Marəke 7 - Testament ke Siki 1960 (Kabba Laka)

¹ Tokou Pharisiendjé mbona ke Jésus ke mare ndjè da maketourou ndedjidjé ke dé ke Jérusalem té,

² Dèdè do mare ndjè kao go Jésus té ön mourou ke djidè yèdo, ke djidè ke ntoko ang.

³ Mbata Pharisiendjé ke Juifdjé toï tokou ntoko djidè ang a dön mourou ang tò, mbata dèdè ngem tar ndedji lo kadèdè.

⁴ Tokou dèdè ntéh nata dèdè dön mourou dongor ang da ndoko man ba. Mare tar to tokou baya ke dao ngem, tokou tar toko ngonarè ke djo ke djo ninga ke kasè.

⁵ Pharisiendjé ke ndjè da maketourou ndedjidjé ndoudjè, Mbata di a ndjè kao goi té ndja deo tar ndedji té lo kadjèdjè ang wa? Dèdè dön mourou lodè ke djidè yèdo?

⁶ Jésus pa aredè, Ésaïe pa tokoro leo tar losè ndjè kere ngem, deo kadaba tokou maketourou lo Allah pa, Dooudjén lé ke ndjè belem tadè té, a mèdè mbetem dèbè eo.

⁷ Dèdè mpitim ba, Dèdè ntòdjou tar lo dooudjé tokou tar ndedji.

⁸ Sésè ïyaidjé tar ndedji lo Allah, a sésè ngemidjé tar ndedii lo dooudjé.

⁹ Jésus pa aredè, Sésè mbetidjé ndedji lo Allah tokoro tokou ban sésè asidjé ngem tar béh losè.

¹⁰ Mbata Moïse pa leo, Ebel bòidjè ke köindjè, ke doou ke pa tar ke madjang dò bèdjè té aséh dò këndjè té ase kare ndjè nèn woei tokoro.

¹¹ A sésè epaidjéna, Tokou doou pa ke bèdjè aséh këndjè, né ke madji djim té mam ngeré ta karesè to to Corban, yèn pana, To né ke mare Allah mbä.

¹² Tokou ban ïyaidjé doou da mare né kada mbata lo këndjè ke bèdjè ang.

¹³ Tokou ban sésè ke edaidjé tar lo Allah are dé to né ke ba mbata tar béh losè ke etòdjidjé dooudjé. Sésè ao edaidjé mare né tokou baya ban.

¹⁴ Jésus tél bar dooudjé tokou baya, nè mpa naredè, Sésè toï woidjé tar lom, egeridjé.

¹⁵ Né kada ke ï daka tokou ao mè doou té ase ta dè madjang ang. Né ke téh mè doou té to to né ke da doou madjang.

¹⁶ Tokou doou éh ke mbi ke ka ko, ase kare nè no.

¹⁷ Gè té nè nïya dooudjé ke tokou baya, nè nao mè kei té mbä nga, ndjè kao gè tédjé doudjè gel tar gousoun lé.

¹⁸ Nè mpa naredè, Sésè egeridjé ang to wa? Sésè egeridjé ang, né ke daka ke ao mè doou té ase dè madjang ang wa?

¹⁹ Mbata yèn ao mèa té ang, nè nao do shi té, gè té ntéh deo té lo shi? (Tokou ban nè ntòdjou ke daka mourou toï to madji.)

²⁰ Nè mpana, Né ke téh mè doou té, yèn a dè madjang.

²¹ Mbata né ke téh mè doou té to to kedji ke madjang, loou to madjang, ke boukou, ke tòl doou, ke kaiya,

²² Ke ndjè kounda mèa do né té, ke né ke madjang, ke kere, ke boo né da ke madjang, ke kem ke dòboulo, ke tar ke dèkerè, ke ta kòsou gadji rò, ke tar mbe.

²³ Nédjé ke madjang nèn ke téh mè doou té, dèdè nda doou madjang.

²⁴ Jésus ï nou ao nange té ke Tyr ke Sidon. Nè nao mè kei té kada, nè ndiki doou kada ta kare geré ang, a Jésus ase ta kiyaa rè ang.

²⁵ Loshénè loshénè dènè kada ke ngonè ke dènè ke ngadji woei dè, nè no tar lo Jésus ndé noso no gòlè té.

²⁶ Dènè lé to to Grec ke gelè to Syrophénicien. Nè ndoudjou Jésus nya ta kare touba ndii ke madjang mè ngonè té.

²⁷ Jésus pa arè, Ïya are ngandjé ön mourou mèdè ndan dongor baa, mbata to madjang ta taa mourou lo ngandjé ta kare bisidjé.

²⁸ Dènè lé tél pa arè, Woio, Mbaibé Seigneur, a bisidjé to kò table té ön bourou mourou lo ngandjé.

²⁹ Jésus pa arè, Mbata tar loi lé ao, ndii ke madjang téh mè ngoni té mbä.

³⁰ Dènè lé ao kei la, no ngonè to mè twa té, ndii ke madjang téh mbä.

³¹ Goukoudang Jésus ïya nange ke Tyr, nè ndai nange té ke Sidon ta kao tokou man té ke nange té ke Galilée, ndai ke nange té ke Décapole.

³² Dèdè ndé rè té ke ndjè mbi koutou ke pa tar gatang, dèdè ndoudjou Jésus nya ta kare ila dja dè té.

³³ Jésus wèè ao sa deo eo ngadji ïya dooudjé ke baya nèn, nè noula ngaodja mè mbi doou tén lé, Jésus tiwëré òrou ndò doou té.

³⁴ Jésus aa loou ke dara, nè ntaakem, nè mpa narè, Ephphatha, yèn pana, Òrou.

³⁵ Mbia wo tar, gel ndë oudja, nè mpa tar madji nya.

³⁶ Jésus ndedjidè ase kare mpa dare doou kada ang. Tokou nè ndedjidè nare wota, dèdè mpa ke daka dare wota tò.

³⁷ Mèdè ounda do biä nya, dèdè mpana, Nè nda né toï madji mbä nga, nè nda dooudjé ke ndjè mbi koutoudjé nare do tar, ke mbedjé nare mpa tar.