Marəke 8 - Testament ke Siki 1960 (Kabba Laka)

¹ Ndè té ke nou, tokou dooudjé ke baya baya tél mbona, dèdè déh ke mourou ang, Jésus bar ndjè kao gè tédjé pa aredè,

² Mam nda mè madji ke dooudjé ke baya baya nèn mbata dèdè disi sem ndò mouta bashénè, dèdè disi ke mourou ang.

³ Tokou ma maredè dao béh lodè ke boo ke dadè, singa lodè a goto ke deo, mbata maredjé horode té ï deo eo.

⁴ Ndjè kao gè tédjé tél pa arè, Doou ase ta kinga mourou da wa mè kòr té ta kare dooudjé ke baya nèn wa?

⁵ Nè ndoudjoudè, Isidjé ke mourou ban wa? Dèdè mpana, Shiri.

⁶ Jésus pa are dooudjé ke baya baya ta kare disi nange. Nè noun mourou ke shiri lé, gè té nè nda woio mbä, nè nkai nare ndjè kao gè tédjé ta kare dare dooudjén lé. Dèdè dare mouroun lé dooudjé ke baya baya lé.

⁷ Dèdè disi ke kaindji ke ngadji kada kada, gè té Jésus bar tar ke madji dodè té, nè mpa naredè ta kare doun kaindjin lé dare dooudjén lé tò.

⁸ Dèdè dön mèdè ndan, dèdè mbòn kese mourou dousou karè shiri.

⁹ Dèdè nto dooudjé ke dé ngosiba ke dourou sò.

¹⁰ Jésus oula dooudjé ta karedè dao, loshénè loshénè nè nao mè to té ke ndjè kao gè tédjé, nè ntéh nange té ke Dalmanutha.

¹¹ Pharisiendjé dé rè té ao mai sa tar mbata dèdè dao sange né tòdjou mè dara té, mbata dèdè ndiki ta nèè.

¹² Jésus taakem nya mèa té, mpana, Mbata di wa dooudjé nèn sange né tòdjou wa? Tokoro ma mpa maresè, da kare tar né tòdjou kare dooudjé nèn ang.

¹³ Nè nïyadè, nè ntél nao mè to té, nè nao toura man té.

¹⁴ Ndjè kao gè tédjé mèdè woei ta kao ke mourou. Mourou to djidè té kadaba mè to té.

¹⁵ Jésus ndedjidè pana, Ngemidjé madji, aïndjé tar oum lo Pharisiendjé ke tar oum lo Hérode.

¹⁶ Ndjè kao gè tédjé sange mèdè, dèdè mpana, Djèdjè djisi ke mourou ang.

¹⁷ Gè té Jésus geré, nè mpa naredè, Mbata di a esangidjé mèsè mbä mourou ke goto wa? Woidjé tar gatang bai wa? Mèsè to ngeng wa?

¹⁸ Sésè isidjé ke kem a woidjé ang wa? Sésè isidjé ke mbi a woidjé ang wa? Sésè oundaidjé mèsè kendé ang wa?

¹⁹ Tokou mam nkai mourou mi mbata lo dooudjé dourou mi, sésè mbòidjé kese mourou karè ban wa? Dèdè mpa darè, Karè dòkou gérè djo.

²⁰ Tokou mam nkai mourou shiri mbata lo dooudjé dourou sò, sésè mbòidjé kese mourou karè ban wa? Dèdè mpa darè, Karè shiri.

²¹ Nè mpa naredè, Sésè nai egeridjé ang bai wa?

²² Dèdè ntéh Bethsaïda. Dèdè ndé ke ndjè kem tò rò Jésus té. Dèdè ndoudjou Jésus mba kare òrè.

²³ Nè nwaa dji ndjè kem tò lé, nao sa ta béh té. Gè té ntiwëré kèmè te mbä nga ke nè nila dja dè té, nè ndoudjou dooun lé Wo loou mbä wa?

²⁴ Nè no loou, nè mpana, Mo dooudjé, modè tokou lo kake ke ao ndja.

²⁵ Jésus ila dja kèmè té mare, nè no loou madji, kèmè tél dé madji. Nè no né toï madji nya.

²⁶ Jésus arè nao kei la, mpana, Ao mè béh té ngadji ang.

²⁷ Jésus ao ke ndjè kao gè tédjé béh té ke Césarée ke Philippe. Nè ndoudjou ndjè kao gè tédjé ke deo, Dooudjé pana mam nto na wa?

²⁸ Dèdè mpa darè, Jean Baptiste, maredjé pana, Élie. Maredjé pana, Doou kada ke to prophète.

²⁹ Nè ndoudjoudè, Sésè epaidjé na mam nto doou di wa? Pierre tél pa arè, I to to Christ ndja.

³⁰ Jésus ndedjidè ase pa tar la kare doou kada ang.

³¹ Nè nao ntòdjoudè ke Ngon lo doou ase ta kinga nè ongou nya. Tòkou dooudjé ke tòkou ndjè kòrdjé ke ndjè da maketourou ndedjidjé dèdè da mbetè. Dèdè da tòlè, gè té ndò mouta ase kare nï.

³² Nè mpa tarn lé ke daka tesèrè. Pierre wèè ao ndangè.

³³ Jésus tourou rè wo ndjè kao gè tédjé, nao ndange Pierre, mpana, Ao ke nou gom té Satan. Mbata i ndiki gè ke Allah ang, i ndiki gè ke dooudjé.

³⁴ Nè mmar dooudjé tokou baya baya ke ndjè kao gè tédjé ta dé rè té, nè mpa naredè, Tokou mare doou ndiki ta dé gom té ase kare nè mbeté rè ndja, ke nase koto kake yo la baa ta kao gom té.

³⁵ Mbata doou ke ndiki ta kadji tébe la ndja, tébe la a nai. Doou ke tébe la nai mbata lom ke mbata tar ke madji, nè na kadjè.

³⁶ Tokou mare doou inga né ke nange nèn toï a tébe la nai, né lé toï a da sa madji to di wa?

³⁷ Mbata doou ase ta koun né di wa mbel né tébe la wa?

³⁸ Mbata doou ke da ròkoul mbata lom ke tar lom horo dooudjé té ke ndjè kaiya ke ndjè né da ke madjang loshénè nèn, Ngon lo doou a da ròkoul mbata la to, ndò té ke nè na dé ke ndokoo lo bèdjè ke angedjé ke madji toï.