Pilimo 1 - Testament ke Siki 1960 (Kabba Laka)

¹ Paul, ndjè kei koula mbata Christ Jésus, ke Timothée ngoködjè. Djoula djare Philémon ndjè koumadjé koula té, ke djèdjè ndikè nya.

² Ke Apphia könandjè ke dènè, ke Archippe ndjè koumadjè koula dòò té, ke kei Allah ke to mè kei té loi.

³ Allah Bòdjèdjè ke Mbaibé Jésus Christ ari tòkou mè madji ke mè woul.

⁴ Mam nda woio Allah lom ke ndò toï tokou mem olè dòi té ke doudjou Allah té lom.

⁵ Mbata ma mo tar lo ndiki loi ke ko mè té ke éh mei té mbata Mbaibé Jésus, ke mbata ndjè ko mè tédjé toï.

⁶ Mam ndoudjou Allah ta kare koula ko mè té loi da ase ta kare ngeré né ke madji toï ke to lodjè mè Christ té.

⁷ Mbata ma minga koukou nya ke mè woul deo té lo ndiki loi ngoköm, mbata mè ndjè ko mè tédjé isi dèkèkè bai deo té loi.

⁸ Tokou ban, mè Christ té ma méh ke bel ang ta pa kari ta da né ke to ase nga.

⁹ A mbata tar ndiki, mam ndiki wota ta wali, ma Paul ke to bouka, ke ndjè kei koula loshénè to mbata Christ Jésus.

¹⁰ Mam nwali mbata ngonem Onésime, nè ke mam ndé to bèdjè mè kei koula té lom.

¹¹ Leo nè nda madji mbata loi ang, a bashénè nè nto madji tokoro mbata loi ke mbata lom.

¹² Ma moulè ta tél ròi té, ma moula mem ndja.

¹³ Mam ndiki nya ta ngemè sem, baa ta kare nè nda sem touri té, tokou misi kei koula té mbata tar ke madji.

¹⁴ A mam ndiki ta da né kada ang tokou mo tar loi ang, baa ta kare tar ke madji loi dé deo té lo tar ndange ang, a deo té lo né ke mei ndja ndiki.

¹⁵ Dòmadjang a to mbata tar nèn ke nè nïyai ngadji, baa ta kare i ase kingè mare bai mbata ndò ke ndò.

¹⁶ Tokou bere marè ang nga, a wota bere nya, tokou ngokö ke djèdjè ndikè nya, ngoköm ke mam ndikè nya, a wota yéh nèn mbata loi deo té lo da rò ke mè Mbaibé Seigneur té tò.

¹⁷ Tokou ban, tokou i wom tokou ndjè koumai, etèè deo kadaba tokou i a taam.

¹⁸ Tokou nè nda sei madjang leo, aséh baange loi to dè té, etoura baange lé dòm té.

¹⁹ Ma Paul, mam nda maketourou nèn ke djim ndja, ma ma kouka baange nèn, ma mpa tar kada ang mbata baange lom ke to dòi té, ke to ròi ndja.

²⁰ Aa ngoköm, mam ndiki ta kinga mare né dji té mè Mbaibé Seigneur té. Eda ta kare mem isi dèkèkè bai mè Christ té.

²¹ Mbata mam ngeré i a ko tar lom, mam nda maketourou mari, mam ngeré i a da wota yéh nèn ke ma mpa.

²² Marè bai, eda loou to mbata lom, mbata misi ke mè ngebe deo doudjou Allah té loi, da karem mao ròi té.

²³ Epaphras, ndjè koumam kei koula té mè Christ Jésus té, dasè laphia.

²⁴ Marc, Aristarque, Démas ke Luc, ndjè koumamdjé koula té, ndasè laphia tò.

²⁵ Tòkou mè madji lo Mbaibé Jésus Christ éh ke ndii loi.