Marəke 6 - Testament ke Siki 1960 (Kabba Laka)

¹ Jésus ï nou ao béh la ndja, ndjè kao gè tédjé ao gè té tò.

² Tokou ndò sabbat nè nao ntòdjou tar dooudjé kei Allah té. Tokou ban dooudjé tokou baya ke wo tar la mèdè ounda do biä, dèdè mpana, Doou nèn inga tar nèn da wa? Kemkarè nèn na arè wa? Nè nda tòkou koula tokou ban ke dja.

³ Nè nto ndjè koudja kake ang wa, ngon lo Marie ke ngokö Jacques ke Joses ke Jude ke Simon, ke ngakönanè isi horodjè té nèn ang wa? Mèdè toodè sa.

⁴ Jésus pa aredè, Prophète inga piti loou té toï, bè ndja mè béh té la horo ngaköè té ke mè kei té la ndja ninga piti kendé ang.

⁵ Jésus ase da tòkou koula nou ang, bè ndja ta kila dja dò dooudjé té ke ndjè rò toodjé kada kada, ke ta kòrou rò too lodè.

⁶ Mèa edji nya mbata dèdè do mèdè té ang. Nè ndja béh té dang dang ta tòdjoudè tar.

⁷ Jésus bardè dòkou gérè djo, nè nao nouladè djo djo, nè naredè tè ta kare ntouba ndildjé ke madjang.

⁸ Jésus ndedjidè ta koun né kada kao né ang, sè kake ndja kadaba. Ta koun mourou ang ke bòl ang, ta koun narè bòl té lodè ang.

⁹ Nè naredè ta kare doula ndar gòldè té, ke ta kao ke koubou djo ang.

¹⁰ Nè mpa naredè, Loou ke abidjé mè kei té kada, isidjé mè kei tén sar ïyaidjé béhn.

¹¹ Tokou béh ke ntaasè ke té ang, aséh dèdè mbeté ta ko tar losè, tokou ïyaidjé béhn etoundaidjé boum nange ke gòlsè té mbata tar nadji dodè té.

¹² Tokou ban dèdè dao mpa ke daka to tar lo dooudjé ta mbeté kedji né da ke madjang lodè.

¹³ Dèdè ntouba ndildjé ke madjang nya, dila oubou dò dooudjé té nya ke isi ke rò too, dèdè dòrou rò too lodè.

¹⁴ Mbaibé Hérode wo tarn lé mbata ri Jésus bar nya. Nè mpana, Jean ndjè da baptême leo téh mè bwa yo té, mbata yèn singa mongou ban da koula mèa té.

¹⁵ Mare dooudjé pana, Nto to Élie. Maredjé pana, Nè nto prophète tokou lo mare prophète ke leo.

¹⁶ Tokou Hérode wo tarn lé, nè mpana, Jean ke moudja gosè leo ï mbä nga.

¹⁷ Mbata Hérode ndja oula leo are dwaa Jean nilè kei koula té, mbata tar lo Hérodias, dènè lo Philippe ngoköè, mbata Hérode taa Hérodias to dènè la.

¹⁸ Mbata Jean pa are Hérode leo, Tar ndedji pana to tar loi ta taa dènè lo ngoköi ang.

¹⁹ Tokou ban mè Hérodias tooè sa nya, ndiki ta tòl Jean a nè nase ang.

²⁰ Mbata bel da Hérode mbata Jean, mbata nè ngeré Jean to doou ke gaté gaté ke madji toï, bana nè ngemè madji. Tokou nè no tar lo Jean mèa sangè nya, sa no tar la ke koukou.

²¹ Ndò ase ta kare Hérodias da né, ndò koudjou Hérode ase, a emëre laa, mmar nè tokou dooudjé la ke padjadjé ke mare tokou dooudjé ke Galilée té.

²² Tokou ngon lo Hérodias ke dènè téh arr dana laa, a are koukou Hérode nya ke ndjè ke ön sa mourou, mbaibé lé pa are ngon ke dènè lé, Edoudjoum né ke i ndiki a ma kari.

²³ Nè noubou yo nare ngon ke dènè lé, Né ke edoudjoum a ma kari, aséh béh ko lom ba ndiki ka mam nkai mari.

²⁴ Nè ntéh daka, nè mpa nare këndjè, Di a ma doudjou wa? Këndjè pana, Dò Jean, doou ke ndjè da baptême.

²⁵ Ngon lé aïngorou loshénè loshénè nao rò mbaibé té, mpana, Mam ndiki ta kari arem do Jean, doou ke ndjè da baptême, mè tokou sèmbé té loshénè.

²⁶ Mbaibé lé ongou dè nya, a mbata nè noubou yo mbä, ke mbata dooudjé ke ön sa mourou no deo ta mbeté tar lo ngon lé ang.

