Philippiendjé 2 - Testament ke Siki 1960 (Kabba Laka)

¹ Tokou ban, tokou mare tar kòrou ongou éh mè Christ té, tokou mare né kòrou ongou to mè ndiki té, ke ta da mè kadaba ke Ndil, ke mare tar ndiki ke mè madji to,

² Aridjé koukou lom dousou deo kisi té ke mè kadaba, ke deo ndiki té kadaba, ke ndikidjéna ke kedji ke kadaba.

³ Edaidjé né kada deo maitar té aséh deo ndoi rò té ang, a deo da ròsè té ngadji, woidjé mare dooudjé madji wota sésè ndja.

⁴ Ase kare sésè kada kada toï esangidjé ta da né mbata losè ndja ang, a esangidjé ta da mbata maredjé tò.

⁵ Aridjé tar kedji kadaba to horosè té, ke éhdjé kendé mè Christ Jésus té.

⁶ Nè, lé ke nè néh tokou Allah, ta kisi naaté ke Allah nè no tokou né ta sange ta kwaa ang.

⁷ A nè mbel nòrou né la ndja, ke nè ndé tokou lo bere, ke doudjè deo kadaba tokou dooudjé.

⁸ Ke mbata nè néh ke rò tokou lo rò doou, nè nda nè ndja ngadji, ke nè no tar nderèng kwoei, lé kwoei do kake dèse té.

⁹ Mbata yèn Allah ndoi rè, arè nisi boui wota, ke nè narè ri ke bo wota ridjé toï.

¹⁰ Baa ta kare mekedjé gòl toï ase kongou nò ri Jésus té, ke dara ke dò nange té, ke ko nange té.

¹¹ Ke ta kare ta dooudjé toï pana Jésus Christ to Mbaibé Seigneur, ta kòsou gadji Bòi Allah.

¹² Mbata yèn, sésè ke mam ndikisè nya, deo kadaba tokou sésè woidjé ke ndò toï ke tokou ban loshénè, ke kem té ba ang, a wota nya tokou ma méh kesè ang, edaidjé ke bel ke rò kisa ta kare kadji losè dé ase.

¹³ Mbata Allah da koula mèsè té, ta karesè ta ndiki ke ta da koula tò, tokou nè ndja ndiki.

¹⁴ Edaidjé né toï ke nanè ke maitar ang,

¹⁵ Baa ta kare sésè éhdjé ke tar kada dòsè té ang, ke né ke madjang kada ang, ngandjé lo Allah ke éh ke né ke madjang kada goto horo gel dooudjé té ke to gatang, ke ndja deo mbeténa té, mbata horodè té ke nange nèn sésè ndokooidjé tokou pourou.

¹⁶ Tokou ngemi djè tar tébe, tokou ban ndò lo Christ ma ma kase kòsou gadjim mbata maïngòrou ba ang, aséh mam nda koula ba ang.

¹⁷ Lé tokou dongoum tokou koto do kòr té to né kare ba lo ko mè té losè, ma méh ke koukou ke rom nèlem kesè toï.

¹⁸ Deo kadaba ase kare sésè éhdjé ke koukou to, ke ta kare ròsè nèlsè sem.

¹⁹ Ma medji mè Mbaibé Jésus té ta koula Timothée ròsè té ndjange, baa ta kare ma minga rònèl tokou ma mo tar losè.

²⁰ Mbata ma méh ke mare doou kada tokou la ang, ke a kounda mèa ta da mbata losè.

²¹ Dèdè toï nsange né mbata lodè ndja, a mbata Jésus Christ ang.

²² A sésè egeridjé mè ndaa kaï lo Timothée, deo kadaba tokou ngon da ke bèdjè, nè nda sem mè koula tar té ke madji.

²³ Tokou ban ma medji ta koulè ròsè té ndjange, gè té ke mam ngeré né ke a téh rom té.

²⁴ Ke mem oso pon mè Mbaibé Seigneur té, ke ma ndja ma kao ròsè té gè té ngadji.

²⁵ Ma mo ase ta koula Epaphrodite ròsè té, nè ke nto ngoköm ke ndjè koumam koula té ke ndjè pourou marem, nè ke nto ndjè koula losè ke sésè oulèdjé ta da sem mè né té ke doum.

²⁶ Mbata nè ndiki nya ta kosè to, ongou dè mbata sésè woidjé tar rò too la.

²⁷ Tokoro nè néh ke rò too ngosiba ke yo, a Allah da sa mè madji, nè ke kadè ang a ma to, baa ta kare ma minga ongou dò mare ongou té ang.

²⁸ Tokou ban ma moulè ke tòkè, baa ta kare sésè ròsè nèlsè tokou woèdjé marè bai, ke ta kare ma ndja ongou lom eo ngadji.

²⁹ Tokou ban, etèèdjé mè Mbaibé Seigneur té ke koukou ke madji toï, epitidjé dooudjé tokou ban.

³⁰ Mbata to mbata koula lo Christ ke nè ndé ngosiba ke yo, nè nda ta kïya tébe la ta da sem koula ke sésè edaidjé ase ang bai.