Marəke 14 - Testament ke Siki 1960 (Kabba Laka)

¹ Nai ndò djo dongor ndò Pâque ke ndò kon mourou ke nda ke oum ang, tokou ndjè kòrdjé ke ndjè da maketourou ndedjidjé nsange deo ta kwaa Jésus ke gousou ta tòlè.

² Mbata dèdè mpana, Wèèdjé ndò mourou tén ang, na kare dooudjé ounda boula.

³ Tokou Jésus éh Béthanie ke kei lo Simon ndjè bandji, tokou Jésus ao ön mourou, dènè kada dé ke kou albatre ke dousou ke oubou yambo ke madji nya, ke ndoko ke narè nya. Dènèn lé to kou, nongou oubou yambo lé do Jésus té.

⁴ Mè mare dooudjé toodè, dèdè mpana, Mbata di a ntoudjou yambo lé ba wa?

⁵ Mbata doou ase labe yambon lé kinga né narè wota denier kòr mouta kare dangetédjé. Dèdè dao nanè ke dènè lé.

⁶ Jésus pa, pana, ïyèdjé, mbata di a arèdjé ongou wa? Nè nda né ke madji narem.

⁷ Mbata dangetédjé éh kesè ke ndò toï, ke ndò toï tokou sésè ndikidjé asidjé da madji kedè. Ma misi kesè ndò toï ang.

⁸ Dènèn lé da né ke nè nase ta da, nè nongou oubou yambo dom té dongor baa ta doubou ninim.

⁹ Tokoro ma mpa maresè, loou toï ke nange nèn, loou ke dèdè ntòdjou tar ke madji lo Allah, dèdè da pa tar né ke dènèn lé da mbata kedji do tar té la.

¹⁰ Judas Iscariot, kada lodè ke to dòkou gérè djo, ïyadè ao rò tokou ndjè kòrdjé té ta pa tar kwaa Jésus karedè.

¹¹ Tokou dèdè do yèn lé, dèdè disi ke koukou, dèdè mpa darè ta karè narè. Judas ao sange deo ta kwaa Jésus karedè.

¹² Ndò té ke dongor ta kon mourou ka nda ke oum ang, tokou dèdè ntòl bati Pâque, ndjè kao go Jésus té pa arè, I ndiki ta kare djao da baa ta da né kon mourou Pâque wa?

¹³ Nè noula ndjè kao gè té djo, nè mpa naredè, Abidjé béh, doou kada ke oto djo man a kingasè deo bo, sésè abidjé gè té.

¹⁴ Ke loou ke nè nao ke mè kei té epaidjé are ndjè kei, Ndjè tòdjou tar pana, kei mbaa lom to da wa, loou ke ma kon mourou Pâque ke ndjè kao gom tédjé wa?

¹⁵ Nè ndja na tòdjousè tokou kei ke do marè té, lé ke dèdè nda ke twa ke table toï nga, sésè edaidjé né mbata lodjè nou.

¹⁶ Ndjè kao gè tén lé téh, dèdè dao béh. Dèdè dinga né deo kadaba tokou Jésus pa aredè. Dèdè nda mourou Pâque.

¹⁷ Tokou kade woei mbä, Jésus dé ke ndjè ke dòkou gérè djon lé.

¹⁸ Tokou dèdè disi dao dön mourou, Jésus pana, Tokoro ma mpa maresè, doou kada horosè té a ndokom, doou kada ke ön mourou sem.

¹⁹ Ongou ao dadè ke dèdè ndoudjè kada kada, Sè ma wa?

²⁰ Jésus pa aredè, Doou kada ke horosè té ke dòkou gérè djon lé, nè ke noukou mourou sem mè kaa té naaté.

²¹ Mbata lo Ngon lo doou a kao deo kadaba tokou maketoutou lo Allah pa tar la, a ongou a ko doou ke ndoko Ngon lo doou. To madji kare doudjou dooun lé ang.

²² Tokou dèdè dön mourou Jésus oun mourou, mmar tar ke madji dè té, nè nkai naredè, nè mpana, Etaaidjé, yèn to rom.