²⁷ Mbaibé oula ndjè pourou kada loshénè loshénè mpa narè ta dé ke do Jean ndjè da baptême. Nè nao ngange gòbou Jean mè kei koula té.

²⁸ Nè ndé ke dè mè tòkou sèmbé té, narè ngon ke dènè lé. Ngon lé ao né are kêndjè.

²⁹ Tokou ndjè kao go Jean té wo tar lé, dèdè ndé doun ninè ndoubè bwa té.

³⁰ Ndjè kouladjé tél mbona rò Jésus té, dèdè mpa darè né toï ke dèdè nda ke tar toï ke mpa dare dooudjé.

³¹ Nè mpa naredè, Edéidjé djao djisi ke kadadjè mè mou té, waaidjé ròsè ngadji. Mbata dooudjé baya dé ke tél tokou ban dèdè dase kön mourou ang.

³² Dèdè eléldè ta kao mè mou té loou ke doou goto ke té.

³³ Dooudjé wodè dèdè dao dao, dèdè ngerédè, tokou ban dooudjé ke béh toï aïngorou ao loou té ke nou, dèdè ntéh nou dongor.

³⁴ Tokou Jésus téh mè to té nè no dooudjé tokou baya. Nè ndiki ta da mè madji kedè mbata dèdè nto tokou lo batidjé ke ndjè kouldè goto. Nè nao ntòdjoudè né tokou baya.

³⁵ Tokou kade ndai mbä ndjè kao gè tédjé dé rò Jésus té, dèdè mpana, Loou nèn to mè mou, kade ndai mbä,

³⁶ Are dooudjé nèn ao ndòò aséh mè béh té ke ngosiba ta ndoko mourou mbata lodè ndja.

³⁷ Nè ntél mpa naredè, Sésè aridjédè mourou dön. Dèdè mpa darè, Ndikidjè ta kare ndoko mourou ke denier kòr djo ta karedè dön wa?

³⁸ Nè mpa naredè, Isidjé ke mourou ban wa? Abidjé woidjé. Tokou dèdè do mbä dèdè mpana, Mourou mi ke kaindji djo.

³⁹ Jésus pa aredè ta kare disi dang ke kotè dang dang do mou té.

⁴⁰ Tokou ban dèdè disi, maredjé isi dòdòkou dòdòkou, maredjé dòmi dòmi.

⁴¹ Nè noun mourou ke mi ke kaindji ke djon lé, nè naa loou ke dara, mmar tar ke madji dè té, nè nkai mourou lé dana nare ndjè kao gè tédjé ta kare dare dooudjén lé. Nè nkai kaindji dana naredè toï.

⁴² Dèdè toï dön mèdè ndan.

⁴³ Dèdè mbòn kese mourou dousou karè dòkou gérè djo ke kese kaindji to.

⁴⁴ Dèdè ke dön mouroun lé dooudjé dourou mi.

⁴⁵ Loshénè loshénè nè nare ndjè kao gè tédjé ao mè to té, dao dongor darè toura man té ke Bethsaïda tokou nè ndja nare dooudjé ke tokou baya ta kare dao béh.

⁴⁶ Gè té mpa naredè dao, nè nao do err té ta doudjou Allah.

⁴⁷ Tokou kade woei mbä, to ao do tokou man té, Jésus ndja isi nange.

⁴⁸ Nè nodè dao elél to ngeng mbata lél òkou deo lodè. Ngosiba ke do bakebé té nao ròdè té. Nè nao ndja dò tokou man té, nata ndaidè.

⁴⁹ Tokou dèdè doè nao ndja do man té, dèdè dedji to to ouma, dèdè dourouki.

⁵⁰ Mbata dèdè toï doè ke bel dadè nya. Loshénè loshénè nè mpa tar kedè, mpana, Aridjé mèsè isi dèkèkè, yèn to ma, ïyaidjé bel.

⁵¹ Nè nao ròdè té mè to té, lél eo. Mèdè ounda do biä nya.

⁵² Mbata dèdè ngeré gel tar mouroun lé ang mbata mèdè ngeng nya.

⁵³ Tokou dèdè dourou man mbä nga, dèdè ntéh nange té ke Génésareth, dèdè nto to kare kongo té.

⁵⁴ Tokou dèdè ntéh mè to té mbä nga loshénè loshénè dooudjé gerè.

⁵⁵ Dèdè daïngòrou béh té nou toï, dèdè dao doto dooudjé ke ndjè rò toodjé mè twa té lodè, dèdè dao kedè loou té ke do Jésus éh kendé.

⁵⁶ Loou toï ke nè nao tokou mè béh aséh mè tokou béh aséh mè ndoo, dao dongou dooudjé ke ndjè rò toodjé nata. Dèdè dao ndoudjè nya baa dèdè dase ta kòrou ta koubou la. Baa dèdè toï ke dòrou ta koubou la da dé madji.