Marəke 9 - Testament ke Siki 1960 (Kabba Laka)

¹ Nè mpa naredè, Tokoro ma mpa maresè, ke horodè té ke darr nèn, maredjé ke arr nèn da naa kwoei ang dongor dèdè do béh ko lo Allah dé ke singa.

² Gè té ndò misä Jésus bar Pierre ke Jacques ke Jean, nè nao kedè do err té kada ke ndeo nya, dèdè ndja. Nè ntél rè nodè té.

³ Koubou la dé ndokoo nya ke ndaa nya to, doou kada ke nange nèn ase ta toko koubou ndaa tokou ban ang.

⁴ Élie ke Moïse ntéh ròdè té, dèdè dao mpa tar ke Jésus.

⁵ Pierre tél tar pa are Jésus, pana, Ndjè tòdjou tar, to madji ke djèdjè djéh nèn. Madji ta kare nda kei kam mouta, kada mbata loi, kada mbata lo Moïse ke kada mbata lo Élie.

⁶ Mbata nè ngerang tar di baa nè mpa wa, mbata bel dadè nya.

⁷ Ndi ke il dibidè ke ndou téh mè ndi té ke il pana, Yèn to ngonem ke mam ndikè nya, woidjé tar la.

⁸ Loshénè loshénè dèdè do loou mbòrdè té, dèdè do mare doou kada ang sè Jésus kadaba.

⁹ Tokou dèdè dao ndisi ke do err té, Jésus ndedjidè né ke dèdè do mbä ase kare mpa dare doou kada ang, sar gè té ke Ngon lo doou ï mè bwa yo té.

¹⁰ Dèdè ngem tarn lé horodè té ndja, ndoudjou horodè té gel tar kï mè bwa yo té to di wa.

¹¹ Dèdè ndoudjè tar, Mbata di a ndjè da maketourou ndedjidjé pana to to tar lo Élie ta kare dé dongor wa?

¹² Nè mpa naredè, Tokoro Élie dé ta da né toï dongor, deo di a maketourou pa tar lo Ngon lo doou, ke to tar la ta kinga né ongou nya, ke ase ta kare mbetè to wa?

¹³ Ma mpa maresè, Élie dé mbä nga, dèdè nda sa né ke mèdè ndiki, deo kadaba tokou maketourou lo Allah pa tar la.

¹⁴ Tokou dèdè ndé rò ndjè kao gè tédjé, dèdè do dooudjé baya dousou loou ke ròdè té, ke dooudjé ke ndjè da maketourou ndedjidjé maitar kedè.

¹⁵ Loshénè loshénè dooudjé tokou baya toï, tokou dèdè do Jésus mèdè ounda do bia nya. Dèdè daïn ke rè té, ndè laphia.

¹⁶ Nè ndoudjoudè, Sésè edoudjidjédè tar di wa?

¹⁷ Doou kada horo dooudjé té ke baya tél ke tar arè, Ndjè tòdjou tar, mam ndé ròi té ke ngonem ke dingao ke isi ke ndii ke pa tar ang.

¹⁸ Mare loou ndii mengeréng wèè ilè nange poumtè téh tè té. Nè nousa ngangè ke singa la goto. Mam ndoudjou ndjè kao goi tédjé ta touba ndii mèa té, dèdè dase ta touba ndii lé ang.

¹⁹ Jésus tél pa aredè, Dooudjé ke ndjè ko mè té ang, ma kisi kesè ndò ban wa, baa mem a kenge ang wa? Edé sa arem.

²⁰ Dèdè ndé sa dare Jésus, tokou ndii wo Jésus loshénè loshénè ba yè ngon ngeng, nè noso ndoubou nange, poumtè téh tè té.

²¹ Jésus doudjou bèdjè, Né nèn dè ndò ban wa? Nè mpana, Tokou nè nai ngon ngadjiba.

²² Gar baya ndii lé ilè pouro ke ilè man té ta tòlè, tokou i ase da mare né eda mè madji kedjè, oumadjè.

²³ Jésus pa arè, Tokou i ase. Doou ke wo mèa té ase ta da né toï.

²⁴ Loshénè loshénè bo ngondjèn lé no, mpana, Ma mo mem té, oumam mbata ko mè té lom asang.

