Romaindjé 15 - Testament ke Siki 1960 (Kabba Laka)

¹ Djèdjè ke nto ngeng, djase kourè wour mbata nda gatang lo dèdè ke nto ngeng ang, ta kare koukou ròdjè ndja ang.

² Ase kare dooudjé kada kada toï horodjè té are koukou mè doou té ke to ndjè nin kei marè mbata da né ke madji sa, ta kare ngeng nè.

³ Mbata Christ are koukou rè ndja ang, a deo kadaba tokou maketourou pana, Tar tadji lo dooudjé ke tadji oso dom té.

⁴ Mbata né toï ke nda mè maketourou té ndò té ke leo, nda mè maketourou té ta tòdjoudjè, mbata deo mè té ke ïya ang, ke deo tar maketourou té ke òrou ongou, djèdjè djase kéh ke mè ngebe.

⁵ Ase kare Allah ke ndjè mè ke ïya ang ke òrou ongou, aresè ta kounda mèsè dò tar té kadaba horosè té deo té lo Christ Jésus.

⁶ Mbata sésè ase kare epitidjé Allah Bo Mbaibé lodjè Jésus Christ naaté ke ndou kadaba.

⁷ Tokou ban etaaidjé mare dooudjé horosè té deo kadaba tokou Christ taasè to, mbata ndokoo lo Allah.

⁸ Mbata ma mpana, nda Christ to ngonlokisi lo dooudjé ke ndjè koudja ta motedè ta tòdjou tar ke tokoro lo Allah, tokou ban nase da baa tar tòna ke Allah pa are bòdjèdjè ke leo, dé tokou tokoro.

⁹ Ta kare gel Gentildjé ase da woio Allah mbata mè madji la, Deo kadaba tokou maketourou pana, Mbata yèn ma ma piti i horo Gentildjé té, ke ma ma kòsou pa ke ri.

¹⁰ Nè ntél mpa marè, Sè Gentildjé, edaidjé rònèl ke dooudjé la,

¹¹ Nè mpa marè, Sè Gentildjé toï, epitidjé Mbaibé Seigneur. Ase kare gel dooudjé toï pitè.

¹² Ke Ésaïe pa to, Gòl a téh deo té lo Isaï, nè ke na kï ta ko do Gentildjé té. Gentildjé a kounda mè ngebe lodè dè té.

¹³ Ase kare Allah ke ndjè mè ngebe dousousè ke koukou, ke mè woul toï deo ko mè té, mbata asidjé bar ke mè ngebe deo singa té lo Ndil ke madji toï.

¹⁴ A ma ndja misi dèkèkè mbata losè, ngakömdjé, mbata sésè ndja edousidjé ke tar ke madji, ke edousidjé ke gousou toï ke ase ndedjina horosè té.

¹⁵ A ke mare tar kada kada mam nda maketourou maresè ke bel ang, ta kòlè mèsè to ke siki, mbata tokou mè madji ke Allah arem.

¹⁶ Tokou ban mase dé ndjè tòdjou tar lo Jésus Christ gel Gentildjé té, ta da tokou ndjè da né polo ke tar ke madji lo Allah, tokou ban ta kare Gentildjé ase dé né kare ba ke ase, mbata Ndil ke madji toï bardè ke daka mbata Allah.

¹⁷ Bana mam nda piti lom mè Christ Jésus té ke nè ke nto ngä Allah.

¹⁸ Mbata ma mase ta pa mare né ke dang ang, sè né ke Christ da deo té lom, ta kare Gentildjé wo tar, deo tar té ke deo koula té.

¹⁹ Deo singa né tòdjou té ke né ke da baa mè dooudjé ounda do bia, deo singa té lo Ndil ke madji toï, tokou ban, mounkotè Jérusalem té ke mare nange ke ngosiba nou nderèng Illirie, mam ntòdjou tar ke madji lo Christ nya.

²⁰ Tokou ban, ke mem té mam ndiki tòdjou tar ke madji loou té ke mmar Christ kendé kèté ang, mbata dòmadjang a mam nda kei loou té ke mare doou òsou gòl kei kendé.

²¹ A deo kadaba tokou maketourou pana, Dèdè ke mpa tar la daredè ang, da ko, Ke dèdè ke do tar la ang, da geré gelè.

²² Mbata tar nèn, deo lom ke ta dé ròsè té tò ndò baya nya.

²³ A loshénè mbata loou lom ta da koula to er loou té ke nèn marè ang, ke mbata boo ke ta dé ròsè té dam bal baya nya,

²⁴ Ma méh ke mè ngebe ta kosè tokou ma mao ke Espagne té, ta karesè edanemdjé deo té ke nou gè té ke ma misi kesè eo ngadji.

²⁵ A loshénè ma mao Jérusalem té ke né ta kouma ndjè ko mè tédjé.

²⁶ Mbata dooudjé ke Macédoine ke Achaïe wo madji ta koula ke né kare ba kare dangetédjé ke horo ndjè ko mè tédjé ke Jérusalem té.

²⁷ Tokoro to madji kemdè té, mbata dèdè nto ndjè baange lodè, mbata tokou nda Gentildjé to ndjè koumadè ke né té lo ndii, to tar lodè ta da madji ke Juifdjé ke né da rò té ke ba.

²⁸ Tokou ban, tokou mam nda koula nèn ta karedè né kare ba nèn toï mbä, ma ma ndai dé deo ke ròsè té ta kao Espagne.

²⁹ Mam ngeré tokou mam ndé ròsè té, ma ma dé dousou ke mè madji lo Christ.

³⁰ Mam ndoudjousè nya, ngakömdjé, deo té lo Mbaibé lodjè Jésus Christ, ke ndiki lo Ndil ndja ta koumaidjéna sem ke doudjou Allah mbata lom.

³¹ Mbata kare dòroum dji dooudjé té ke Judée ke wo mèdè té ang, ke ta kare ndjè ko mè tédjé ke Jérusalem ndiki madji ta taa né kare ba ke ma mao né.

³² Tokou ban, tokou Allah ndiki, mase ta dé ròsè té ke koukou, ke ta kwaa rom horosè té.

³³ Allah ke ndjè mè woul éh kesè toï. Amen.