²³ Nè noun ngonarè, tokou nè nda woio mbä nè naredè, dèdè toï daih kendé.

²⁴ Nè mpa naredè, Yèn to mesem mbata tar kwaana medji ke siki, mesem ke ongou nange mbata dooudjé baya.

²⁵ Tokoro ma mpa maresè, ma ma kaih man kandé kake ndouou marè ang nga, nderèng ndè tén lé ke ma maih ke siki mè béh kö té lo Allah.

²⁶ Tokou dèdè dòsou pa Allah kada dèdè ntéh daka, dèdè dao kare err Olivier té.

²⁷ Jésus pa aredè, Sésè toï, mèsè a toosè sem mbata maketourou lo Allah pana, Ma ma kounda ndjè koul batidjé ke batidjé a särèna ke loou dang dang.

²⁸ Goukoudang ma mï, ma kao Galilée té dongor karesè.

²⁹ Pierre pa arè, Tokou mè dooudjé toï toodè sei, ma mem a toom sei ang.

³⁰ Jésus pa arè, Tokoro ma mpa mari, bokonè ke tilti nèn ndja, dongor könra a no gar djo, i a mbetem gar mouta.

³¹ Pierre pa tar ke tarr wota, Tokou to tar lom ta kwoei sei, ma ma mbeti ang. Dèdè toï mpa tar tokou ban.

³² Dèdè ntéh loou té ke ria na Gethsémané. Nè mpa nare ndjè kao gè tédjé, Isidjé nèn, tokou ban mam ndoudjou Allah.

³³ Nè mmar Pierre ke Jacques ke Jean ta kao sa, a mèa ounda dò biä nya ke ongou dousou mèa.

³⁴ Nè mpa naredè, Mem isi ke ongou nya ngosiba ta kwoei. Isidjé nèn, ngemidjé.

³⁵ Nè ndai ngadji noso nange, ndoudjou Allah mbata tokou ase ta dé tokou ban kare ndò nèn ndai dè té.

³⁶ Nè mpana, Abba, Bòi, i ase da né toï, òrou ngonarè nèn dom té, eda né ke mam ndiki ang, a eda né ke i ndja ndiki.

³⁷ Nè ndé nodè dao ntibi, Jésus pa are Pierre, Simon ao tibi wa? Ase ta kisi tarr ngadji ang wa?

³⁸ Ngemidjé edoudjidjé Allah baa a kosoidjé né kere té ang, mbata ndii ndiki tokoro, a da rò isi ke singa ang.

³⁹ Nè ntél nao ndoudjou Allah, nè mpa tar deo kadaba tokou nè mpa dongor.

⁴⁰ Nè ntél mare bai, nodè dao ntibi mbata bi dadè nya, ke dèdè ngeré ta tél ke tar karè ang.

⁴¹ Nè ntél ndé gar mouta, nè mpa naredè, Ao tibidjé ao waaidjé ròsè bai wa? Asenga, ndè asenga, dwaa Ngon lo doou dare ndjè né da ke madjangdjé.

⁴² Ïdjé tarr, djao, woidjé ndjè ndokom ao dé ngosiba.

⁴³ Loshénè loshénè tokou nao mpa tar, Judas dé, doou kada ke horodè té ke to dòkou gérè djo. Dooudjé dé sa baya ke kiaa ke kake, dèdè ke tokou ndjè kòrdjé ke ndjè da maketoutou ndedjidjé ke tokou dooudjé douladè.

⁴⁴ Doou ke ndjè ndoko Jésus aredè né tòdjou, nè mpana, Doou ke mam nto mbia, yèn a to nè, wèèdjé, abidjé sa ao ngemèdjé.

⁴⁵ Tokou Judas dé, nè nao rò Jésus té bashénè ba, nè mpa, Ndjè tòdjou tar. A nè nto mbia.

⁴⁶ Dèdè dwaa Jésus, dèdè dao sa.

⁴⁷ Mare kada lodè ke arr ngosiba, òrou kiaa la touka mbi bere lo mbai lo ndjè kòrdjé gange.