²⁵ Tokou Jésus wo dooudjé baya baya dao daïn ta mbona loou kada, nè ndange ndii ke madjang lé, mpa narè, I ndii mbi koutou ke pa tar ang, ma mpa mari, etéh mè ngon té nèn, etél mèa té goukou ang nga.

²⁶ Tokou ndii lé ourouki yè ngon lé ngeng nya, nè ntéh. Ngon lé dé tokou lo doou ke woei mbä. Tokou ban mare dooudjé tokou baya pa, Nè noei mbä.

²⁷ A Jésus waa dja, wèè ke tarr, nè nï.

²⁸ Tokou Jésus ao mè kei té mbä, sè ndjè kao gè tédjé doudjè hoi, Mbata di a djèdjè djase touba ndii la ang wa?

²⁹ Nè mpa naredè, Ndil ke ban ase ta téh ke mare deo ang sè deo doudjou Allah ke kïya mourou kadaba.

³⁰ Dèdè ntéh nou, dèdè ndai nange té ke Galilée, Jésus ndiki ta kare doou kada geré ang.

³¹ Mbata nè ntòdjou ndjè kao gè tédjé, nè mpa naredè, Dèdè da kwaa Ngon lo doou kare dji dooudjé té, dèdè da tòlè. Tokou dèdè ntòlè gè té ndò mouta nè na kï.

³² Dèdè ngeré gel tar lé ang, ke dèdè nda bel ta doudjè.

³³ Dèdè ntéh Capernaüm. Tokou nè ndé mè kei té nè ndoudjoudè, Di baa maidjé né na tar horosè té deo bo wa?

³⁴ Dèdè disi yim, mbata ke deo dèdè mmaitar horodè té mbata tar lo doou di wa ke horodè té wota marè.

³⁵ Nè nisi, nè mmardè dòkou gérè djo, nè mpa naredè, Tokou doou ndiki ta dé doou ke dongor, nè na dé doou ke goukou ta da ngonlokisi lo dooudjé toï.

³⁶ Nè nwaa ngon kada, nè nilè horodè té, nè nounè dja té, nè mpa naredè,

³⁷ Dooudjé kada kada ke taa ngon tokou ban ke rim, taam tò. Dooudjé kada kada ke taam, ntaam ang sè nè ntaa nè ke noulam.

³⁸ Jean pa arè, Ndjè tòdjou tar, djèdjè djo doou kada ke touba ndildjé ke madjang ke ri, djèdjè ngangè mbata nè ndja kedjè ang.

³⁹ Jésus pana, Egangèdjé ang, mbata doou kada ke da tokou koula ke rim, nè nase pa tar madjang dom té goukoudang ang nga.

⁴⁰ Mbata doou ke mbetédjè ang a kéh kedjè.

⁴¹ Tokoro ma mpa maresè, Doou ke kada ke aresè ngo man kada ta kaih mbata sésè otoidjé ri lo Christ, kouka la ngadji a nai ang.

⁴² Doou ke ere kada lo dèdè ke ngadji nèn ke wo mèa té sem ta da né ke madjang, to madji wota mbata la ta tò tokou biri err gosè té ta kilè mè tokou man té.

⁴³ Tokou dji eri ta kari da madjang, egangè, mbata madji wota mbata loi ta kinga tébe ke ròi ke dji ke kada, wota ta kao kem pourou té ke dji djokem, loou kem pourou té ke woei ndò kada ang.

⁴⁴ Loou ke koudè ousadè a da kwoei ang, loou kem pourou té a kwoei ang.

⁴⁵ Tokou gòli eri ta kari da madjang, egangè, mbata madji wota mbata loi ta kinga tébe ke ròi ke oso mete, wota ta kare dilai kem pourou té ke gòli djokem.

⁴⁶ Loou ke koudè ousadè a da kwoei ang, loou kem pourou té a kwoei ang.

⁴⁷ Tokou kemi eri ta kari da madjang, etò kemi, mbata madji wota mbata loi ta kao béh ko té lo Allah ke kemi kada, wota ta kare dilai kem pourou té ke kemi djokem.

⁴⁸ Loou ke koudè ousadè a da kwoei ang, loou kem pourou té a kwoei ang.

⁴⁹ Mbata da tousou pourou dò dooudjé té toï tokou katé.

⁵⁰ Katé to madji, a tokou katé nèl ang a da karè ntél nèl to di wa? Isidjé ke katé mèsè té, isidjé ke mè woul horosè té tò.