Romaindjé 10 - Testament ke Siki 1960 (Kabba Laka)

¹ Ngakömdjé, né ke mem ndiki ke mam ndoudjou Allah mbata lodè, to ta karedè dinga kadji.

² Mbata ma mpa tar nadji lodè, dèdè déh ke boo mbata Allah, a to deo kemkarè té ang.

³ Mbata dèdè ngeré tar gaté gaté ke dé deo té lo Allah ang, ke mbata dèdè ndiki ta sange tar gaté gaté deo té lodè ndja, dèdè ndiki gè ke tar gaté gaté lo Allah ang.

⁴ Mbata Christ to dòbon tar ndedji, ta kare dooudjé toï ke wo mèdè té dé gaté gaté.

⁵ Moïse da maketourou té, doou ke da gaté gaté ke to deo tar ndedji té, na kisi tébe deoè té.

⁶ A tar gaté gaté ke to deo ko mè té pana, Epa mei té ang, na a kao dara wa? Yèn pana, Ta disi ke Christ.

⁷ Aséh, Na a kourou mè tòkou bwa té wa? Yèn pana, Ta kare Christ ï mè bwa yo té.

⁸ A maketourou pana di wa? Tar ndja éh sei ngosiba, ke tai ndja ke mei té to. Yèn pana, Tar ko mè té ke djèdjè ntòdjou tarè.

⁹ Mbata tokou i pa tai té ke daka, Jésus to Mbaibé, ke wo mei té ke Allah wèè ke tarr mè bwa yo té, i a kinga kadji.

¹⁰ Mbata doou wo mèa té, bana nè ndé gaté gaté, ke nè mpa ke tè, bana nè ninga kadji.

¹¹ Maketourou lo Allah pana, Doou ke wo mèa té sa, na kinga ròkoul ngadji ang.

¹² Mbata Juif to dang ke Grec ang, Mbaibé kadaba to Mbaibé lodè toï, ke nè nare né kinga ba dèdè toï ke mmar ria.

¹³ Mbata, dooudjé kada kada toï ke bar ri Mbaibé Seigneur a kinga kadji.

¹⁴ A deo di a dooudjé ase bar nè ke do mèdè té sa ang wa? Deo di a dèdè dase ko mèdè té ke nè ke dèdè do tar la ang bai wa? Ke deo di a dèdè dase ko tokou doou ke ndjè tòdjou tar goto wa?

¹⁵ Ke deo di a dooudjé ase tòdjou tar tokou douladè ang wa? Deo kadaba tokou maketourou pana, Wo tokou gòldè to madji, dèdè ke ntòdjou tar ke madji.

¹⁶ A dèdè toï do tar ke madji ang, mbata Ésaïe pana, Mbaibé Seigneur, na wo tar lodjè wa?

¹⁷ Tokou ban ko mè té dé deo ko tar té, ke deo ko tar dé deo tar té lo Christ.

¹⁸ A mam ndoudjou, dèdè do ang wa? Dèdè do tokoro, mbata, Ndoudè ao do nange té toï, ke tar lodè téh dò nange té toï.

¹⁹ Mam ndoudjou mare bai, Israël geré gelè ang wa? Moïse pa ke dongor, Ma ma da baa kare mèsè ösè ke dèdè ke nto ndjè boanadjé, Ke ma ma da baa kare ongou ösè ke gel dooudjé ke geré né ang.

²⁰ Gè té Ésaïe éh ke bel ngadji ang ta pana, Dèdè ke nsangem ang, dingam mbä, Dèdè ke ndoudjou tar lom ang, mam ntéh ròdè té mbä.

²¹ A nè mpa tar lo Israël, mpana, Ndò toï ma moula djim ke rò dooudjé té ke to ndjè ko tar ang, ke ndjè maitar.