Marəke 5 - Testament ke Siki 1960 (Kabba Laka)

¹ Dèdè ntéh toura tokou man té, nange té lo dooudjé ke Gadara.

² Gè té nè ntéh mè to té, doou ke isi ke ndii ke madjang téh kon dèbare té, ndé rò Jésus té.

³ Dooun lé to kon dèbare té, doou kada ase ta tèè ang, koulaa narè ase ta tòè ang tò.

⁴ Dèdè dilè kake ke ntòè ke koulaa narè gar baya, nè nti koulaa narè toï ke nè ntete kake ke dilè tò. Doou kada ase ta kotè ke singa ang.

⁵ Til toï ke kade toï nè nao nourouki kon dèbare té ke dò err té tò, ke nao ntounda rè ke err.

⁶ Tokou nè nao no Jésus nai deo bo eo, nè naïngòrou nongou mekedjé gèlè nò Jésus té.

⁷ Nè mpa ke tarr, Di a to horodjè té, i ke ma wa, Jésus Ngon lo Allah ke wota toï? Mam ndoudji ke ri Allah, edam are säm ang.

⁸ Mbata Jésus pa arè mbä, Etéh mè doou tén ke dang, i ndii ke madjang.

⁹ Jésus doudjè, Ri na na wa? Nè mpa nare Jésus, Rim tokou Bayabaya, mbata djèdjè nto to ke baya.

¹⁰ Nè ndoudjou Jésus nya ta kare ouladè mare loou té ang.

¹¹ Berredjé tokou baya ousa né kare err té nou.

¹² Ndildjé ke madjang doudjou Jésus nya, dèdè mpana, Ouladjè rò berredjé té, tokou ban djase ta kao mèdè té.

¹³ Jésus ndiki gè, ndildjé ke madjang téh, dao mè berredjé té. Berredjén lé ï ke do err té daïngòrou ke ngòrou dongou man. Dèdè déh ngosiba ke dourou djo, dèdè doei mè tokou man té.

¹⁴ Dooudjé ke ndjè ngem berredjén lé, dèdè daïngòrou mpa dare dooudjé ke tokou béh té ke ngan béh té to. Dooudjé dé ta ko tarn lé.

¹⁵ Dèdè ndé rò Jésus té, dèdè do doou ke ndjè ndii ke madjang ke leo lé, nè nisi ke koubou rè té, nè nto to mbe ang nga, bel dadè.

¹⁶ Dèdè ke do Jésus da né nèn lé, dèdè ntòdjou gel tar lo doou ke isi ke ndii ke madjang ke leo, ke gel tar lo berredjé tò.

¹⁷ Dèdè ndoudjou Jésus nya ta kare ao ke dang nange té lodè.

¹⁸ Tokou Jésus ao mè to té mbä, doou ke ndii ke madjang to mèa té leo doudjou Jésus nya ta kao sa.

¹⁹ Jésus mbeté, nè mpa narè, I ao kei loi, epa are ndjè bokoradjé loi tokou né ke Mbaibé Seigneur da mbata loi, deo di a nda mè madji sei.

²⁰ Nè nao mpa ke daka béh Décapole né ke boui ke Jésus da mbata la, mè dooudjé toï ounda do biä.

²¹ Tokou Jésus tél gange man ke to, ntéh toura man té, dooudjé tokou baya mbona sa. Nè néh kare tokou man té.

²² Mbai kada ke kei Allah té dé, ria na Jaïrus, tokou nè no Jésus nè noso nange no gòlè té.

²³ Nè ndoudjè nya, mpana, Ngon ke dènè lom dé ngosiba ta kwoei. Mam ndiki ta kari dé ila dji dè té, tokou ban rò too la ase ta goto ke nè na kisi tébe.

²⁴ Jésus ao sa. Dooudjé ke tokou bayan lé dao gè té mbona sa.

²⁵ Dènè kada éh tén ke rò too mese dè bal dòkou gérè djo.

²⁶ Nè ninga ongou nya dji ndjè koumadjé té, ntoudjou narè la toï mbä nga, ke nè ndé madji ngadji ang, bana rò too la dé madjang wota.

²⁷ Tokou no tar lo Jésus nè ndé horo dooudjé té go Jésus té, nè nòrou koubou lo Jésus.

²⁸ Mbata nè mpana, Tokou ma mase kòrou koubou la ba rò too lom a goto.

²⁹ Loshénè loshénè mese gange mbä nga, bana nè ngeré mè rè té rò too la goto.

³⁰ Mbata Jésus geré mèa té ndja singa téh rè té mbä, loshénè loshénè nè ntourou rè horo dooudjé té, nè mpana, Doou di a òrou koubou lom wa?

³¹ Ndjè kao gè tédjé tél pa arè, Wo dooudjé tokou baya baya mbona sei, ase pana, Doou di a òroum wa?

³² Nè ntourou rè ta ko doou ke da nèn.

³³ A dènè geré né ke da mèa té mbä, ndé ke bel ke rè isa, noso no gòl Jésus té, nè mpa narè tar ke tokoro toï.

³⁴ Jésus pa arè, Ngon ke dènè, ko mè té loi da ròi madji mbä nga, ao ke mè woul ke rò ke madji.

³⁵ Tokou Jésus nai ao pa tar, dooudjé ke mè kei té lo mbai dé pana, Ngoni woei mbä. Mbata di a i djòkou ndjè tòdjou tar bai wa?

³⁶ Tokou Jésus wo tar ke dèdè mpa, Jésus pa are mbai ke kei Allah té, Eda bel ang, wo mei té kadaba.

³⁷ Jésus are mare doou ao gè té ang, sè Pierre ke Jacques ke Jean ngokö Jacques.

³⁸ Tokou nè ntéh ta kei té lo mbai ke kei Allah té, nè no ki ke dèdè ke no ke ongou nya.

³⁹ Tokou nè nao mè kei té, nè mpa naredè, Mbata di a ouridjé ki enòidjé ke ongou bé wa? Ngon nèn woei ang, nè ntibi.

⁴⁰ Dèdè nkoukè. Jésus aredè ntéh daka toï, nè nare bò ngon ke këndjè ke ndjè kao gè tédjé dao sa mè kei té loou ke ngon to té.

⁴¹ Jésus waa dji ngon lé, mpa narè, Talitha cumi, yèn pana, Ngon ke dènè, ma mpa mari, ï tarr.

⁴² Loshénè loshénè ngon ke dènè ï tarr, nao ndja, mbata man la ase dòkou gérè djo. Loshénè loshénè mèdè ounda do biä nya.

⁴³ Jésus ndedjidè nya ase kare doou kada geré tar nèn ang. Nè mpa naredè ta kare dare mourou ngon ke dènè lé.