⁴⁸ Jésus pa aredè, Sésè edèidjé ao sangemdjé tokou ndjè boukou ke kiaa ke kake ta kwaam wa?

⁴⁹ Mam ntòdjousè tar ke ndò toï mè tokou kei Allah té a sésè waamdjé ang. Are nèn lé dé tokou ban ta kare maketourou lo Allah ase ta dé tar ke tokoro.

⁵⁰ Dèdè toï dïyè, daïn.

⁵¹ Mare basä ao go Jésus té, ntò gotong rè té ba, dèdè dwèè.

⁵² Nè nïya koubou gotong, naïn ke rè ba.

⁵³ Dèdè dao ke Jésus rò mbai lo ndjè kòrdjé té. Tokou ndjè kòrdjé ke tokou dooudjé ke ndjè da maketourou ndedjidjé, dèdè mbòna rò mbai té nou.

⁵⁴ Pierre ao gè té ngosi ang, nao nderèng mè ndooko té lo mbai lo ndjè kòrdjé. Nè nisi ke padja ta pourou té, nao ndibi pourou.

⁵⁵ Tòkou ndjè kòrdjé ke dooudjé toï ke gange saria, dèdè nsange tar nadji ke dò Jésus té ta tòlè. Dèdè dinga mare tar ang.

⁵⁶ Mbata dooudjé tokou baya pa tar ngem dò Jésus té, tar lodè to naaté ang.

⁵⁷ Maredjé ï, dèdè mpa tar ngem dò Jésus té, mpana,

⁵⁸ Djèdjè djo nè mpana, Ma ma toudjou tokou kei Allah lé ke dooudjé da ke djidè, ke ndò mouta a ma da marè ke dji doou da ang.

⁵⁹ Yèn ka tar lodè to asena ang.

⁶⁰ Mbai lo ndjè kòrdjé ï horodè té, doudjou Jésus, pana, I tél ke tar kada ang wa? Yèn to di a dèdè dao mpa dòi té wa?

⁶¹ Jésus isi tè moundou, ntél ke tar kada ang. Mbai lo ndjè kòrdjé tél doudjè tar, I to Christ, ngon lo Allah ke dao mpitè wa?

⁶² Jésus pana, Mam nto, sésè a koidjé Ngon lo doou isi do dji kòl té ke singa lo Allah, ke ao dé ke ndi ke il dara.

⁶³ Mbai lo ndjè kòrdjé tir koubou la, nè mpana, Djèdjè ndiki mare ndjè pa tar nadji mbata di wa?

⁶⁴ Woidjé tar sä ke nè mpa. Mèsè pana di wa? A dèdè toï ngange saria yo dè té.

⁶⁵ Maredjé ao tiwëré kèmè té, dèdè dao nto kèmè, dèdè doundè, dèdè mpana, Epa ke daka. Padjadjé wèè are doundè.

⁶⁶ Tokou Pierre éh mè ndooko té kare kei té, ngonlokisi ke dènè kada lo mbai lo ndjè kòrdjé dé.

⁶⁷ Tokou nè no Pierre ao dibi pourou, nè nèè, nè mpana, I ndja ke Jésus ke Nazareth tò.

⁶⁸ A Pierre mai pana, Tar ke epa mam ngeré ang, mam ngeré gelè ang. Nè ntéh mè ndooko té a könra nò.

⁶⁹ Ngonlokisi ke dènèn lé woè, ao pa are dèdè ke darr ngosiba, Mare nèn to to doou kada lodè.

⁷⁰ Pierre tél mai. Gè té ngadji dèdè ke darr ngosi, dèdè mpa dare Pierre, Tokoro i to kada lodè mbata i to to doou ke Galilée.

⁷¹ Nè nao ntadji nè ndja ke nao noubou yo, Mam ngeré doou ke ao epaidjé tar la nèn ang.

⁷² Loshénè loshénè könra no gar djo. Pierre, mèa olè do tar té ke Jésus pa arè, Dongor könra nò gar djo i a mbetem gar mouta. Tokou nè nedji tarn lé a nò.