Marəke 15 - Testament ke Siki 1960 (Kabba Laka)

¹ Loshénè loshénè ke sindò tokou ndjè kòrdjé ke tokou dooudjé ke ndjè da maketourou ndedjidjé ke dooudjé toï ke ndjè gange sariadjé, dèdè mbòna ta ndedjina. Dèdè nto Jésus, dao sa ta karè Pilate.

² Pilate doudjè, I to Mbaibé lo Juifdjé wa? Jésus tél ke tar pa arè, I pa ban.

³ Tokou ndjè kòrdjé ao toula dè ke tar dang dang.

⁴ Pilate tél doudjè pana, I tél ke tar kada ang wa? Wo dèdè ntoula dòi ke tar baya.

⁵ Jésus tél mare tar kada ang, tokou ban mè Pilate edji.

⁶ Ndò ke to ndò ke bo, Pilate òrou ndjè kei koula kada aredè, doou kada ke dèdè ndikè.

⁷ Doou kada éh horo dooudjé té mè kei koula té, dèdè ke ntòl mare dooudjé ndò ke dèdè dï ta mbeté tar lo ndjè ko béhdjé, ri doou nèn na Barabbas.

⁸ Dooudjé ke tokou baya bayan lé dé rò Pilate té, ndoudjè ta da tokou nè nda leo.

⁹ Pilate tél ke tar pa aredè, Sésè ndikidjé ta karem mòrou Mbaibé lo Juifdjé maresè wa?

¹⁰ Mbata nè ngeré tòkou ndjè kòrdjé da mè mbata tar lo Jésus, mbata yèn dèdè dwaa Jésus darè.

¹¹ Tòkou ndjè kòrdjé ndedji dooudjé ke baya bayan lé ta kare òrou Barabbas aredè tourou Jésus té.

¹² Pilate tél ke tar mare pa aredè, Tokou ban sésè ndikimdjé ta karem da di ke nè ke ebarèdjé Mbaibé lo Juifdjé wa?

¹³ Dèdè ntél mpa ke tarr, Etòlè dò kake dèse té.

¹⁴ Pilate pa aredè, Mbata di wa, madjang di a nda wa? Dèdè mpa ke tarr wota, Etòlè dò kake dèse té.

¹⁵ Tokou ban Pilate ndiki ta da baa kare mèdè woul. Nè nòrou Barabbas naredè, gè té a nè nounda Jésus ke djoula, nè nwèè naredè ta kare ntòlè dò kake dèse té.

¹⁶ Ndjè pouroudjé ao sa ke mè ndooko té ke kare kei té, loou ke to kei gange saria, ke dèdè mbòn ndjè pouroudjé lodè toï.

¹⁷ Dèdè doulè koubou ndörè, ke dèdè doudjou djòkedò konn doula dè té.

¹⁸ Dèdè dao ntarè laphia, dèdè mpana, Laphia Mbaibé lo Juifdjé.

¹⁹ Dèdè dounda dè ke kòbou, dèdè ntiwëré kèmè té, dèdè dongou mekedjé gòldè nange nwalè.

²⁰ Tokou dèdè nkoukè mbä nga, dèdè dòrou koubou ndörè rè té. Dèdè ntél doula koubou la ndja rè té. Dèdè dao sa daka ta tòlè dò kake dèse té.

²¹ Doou kada, Simon ke Cyrène, to bò Alexandre ke Rufus, nè nï ndòò nao ntél ke béh, dèdè dwèè ta karè noto kake dèse lo Jésus.

²² Dèdè ndé sa loou té ke ria na Golgotha, yèn pana, Loou singa dò.

²³ Dèdè ndiki ta karè vin ke dèdè mpolè ke botè myrrhe, nè ntaa ang.

²⁴ Dèdè ntòlè dò kake dèse té, dèdè nkaina koubou la horodè té. Dèdè ndòò né mbadi ta ko sè doou di baa a bou wa.

