Philippiendjé 3 - Testament ke Siki 1960 (Kabba Laka)

¹ Go tar té nèn toï, ngakömdjé, edaidjé rònèl mè Mbaibé Seigneur té, ta da maketourou karesè tokou mam nda dongor arem ongou ang, a yèn to madji mbata losè.

² Ngemidjé ròsè mbata bisidjé, ngemidjé ròsè mbata ndjè kouladjé ke madjang, ngemidjé ròsè mbata dèdè ke doudja ròdè madjang.

³ Mbata djèdjè nto ndjè koudja ta mote ke tokoro, ke wal Allah deo Ndil té lo Allah, ke djèdjè djòsou gadjidjè mè Jésus Christ té, ke djèdjè djounda mèdjè dò da rò té ang.

⁴ Mbata ma mase kounda mem dò da rò té tò. Tokou mare doou edji nè nase kounda mèa dò da rò té, ma mase kounda mem dè té wota.

⁵ Doudja ta motem ndò té ke djidjo, mam nto doou ke Israël té, gel doou té lo Benjamin, mam nto Hébreu ke Hébreudjé oudjoum, ke deo tar ndedji té mam nto Pharisien.

⁶ Deo boo da né té ke madji, mam nto ndjè ngätar ke kei Allah, deo gaté gaté té lo tar ndedji, dinga tar ke madjang dòm té kada ang.

⁷ A né ke ma minga né kendé, ma mo to né ke nai mbata lo Christ.

⁸ Tokoro mo né toï to né ke nai mbata mo madji wota ta geré Christ Jésus Mbaibé lom. Ma mïya né toï mbata la, mo toï to dòbiri, baa ta karem minga Christ.

⁹ Ke ta kéh mèa té ke gaté gaté lom ndja ang, ke dé deo tar ndedji té, a gaté gaté ke dé deo ko mè té mè Christ té, gaté gaté lo Allah ke dé deo ko mè té.

¹⁰ Baa ta karem ngeré Christ ke singa kï mè bwa yo té la, ta ko né ndoo deo kadaba sa, ta dé tokou nè ndja mè kwoei té la.

¹¹ Mbata tokou to ase, mase ta téh sar kï horo ndjè yodjé té.

¹² Ma mpa ang ke ma minga mbä, aséh mam ndé ase toï mbä, a ma maïngòrou baa ta taa to né lom ndja, mbata Christ Jésus taam to né la ndja.

¹³ Ngakömdjé, ma medji mem té ang ke mam ntaa to né lom mbä, a mam nda né kada, mem woei do né té ke goukou, ke mam nnar deo mbata né ke to nòm té kèté.

¹⁴ Ma maïngòrou sar ngangè té ta taa né kare ba ke Allah barem ke tarr ta taa mè Christ Jésus té.

¹⁵ Ase kare djèdjè ke ntokou mbä, djedji tar tokou ban, ke tokou sésè edjidjé mare né ke dang, Allah a tòdjousè tarè tò.

¹⁶ Yèn kadaba, ase kare djèdjè ndja mè né té ke djèdjè djinga mbä.

¹⁷ Ngakömdjé, edaidjé deo kadaba tokou mam nda, ke aaidjé dèdè ke ndja deo kadaba tokou né tòdjou ke woidjé mèdjè té.

¹⁸ Mbata maredjé baya ndja tokou ndjè kembaa kake dèse lo Christ, dèdè ke ma mpa tar lodè gar baya maresè leo, ke bashénè ma mpa maresè ke man kem tò.

¹⁹ Dòbon tar lodè to loou kem pourou, mèdè to Allah lodè, ke dòsou gadjidè mè ròkoul té lodè, ke dounda kedji lodè do né té ke nange nèn.

²⁰ A béh lodjè to dara, ke djèdjè ngebe ndjè kadji ta téh kendé, Mbaibé Jésus Christ ndja.

²¹ Nè ke na tourou ròdjè ke to ròkoul nèn ta dé tokou rè ke ndokoo, deo singa té ke arè ta kongou nédjé toï dja té.