Philippiendjé 1 - Testament ke Siki 1960 (Kabba Laka)

¹ Paul ke Timothée, beredjé lo Christ Jésus, Djoula djare ndjè ko mè tédjé toï mè Christ Jésus té, dèdè ke disi Philippes té, ke ndjè ndja ta ngem kei Allah, ke ndjè kö dò kei Allah tò.

² Allah Bòdjèdjè ke Mbaibé Jésus Christ daresè tòkou mè madji ke mè woul.

³ Mam nda woio Allah ke ndò toï tokou mem olè dòsè té.

⁴ Ke ndò toï mè doudjou Allah lom toï mbata losè toï, mam ndoudjou Allah ke rònèl.

⁵ Mam nda woio mbata sésè oumamdjé ke tar ke madji ke ndò té ke dongor nderèng bokonè.

⁶ Ke mam ngeré ke tokoro, nè ke nounkotè da koula ke madji mèsè té, nè na da ta kare ndé ase toï ndò té lo Jésus Christ.

⁷ To gaté gaté mbata mem edji tokou ban mbata losè toï, mbata sésè toï etoidjé mem té tokou ndjè kinga tokou mè madji deo kadaba ke ma, mè kei koula té lom ke tokou ma mpa tar nadji ta ngem tar ke madji to, ke ta kare nto tar ke tokoro.

⁸ Mbata Allah to ndjè tar nadji lom, deo té ke boo ndiki dam mbata losè toï, ke ndiki lo Christ Jésus.

⁹ Ke mam ndoudjou ke doudjou Allah lom baa ta kare ndiki losè bar nya wota wota, ke kemkarè ke ndii geré gel né toï.

¹⁰ Tokou ban ta kare sésè asidjé ta geré né ke nto madji wota, ke ta kare sésè a kéhdjé ke né ke madjang kada ang, ke tar kada dèsè té ang mbata ndò lo Christ.

¹¹ Ta kare sésè edousidjé ke kandé ke gaté gaté, ke dé deo té lo Jésus Christ, mbata kòsou gadji ke mbata wal Allah.

¹² Mam ndikisè ta geré, ngakömdjé, né ke téh dòm té dé ta kare tar ke madji bar wota.

¹³ Tokou ban ndjè pouroudjé toï ke kei mbai té, ke mare dooudjé toï ngeré ke mam nto ndjè kei koula mbata Christ.

¹⁴ Ke mè ngaködjèdjè nya oso pon ke Mbaibé Seigneur mbata misi kei koula té, ke dèdè déh ke bel ang ta pa tar lo Allah wota yéh ke dongor.

¹⁵ Maredjé pa tar lo Christ mbata mè dadè, ke mbata ndii maitar, a maredjé pa tar ke mè madji.

¹⁶ Dèdè ke goukou nda mbata ndiki, dèdè ngeré ma méh nèn mbata tar nadji ngem tar ke madji.

¹⁷ Dèdè ke dongor mpa tar lo Christ deo maitar té, ke mè ke tokoro ang, mbata dèdè dedji ta karem ongou mè kei koula té lom.

¹⁸ Tokou ban di wa? Deo té toï, dèdè mpa tar lo Christ, lé tokou to deo kere té, aséh to deo té ke tokoro, ke mam nkoukou mbata yèn.

¹⁹ Aä, ke ma ma koukou, mbata mam ngeré deo doudjou Allah té losè, ke deo kouma té lo Ndil lo Jésus Christ, yéh nèn a tourou ta kadjim.

²⁰ Mbata mem ngebe ke mè ngebe nya, ke ròkoul a dam ngadji ang, a ke bel ngadji ang bokonè deo kadaba ke ndò toï, Christ a kinga piti ròm té, deo tébe té lom aséh deo kwoei té.

²¹ Mbata ke kem té, ta kisi tébe to Christ, ke ta kwoei to ta kinga né.

²² Tokou to ta kisi tébe mè da rò té, yèn baa ta karem nda koula ke an, yéh ke mam ndiki ta mbere ma mase pa ang.

²³ Tar djokem to ngeng, mam ndiki ta kao ta kisi ke Christ, mbata yèn to madji wota.

²⁴ A ta kisi ke da rò to madji wota mbata losè.

²⁵ Mbata mam ngeré tokou ban tokoro, mam ngeré ma ma kisi ke ma ma da kesè toï, ta kare bar losè ke koukou losè ndé wota deo ko mè té.

²⁶ Baa ta kare deo té lom, sésè asidjé ta kòsou gadjisè mè Christ Jésus té, mbata deo tél té lom ròsè té.

²⁷ A ase kare ndja losè to ase madji ke tar lo Christ, baa ta kare tokou mam ndé ta kosè, aséh ma méh kesè ang, ma mase ko tar losè ke sésè isidjé ngeng ke ndii kadaba, ke edòòidjé naaté ke mè kada mbata ko mè té ke tar ke madji.

²⁸ Aridjé bel lo ndjè kembaadjé losè dasè ke né kada ang, Yèn to né tòdjou kemdè té ke tòdjou kwoei lodè kem pourou té, a to kadji losè ke dé deo té lo Allah.

²⁹ Mbata daresè mbata lo Christ ta ko mèsè té ba ang, a ta kinga ongou mbata la tò.

³⁰ Waaidjé ngeng deo kadaba tokou sésè woidjé ke kemsè ke mam ngem leo, ke woidjé ke mbisè ke mam ngem loshénè.