Marəke 4 - Testament ke Siki 1960 (Kabba Laka)

¹ Jésus tél ao tòdjou tar dooudjé kare tokou man té. Dooudjé tokou baya ke dousou loou mbòna sa, tokou ban nè nao mè to té, nisi né mè man té. Dooudjé ke tokou baya disi ta kongo té.

² Nè ntòdjoudè né baya ke tar gousou, mè tar té ke nè mpa naredè, nè mpana,

³ Woidjé, doou kada ao ta doubou kandé ko.

⁴ Tokou nè nao ndoubou ko mare kandé ko gaï mbòr deo té, eldjé dé dèdè dön ko.

⁵ Ke marè oso do err té, loou ke nange ourou ke té nya ang, loshénè loshénè ntéh mbata nange ourou nya ang.

⁶ Tokou kade òsou boui a noungè, ntoutou mbata ngirè ourou nya ang, nè noei.

⁷ Marè oso horo konn té, konn lé dé tokou nya siri dè té, nè nan ang.

⁸ Marè oso nange té ke madji, dèdè ntéh ndou tokou madji, kada kada an dòmouta, marè an dòmisä, marè an dòdòkou.

⁹ Jésus pana, Nè ke néh ke mbi ke ka ko, ase kare nè no.

¹⁰ Tokou Jésus éh ke kadèba, dèdè ke disi sa ngosiba ke dèdè dòkou gérè djo, dèdè ndoudjè mbata tar gousou.

¹¹ Nè mpa naredè, Daresè ta kare egeridjé tar béh kö lo Allah ke yarè, mbata lo dèdè ke déh daka mpa né ke tar gousou daredè.

¹² Mbata dèdè do dase ta geré gelè ang, tokou dèdè do dase ta ko ba, dèdè ngeré gelè ang, mbata mare ndò dèdè mbeté deo lodè baa ta kare dïya né ke madjang lodè.

¹³ Jésus pa aredè, Sésè egeridjé tar gousou nèn ang wa? Tokou ban sésè asidjé ta geré tar gousou toï da wa?

¹⁴ Doou ke doubou kandé ko ndoubou tar lo Allah.

¹⁵ Dèdè ke mbòr deo té, loou ke ndoubou tar ke madji kendé, tokou dèdè do tar, loshénè loshénè Satan dé òrou tar ke madji ke ndoubou mèdè té.

¹⁶ Tokou ban dèdè ke ndouboudè do err té, tokou dèdè do tar ke madji, loshénè loshénè doun ke koukou.

¹⁷ Mbata gòl tar lé to mèdè té ang dèdè ngem ndò nya ang, gè té tokou né ongou aséh ngätar dé mbata tar nèn, loshénè loshénè dèdè doso.

¹⁸ Maredjé to to dèdè ke ndouboudè horo konn té, to to dèdè ke do tar ke madji,

¹⁹ Goukoudang koula lodè ke ta da né lodè nange nèn, ke kere ka né kinga, ke boo mare né dé mè té siri tar lé a an ang.

²⁰ Yèn to dèdè ke ndouboudè nange té ke madji, dèdè ke do tar ke madji doun mèdè té a an, kada kada an dòmouta, marè an dòmisä, marè an dòdòkou.

²¹ Jésus pa aredè, Doou oun lampe dé ta kiyaa kò karè té aséh kò twa té wa? Doun ta kounda do kake té ke tarr ang wa?

²² Mbata né toï ke iyaa mbä ase ta téh daka, ke né ke yarè a téh daka lokarè té.

²³ Tokou doou éh ke mbi ke ka ko, ase kare nè no.

²⁴ Jésus pa aredè, Ngemidjé madji né ke woidjé, dèdè da kòdjousè deo kadaba tokou mare ke òdjidjédè to, dèdè da karesè wota.

²⁵ Mbata nè ke néh ke né da karè marè dè té, nè ke néh ke né ang, lé né ke to dja té ka da taa.

²⁶ Nè mpana, Béh ko lo Allah to tokou ban, tokou doou ao ta doubou kandé ko nange,

²⁷ Nè nao nto tilti, nè nï kade, kandé ko téh ndou tòkou, doou geré deoè ang.

²⁸ Nange an ke mèa ndja, dongor kam, gè té kaadè, goukoudang kandé ndakiri téh kaadè té.

²⁹ Tokou kandè tòkou mbä, loshénè loshénè doou ao ke kiaa mbata ndò koudja kandé ko ase.

³⁰ Jésus pana, Djèdjè ngeré béh ko lo Allah to tokou di wa, aséh djèdjè dja geré tòdjou tar la ke tar gousou di wa?

³¹ Nè nto tokou kandé sénevé kada, tokou ndoubè nange nto së ba, mare kandé kodjé toï ke nange nèn wotè.

³² Gè té ndoubè nange mbä, nè ntéh nè ndou boui wota mare kandé kodjé toï, nto barkem nya, tokou ban eldjé ke ao tarr ase kisi ndilè té.

³³ Nè mpa naredè ke tar gousou ban nya, tokou dèdè dase ta ko.

³⁴ Nè mpa tar naredè ang tokou nè mpa tar gousou ang, tokou nè nisi ke ndjè kao gè tédjé ke kadèba, nè ntòdjoudè gel tar gousou tesèrè.

³⁵ Ndè té ke nou tokou kade woei mbä, Jésus pa aredè, Aredjè djao toura man té.

³⁶ Gè té dèdè dïya dooudjé ke baya baya, dèdè dwèè ke mè to té tokou nè néh ke tén. Mare to éh ke tén to.

³⁷ Lél ke tokou boui dé oula, man ï ongou mè to té tokou ban man ao dousou to.

³⁸ Jésus to koutou to té, ntibi do koubou té, dèdè ndolè mpa darè, Ndjè tòdjou tar, mei tooi ang tokou djèdjè djoei wa?

³⁹ Nè nï tarr ndange lél lé, mpa nare tòkou man. Eo, ïya. Lél gange, ke loou to dèkèkè.

⁴⁰ Jésus pa aredè, To di baa isidjé ke bel tokou ban wa? Ko mè té losè goto wa?

⁴¹ Bel dadè ngeng wota, dèdè mpa horodè té, Yèn to doou di wa ke lél ke man wo tar la tokou ban?