Philippiendjé 4 - Testament ke Siki 1960 (Kabba Laka)

¹ Mbata yèn, ngakömdjé ke mam ndikisè nya, ke boo ndiki nya dam mbata losè, rònèl ke djòkedò lom, arridjé ngeng ban mè Mbaibé Seigneur té, sésè ke mam ndikisè nya.

² Mam ndedji Evodie ke mam ndedji Syntyche ta ndikina kadaba mè Mbaibé Seigneur té.

³ Mam ndoudji to, i ndjè koumam ke tokoro, ouma dènèdjè nèn, mbata dèdè nda koula naaté sem mè tar té ke madji, naaté ke Clément ke kese ndjè kouladjé lom, dèdè ke ridè to mè maketourou tébe té.

⁴ Edaidjé rònèl mè Mbaibé Seigneur té ke ndò toï, ma mpa mare bai, edaidjé rònèl.

⁵ Ase kare dooudjé toï geré kourè wour losè, Mbaibé Seigneur éh ngosiba.

⁶ Aridjé mèsè sangesè mbata né kada ang, a ke mè né té toï, deo koi té ke deo doudjou Allah té ke woio, ase kare epaidjé né ke edoudjidjé are Allah.

⁷ Ke mè woul lo Allah ke ndai kemkarè toï, a ngem mèsè ke kedji losè mè Christ Jésus té.

⁸ Go né té toï, ngakömdjé, né ke to tokoro, ke né ke ase piti, ke né ke to gaté gaté, ke né ke éh ke yèdo kada ang, ke né ke to ta ndiki, ke né ke to tar ke madji, tokou né ke madji éh kendé, ke a kase woio, edjidjé do nédjé té nèn.

⁹ Né ke sésè egeridjé ke ingaidjé ke woidjé ke mbisè ke kemsè deo té lom, edaidjé ban, ke Allah ke ndjè mè woul a kéh kesè.

¹⁰ Ròm nèlem nya mè Mbaibé Seigneur té mbata bashénè ndja sésè edjidjé to ke siki dò tar té lom, sésè edjidjé do tar té lom ke tokoro, a deo ta da né dousè.

¹¹ Ma mpa ban ang mbata né ke doum, mbata mam ngeré ta kisi dèkèkè mè né té toï ke méh kendé.

¹² Mam ngeré ta kisi ke ròkoul, ke mam ngeré ta kisi ke nédjé nya, mè né té toï ke loou té toï, mam ngeré ta kisi ke mourou nya ke ta kisi ke boo nya, ta kisi ke nédjé nya ke ta kisi dangeté.

¹³ Ma mase ta da né toï ke mè nè té ke narem singa.

¹⁴ A sésè edaidjé madji mbata edaidjé sem naaté mè né ndoo té lom.

¹⁵ Ke sè Philippiendjé, sésè ndja egeridjé ke kounkoutou pa tar ke madji, ndò ke mïya Macédoine, kei Allah kada da sem naaté ang deo kare né ke deo taa né, sè sésè kadaba.

¹⁶ Mbata lé ke Thessalonique sésè oulaidjé né ta koumam gar djo.

¹⁷ Mam nsange né kare ba ang, a mam nsange kandé nèn ke an ta karesè kouka.

¹⁸ Ma minga kouka toï mbä, ke marè nya dè té, né lom ase mbata minga ke dji Epaphrodite té né kare ba ke sésè oulamdjé, né kare ba ke ete madji, né polo ke ase madji ke nèl Allah.

¹⁹ Ke Allah lom a karesè né toï ke dousè, ase né kinga la ke ndokoo mè Christ Jésus té.

²⁰ Ndokoo to lo Allah ke Bòdjèdjè ndò ke ndò. Amen.

²¹ Edaidjé laphia ndjè ko mè tédjé toï mè Christ Jésus té. Ngaködjèdjè ke éh sem dasè laphia.

²² Ndjè ko mè tédjé toï dasè laphia. Dèdè ke kei lo César ndasè laphia wota nya.

²³ Tòkou mè madji lo Mbaibé Jésus Christ éh ke ndii losè.