²⁵ Kade ï dél ase mouta, dèdè ntòlè dò kake dèse té.

²⁶ Maketourou ke dèdè ntò dò kake té pana mbata di a dounè dè wa, maketourou nèn pana, Mbaibé Lo Juifdjé.

²⁷ Dèdè ntòl ndjè boukoudjé djo sa deo kadaba, kada ke dò dji kolè té ke marè ke dò dji gèlè té.

²⁸ Tokou ban tar maketourou lo Allah dé to tar ke tokoro, Dèdè ntourè to doou ke ndjè mbeté tar ndedji.

²⁹ Dèdè ke dao ndai, dèdè ntadjè, dèdè ntouka dòdè, dèdè mpana, Héh, i ke pana a toudjou tòkou kei Allah a tél da ndò mouta,

³⁰ Adji ròi ndja, edisi ïya dò kake dèsen lé.

³¹ Tokou ban tokou ndjè kòrdjé koukè to horodè té, dèdè mbòna ke ndjè da maketourou ndedjidjé, dèdè mpana, Nè nadji mare dooudjé, nè nase kadji rè ang.

³² Are Christ Mbaibé lo Juifdjé disi ïya dò kake dèse loshénè, aredjè djo baa dja ko mèdjè té. Dèdè ke déh dò kake dèse té mbòrè té, dèdè ntadjè tò.

³³ Tokou kade arr dana ase misä, loou ndoul dò nange té toï nderèng kade tél djikada.

³⁴ Ke kade tén Jésus pa ke tarr, pana, Éloï, éloï lama sabachthani? yèn pana, Allah lom, Allah lom, mbata di a i ïyam nga wa?

³⁵ Maredjé ke horodè té ke isi mbòrè té, tokou do tar nèn, dèdè mpana, Woidjé, nè nao mmar Élie.

³⁶ Doou kada aïngorou, tokou ban nongou vin ke mase kougal té dousou, ntò ke kòbou narè Jésus ta karè naih, nè mpana, Ïyaidjé, djo tokou Élie a dé ta kòrè.

³⁷ Jésus ourouki nya, nè nouwa rè mbä.

³⁸ Tòkou koubou ke mè tòkou kei Allah té tir djo, ï tarr tir nderèng òrou nange.

³⁹ Tokou ndjè ngem ndjè pouroudjé ke arr no Jésus té wo Jésus ouwa rè ban mbä, nè mpana, Tokoro, doou nèn to ngon lo Allah.

⁴⁰ Dènèdjé éh kendé to, dèdè darr dèbè eo ta ko tar, horodè té Marie Magdala ke Marie kö Jacques ke ngadji ke Joses, ke Salomé déh kendé.

⁴¹ Dèdè nèn, tokou Jésus éh Galilée té, dèdè dao ndja gè té ke dèdè dao nda sa, ke mare dènèdjé baya ke ao sa Jérusalem leo.

⁴² Tokou kade woei mbä, mbata to to ndò da né ke dongor ndò sabbat,

⁴³ Joseph ke Arimathée dé, nè nto ndjè kemkarè ke madji horo ndjè gange sariadjé té, nè ndja ngebe mè béh kö lo Allah to. Nè nao rò Pilate té ke bel ang, ndoudjè mbata nin Jésus.

⁴⁴ Pilate edji tokou nè no Jésus woei mbä loshénè tokou ban. Pilate bar ndjè ngem ndjè pouroudjé, ndoudjè tokou Jésus woei loshénè mbä wa.

⁴⁵ Tokou nè no ndjè ngem ndjè pouroudjé pa tokoro, nè nïya nin Jésus nare Joseph.

⁴⁶ Joseph ndoko koubou lin, nòrou nin Jésus, nè nkè ke koubou lin lé. Nè ndoubè mè bwa yo té ke dourou mè tokou err té. Nè nila err ta bwa yo tén.

⁴⁷ Marie Magdala ke Marie ko Joses, dèdè do bwa ke dilè kendé.