Romaindjé 12 - Testament ke Siki 1960 (Kabba Laka)

¹ Tokou ban mam ndedjisè, ngakömdjé, deo ndiki té lo Allah, aridjé ròsè tokou né polo ke tébe, ke madji toï ase kem Allah té, yèn to koula lo ndii ke asesè.

² Etouridjé ròsè deo té ke nange nèn ang, a etouridjé ròsè deo té lo tél kedji losè ke siki, ta karesè egeridjé né ke Allah ndiki, né ke to madji ase kèmè ke to madji toï.

³ Mbata deo tòkou mè madji té ke darem, mam ndedjisè kada kada toï ta kare mare horosè té edji mèa ndja bo wota tar ke asè ang, a ta kedji ase mè ke isi dèkèkè, ase né kòdjou ko mè té ke Allah kaidè kada kada.

⁴ Deo kadaba tokou djéh ke barkem rò baya mè rò té kada, ke barkem rò toï éh ke koula naaté ang,

⁵ Tokou ban lé ke djèdjè nto baya baya, djèdjè djéh ke rò kadaba mè Christ té, ke djèdjè kada kada toï nto barkem ròna.

⁶ Ke mbata djèdjè djéh ke né kare ba dang dang deo tòkou mè madji té ke daredjè, tokou to tar ke Allah oula, ase kare djèdjè ntòdjou tar ke Allah oula né, ase deo ko mè té lodjè.

⁷ Tokou to koula, ase kare djounda mèdjè koulè té, doou ke tòdjou tar, ase kare nounda mèa dò tòdjou tar té la.

⁸ Doou ke ndedji doou, ase kounda mèa dò tar ndedji té la, doou ke are né, ase kare nè nare né ke mè ke ndiki, doou ke ngem né, ase ngem madji, doou ke da mè madji, ase ta da ke rònèl.

⁹ Aridjé ndiki to ndiki ke tokoro, mbetidjé né ke madjang, oundaidjé mèsè dò né té ke madji.

¹⁰ Ndikidjéna horosè té ke ndiki lo ngakönadjé, òsidjé gadji ngakösè dongor.

¹¹ Aridjé boo da né woei ngadji ang, aridjé Ndil ndokoosè, edaidjé ke Mbaibé Seigneur.

¹² Isidjé ke rònèl mè tar ngebe té losè, aridjé mèsè enge ang ke mè né ongou té, ïyaidjé ke ta doudjou Allah ang.

¹³ Aridjé né ke dou ndjè ko mè tédjé, edaidjé are ndjè mbaadjé ke ndò toï.

¹⁴ Ebaridjé tar ke madji dò dooudjé té ke ngäsè ke tar, ebaridjé tar ke madji, etadjidjédè ke né tadji ang.

¹⁵ Edaidjé rònèl ke ndjè ke da rònèl, enòidjé ke ndjè ke no.

¹⁶ Oundaidjé mèsè dò tar té kadaba kena, oundaidjé mèsè dò tokou né té ang, a edaidjé né ke dooudjé ke ba, oundaidjé mèsè dò kemkarè té losè ndja ndò kada ang.

¹⁷ Etélidjé madjang are doou kada ke dasè madjang ang, a esangidjé né ke to madji no dooudjé té toï.

¹⁸ Tokou ase, tokou tar losè to mè té, isidjé ke mè woul ke dooudjé toï.

¹⁹ Ngakömdjé ke mam ndikisè nya, oukaidjé baange losè ndja ang, ïyaidjé deo ongou are Allah, mbata maketourou pana, Baange to ngäm, ma ma kouka, Mbaibé Seigneur pa.

²⁰ Eë, a tokou boo da ndjè kembaa loi, arè mourou nön, tokou kounda öè, arè man naih, bo da tokou ban to yél pourou ke ongou dè té.

²¹ Are né ke madjang wota dòi ang, a wota né ke madjang ke madji.