Marəke 11 - Testament ke Siki 1960 (Kabba Laka)

¹ Tokou dèdè ndé ngosiba ke Jérusalem, ngosi ke Bethphagé ke Béthanie, ke err Olivier, Jésus oula ndjè kao gè té djo.

² Nè mpa naredè, Abidjé béh té ke to nòsè té. Loshénè loshénè tokou a téhdjé béh té, a koidjé ngon kororo ke ntòè, ke nai doou kada isi dè té ang bai. Etoutèdjé, edéidjé sa.

³ Tokou mare doou doudjousè, Mbata di a edaidjé nèn wa? Epaidjé pana, Mbaibé Seigneur ndikè, ke loshénè loshénè nè na koula nè bai.

⁴ Dèdè dao nou, dèdè do ngon kororo ke ntòè daka ta ndooko té, dèdè ntoutè.

⁵ Dooudjé ke arr nou dèdè mpa kedè, Sésè edaidjé di wa, etoutidjé ngon kororo mbata di wa?

⁶ Dèdè mpa daredè deo kadaba tokou mare ke Jésus pa. Dèdè dïyadè dare dao sa.

⁷ Dèdè ndé ke ngon kororo dare Jésus, dèdè dongou koubou lodè do kororo té ke Jésus isi dè té.

⁸ Dooudjé tokou baya nadji koubou lodè deo bo, ke maredjé tete kam kake ke ndoo, dèdè dongou deo bo.

⁹ Dèdè ke dao kèté ke dèdè ke dao goukou, dèdè mpa ke tarr, Hosanna. Madji éh ke nè ke ndé ke ri Mbaibé Seigneur.

¹⁰ Madji éh ke béh kö lo bòdjèdjè David ke a dé. Hosanna ke dara wota toï.

¹¹ Jésus ao ke Jérusalem, nè nande tokou kei Allah té. Gè té no né toï mbä nga, mbata kade ao woei, nè nao ke Béthanie ke dèdè dòkou gérè djo.

¹² Gè té ndò kada, tokou dèdè dao ntéh Béthanie, boo dè.

¹³ Tokou nè no deo eo kake toungoutisa ke kamè, nao mbata ko tokou kandè to. Tokou nè ntéh kaken lé, nè no kamè ba mbata to nai kan la ang bai.

¹⁴ Jésus pa ke kaken lé, Doou kada a kousa kandè goukoudang ang. A ndjè kao gè tédjé wo tarn lé.

¹⁵ Dèdè ntéh Jérusalem. Jésus ao mè tokou kei Allah té, nao ntouba dèdè ke dao ndoko né ke dèdè ke dare dooudjé ao ndoko kedè né ke mè tokou kei Allah té. Nè ntila table lo dooudjé ke mbel narè ke nè ntila ngèndé lo dooudjé ke labe derdjé.

¹⁶ Nè nare doou kada ta ndai mè tokou kei Allah té ang ta koto né lodè.

¹⁷ Nè ntòdjoude tar, nè mpana, Maketourou lo Allah pa ang, Da bar kei lom kei doudjou né Allah lo dooudjé toï ang wa? Sésè edaidjé to boudja boukou.

¹⁸ Tòkou ndjè kòrdjé ke ndjè da maketourou ndedjidjé do tarn lé, dèdè nsange deo ta tòl Jésus mbata dèdè disi ke bel la, mbata mè dooudjé tokou baya baya ounda dò bia mbata tar ke Jésus tòdjoudè.

¹⁹ Tokou kade woei dèdè ntéh béh tén lé.

²⁰ Ke sindò tokou dèdè dao ndai, dèdè do kake toungoutisan lé toutou ke ngirè.

²¹ Pierre, mèa olè, nè mpa ke Jésus, Ndjè tòdjou tar, wo kake toungoutisa ke etadji lé toutou mbä.

²² Jésus tél tar pa aredè, Woidjé mèsè té ke Allah.

²³ Tokoro ma mpa maresè, doou ke pa ke errn lé, ï ao oso tokou man katé té, tokou nè mmaitar mèa té ang, nè no mèa té tokoro né ke nè mpa a dé, nè na da karè.

²⁴ Mbata yèn ma mpa maresè, né toï ke edoudjidjé deo doudjou Allah té, woidjé mèsè té ke sésè ingaidjé nèn lé, sésè a kingaidjé.

²⁵ Tokou sésè arridjé ao edoudjidjé Allah, tokou bo ngemidjé tar do mare doou té, ïyaidjé tarn lé, tokou ban bòsésè ke isi mè dara té ase kïya madjang losè to.

²⁶ Tokou sésè ïyaidjé ang, bòsésè ke isi mè dara té a kïya madjang losè ang to.

²⁷ Dèdè ntél dao Jérusalem. Tokou Jésus ao ndja mè tokou kei Allah té, tokou ndjè kòrdjé ke ndjè da maketourou ndedjidjé ke tokou dooudjé ndé rè té.

²⁸ Dèdè mpa darè, I ao da né nèn ke ri na wa, aséh doou di ari tè ta da né nèn lé wa?

²⁹ Jésus pa aredè, Ma ma doudjousè tar kada, etélidjé ke tar ami, tokou ban ma ma pa karesè ke ri na baa mam nda né nèn lé.

³⁰ Baptême lo Jean to to yéh ke dara aséh to to lo dooudjé wa? Etélidjé tar ami.

³¹ Dèdè mmaitar horodè té, tokou djèdjè mpana to yéh ke dara, a na pana, Mbata di baa woidjé tar la mèsè té ang wa?

³² Tokou djèdjè mpana to to lo dooudjé, — dèdè disi ke bel lo dooudjé, mbata dooudjé toï pa mèdè té, Jean to prophète tokoro.

³³ Tokou ban dèdè ntél ke tar dare Jésus, Djèdjè ngeré ang. Jésus pa aredè, Ma mpa maresè ang to ke ri na mam nda né nèn lé.