Marəke 3 - Testament ke Siki 1960 (Kabba Laka)

¹ Jésus tél ao mè kei Allah té, doou kada éh nou ke dja woei mbä nga.

² Dèdè dao daa Jésus nya mbata dèdè ndiki ta ko tokou nè na kòrou rò too lo doou ndò sabbat té, mbata dèdè ndiki ta toula dè.

³ Jésus pa are doou ke dja woei, Ï horodè té.

⁴ Nè mpa naredè, Tar ndedji pana ase ta da madji ndò sabbat té, aséh ta da madjang wa? Ta kadji doou aséh ta tòl doou? Dèdè disi yim.

⁵ Jésus aadè kada kada ke ongou, mèa tooè nya mbata lo mèdè ngeng, nè mpa nare dooun lé, Ndòdjou dji. Dooun lé ndòdjou dja tokou ban dja dé madji.

⁶ Pharisiendjé ao daka, loshénè loshénè dèdè ke Hérodiendjé dao dom tar mè naaté ta sange deo ta tòlè.

⁷ Jésus ke ndjè kao gè tédjé dao tokou man té, ke dooudjé baya ke nange té ke Galilée ao gè té.

⁸ Dooudjé baya ke nange té ke Judée ke Jérusalem té ke Idumée ke maredjé toura Jourdain té, ke maredjé ngosiba ke Tyr ke Sidon, tokou dèdè do né toï ke nè nda, dèdè dao rè té tò.

⁹ Nè mpa nare ndjè kao gè tédjé ta kare ngebè ke to mbata dooudjé ndiki ta dousou na sa ngosiba.

¹⁰ Mbata nè nòrou rò too lo dooudjé nya, tokou ban dèdè toï ke disi ke rò too ndé ngosiba sa dase ta korè.

¹¹ Tokou ndildjé ke madjang woè, dèdè ntoso nange nòè té, dèdè mpa ke tarr, I to ngon lo Allah.

¹² Jésus ndangedè ngeng ta kare dèdè mpa tar la dare dooudjé ang.

¹³ Jésus al do err té ke nè mmar dèdè ke nè ndikidè, dèdè dao rè té.

¹⁴ Nè mmardè ke daka dòkou gérè djo, tokou ban dèdè dase ta kisi sa, ke nè nase kouladè ta karedè ntòdjou tar ke daka.

¹⁵ Nè naredè tè ta kare ntouba ndildjé ke madjang.

¹⁶ Nè mmar Simon ke nè nounda ria na Pierre,

¹⁷ Nè mmar Jacques, ngon lo Zébédée, ke Jean ngokö Jacques. Nè nounda ridè Boanergès, ri nèn pana, Dooudjé ke to tokou lo ndi ke ndange.

¹⁸ Nè mmar André ke Philippe ke Barthélemy ke Matthieu ke Thomas ke Jacques, ngon lo Alphée, ke Thaddée ke Simon Cananite,

¹⁹ Ke Judas Iscariot, doou ke ndjè ndoko Jésus.

²⁰ Goukoudang Jésus ao kei la. Dooudjé baya tél mbòna tokou ban dèdè dase kon mourou ang.

²¹ Tokou ndjè bokoradjé la wo tar nèn, dèdè dao ta kwèè mbata dèdè mpana, Dè tourou mbä.

²² Ndjè da maketourou ndedjidjé ke ï Jérusalem té, dèdè ndé mpana, Nè néh ke Béelzébul, nè ntouba ndildjé ke madjang deo mbai té lo ndildjé ke madjang.

²³ Jésus bardè ndé rè té, mpa naredè ke tar gousou, Deo di wa Satan a touba Satan wa?

²⁴ Tokou dooudjé béh ko kada kaina mbä, béh ase ta to ke madjè ang.

²⁵ Tokou dooudjé kei kadaba kaina mbä, kei a to ang nga.

²⁶ Tokou bo Satan ï mbeté rè ndja a kai rè mbä, nè na karr ang, tar la a keo.

²⁷ Doou kada ase ta kao mè kei té lo ndjè singa ta toudjou né la ba ang, tokou nè nto ndjè singa dongor ba, gè té goukou nase toudjou kei la.

²⁸ Tokoro ma mpa maresè, né ke madjang toï ke ngan lo dooudjé da, ke tar sä ke madjang toï ke dooudjé pa, Allah a kïya toï.

²⁹ A doou ke pa tar sä ke Ndil ke madji toï dase kïya madjang la ngadji ang, a saria to dè té ke ndò ke ndò.

³⁰ Mbata dèdè mpana, Nè nisi ke ndii ke madjang.

³¹ Kö Jésusdjè ke ngaköèdjé ndé, dèdè darr daka, dèdè doula ta bar Jésus.

³² Dooudjé baya baya isi mbòrè té, dèdè mpa darè, Köindjè ke ngaköidjé darr daka dao mmari.

³³ Nè ntél ke tar naredè, nè mpa, Endjè ke ngakömdjé to na wa?

³⁴ Jésus aa loou ke mbòrè té dèdè ke disi ngosiba sa, nè mpana, Woidjé, yèn to endjè ke ngakömdjé.

³⁵ Doou ke da né ke Allah ndiki, nè nto to ngoköm ke dingao ke kònanem ke dènè ke endjè.