kedji dang dang lodè toula dodè aséh dòmadjang a daredè ntéh daka ba.

¹⁶ Ndò té ke nou, ndò ke Allah gange saria do kedji té lo dooudjé ke yarè, deo té lo Jésus Christ tokou tar ke madji lom pa.

¹⁷ A tokou i pana i ndja to Juif, ke i isi dèkèkè ke tar ndedji, ke i ndoi ròi mbata i to ngä Allah,

¹⁸ Ke i geré né ke nè ndiki, ke i ndiki gè ke yéh ke madji wota mbata i geré né ke tar ndedji tòdjou,

¹⁹ Ke tokou i geré ke tokoro, i to doou ke ndjè tòdjou deo kare ndjè kem tòdjé, lokarè lo dèdè ke déh londoul té,

²⁰ Ke i to ndjè tòdjou tar mbedjé, ndjè tòdjou tar ngandjé, mbata ke tar ndedji i éh ke né kemkarè ke tar ke tokoro.

²¹ Bana i ke tòdjou mare dooudjé, i a tòdjou mbata loi ndja ang wa? Tokou i pa tar ta boukou ang, i ndja boukou wa?

²² I ke pana ase kare doou da kaiya ang, i da kaiya wa? I ke mbeté né polo, i boukou kei Allah wa?

²³ I ke ndoi ròi mè tar ndedji té, i da Allah ròkoul deo mbeté tar ndedji té wa?

²⁴ Mbata deo kadaba tokou nda mè maketourou té, Ntadji ri Allah horo Gentildjé té mbata tar loi.

²⁵ Tar koudja ta mote to madji tokou i ngem tar ndedji, a tokou i mbeté tar ndedji, tar koudja ta mote loi dé to tar koudja ang.

²⁶ Tokou ban, tokou doou ke oudja ta motè ang ngem tar ke tar ndedji pa, da ko tar koudja ang la tokou tar koudja mbä ang wa?

²⁷ Bana dèdè ke doudja ta motedè ang, a dèdè ngem tar ndedji da gange saria dòsè té, sésè ke éhdjé ke maketourou tar ndedji ke tar koudja ta mote, a mbetidjé ta ngem gel tar ndedji.

²⁸ Mbata doou to Juif ke tokoro ang ke to ban daka ba, aséh tar koudja ta mote ke tokoro to né ke daka ke da rò ang.

²⁹ Nè ke nto Juif nto ban mèa té, tar koudja ke tokoro to tra ke mè té ke ndii, to tar ke nda mè maketourou té ang. Piti la to ngä dooudjé ang, a to nga Allah.