Marəke 10 - Testament ke Siki 1960 (Kabba Laka)

¹ Jésus ï nou ao nange té ke Judée ke toura man Jourdain té. Dooudjé tokou baya baya mbòna sa. Nè mpa tar naredè mare deo kadaba tokou nè nda ke ndò toï.

² Pharisiendjé dé rè té, ndoudjè ta nèè, mpana, Tar ndedji pana ase kare dingao touba dènè la wa?

³ Jésus tél pa aredè, Moïse pa aresè na di wa?

⁴ Dèdè mpana, Moïse are deo dingao ta da maketourou ta touba dènè.

⁵ Jésus pa aredè, Mbata mèsè ke ngeng Moïse da maketourou ban aresè.

⁶ Ndò kounkoutou da nange nèn Allah dadè dingao ke dènè.

⁷ Mbata tarn lé dingao a kïya bèdjè ke këndjè ta mbòna ke dènè la.

⁸ Dèdè djo ndé rò ke kada. Bana déh djo marè ang nga, dèdè nto rò ke kadaba.

⁹ Tokou ban nè ke Allah mbòn mbä, ïya are doou kai ang.

¹⁰ Mè kei té, ndjè kao gè tédjé tél doudjè gel tarn lé.

¹¹ Jésus pa aredè, Doou ke touba dènè la a kao taa mare dènè, nè nda dènè la kaiya.

¹² Tokou bo dènè ndja ïya ngaoèdjè ao taa mare dingao ke dang, nè nda kaiya.

¹³ Dèdè ndé ke ngandjé ke ngadji rè té ta kare Jésus naadè, a ndjè kao gè tédjé ndangedè.

¹⁴ Tokou Jésus wo yèn lé mèa tooè, nè mpa naredè, Aridjé ngandjé dé rom té, òkidjé deo lodè ang, mbata béh ko lo Allah to mbata dèdè ke nto tokou ngandjé.

¹⁵ Tokoro ma mpa maresè, doou ke taa béh ko lo Allah tokou ngon ang, a kao mè té ang.

¹⁶ Jésus taa ngandjé dja té, nè mmar tar ke madji dòdè té ke nila dja dòdè té.

¹⁷ Tokou Jésus ao ke deo, doou kada aïngorou dé ongou mekedjé gèlè nange nòè té, ndoudjè, Ndjè tòdjou tar ke madji, to tar lom ta da di wa ta kinga tébe ke ke ndò ke ndò wa?

¹⁸ Jésus pa arè, Mbata di a ebarem madji wa? Doou kada ke to ke madji goto sè Allah kadaba.

¹⁹ Egeré tar ndedji, etòl doou ang, eda kaiya ang, eboukou ang, epa tar nadji ngem ang, eboukou doou ang, ebel bòidjè ke köindjè.

²⁰ Nè mpa nare Jésus, Ndjè tòdjou tar, tarn toï mam ngem ke ndò toï tokou mam nai ngon nderèng bokonè.

²¹ Jésus woè a ndikè, pa arè, Nai né kada, ao elabe né loi toï, are narè dangetédjé, i a kisi ke né kinga ke dara, edé ao gom té.

²² Ongou dè mbata tarn lé, nè nao ke ongou mbata nè nisi ke né kinga nya.

²³ Jésus wo loou rè té, nè mpa nare ndjè kao gè tédjé. To ngeng nya ke dooudjé ke isi ke né kinga ta téh mè béh kö té lo Allah.

²⁴ Mè ndjè kao gè tédjé ounda do bia mbata tarn lé. Jésus tél ke tar mare pa aredè, Ngandjé, ngeng nya mbata dèdè ke nto mèdè ke né kinga ta téh mè béh ko té lo Allah.

²⁵ Téh lo doou ke ndjè né kinga mè béh kö té lo Allah to ngeng wota ndai lo da djambal deo libi té.

²⁶ Mè ndjè kao gè tédjé waa ngeng wota, dèdè mpa darè, Bana na a kase kinga kadji wa?

²⁷ Jésus wodè pana, Ase da lo dooudjé ang, lo Allah to tokou ban ang, mbata Allah ase ta da né toï.

²⁸ Pierre ao pa tar sa, Wo, djèdjè djïya né toï mbä nga ta kao goi té.

²⁹ Jésus pana, Tokoro ma mpa maresè, doou kada ke ïya kei la, aséh ngaköè ke dingao, aséh ngaköè ke dènè, aséh këndjè, aséh bèdjè, aséh nganè, aséh nange mbata lom ke mbata tar ke madji,

³⁰ Nè na kinga ndè té ke nange nèn lé mare kei ke ngaköè ke dingao, ke ngaköè ke dènè, ke këndjè, ke ngandjé, ke nange, gar dòdòkou, ke ngätar to, ke ndòté ke goukou na kinga tébe ke ke ndò ke ndò.

³¹ Maredjé baya ke to ndjè ke dongor da to ndjè ke goukou, a dèdè ke goukou da to ndjè ke dongor.

³² Dèdè dao ke deo ke ao ke Jérusalem ke Jésus ao nodè té. Mèdè ounda do biä ke bel da dooudjé ke ao gè té. Nè ntél mmardè dòkou gérè djo, nè nao ntòdjoudè né ke a dé rè té.

³³ Nè mpana, Woidjé, djèdjè djao ke Jérusalem, da kwaa Ngon lo doou kare tokou ndjè kòrdjé ke ndjè da maketourou ndedjidjé. Dèdè da gange saria yo dè té. Dèdè da kwèè kilè dji Gentildjé té.

³⁴ Dèdè da koukè, dèdè da tiwëré dè té, dèdè da koundè, dèdè da tòlè, ke gè té ndò mouta nè na kï.

³⁵ Jacques ke Jean, ngan lo Zébédée, dèdè ndé rè té mpa darè, Ndjè tòdjou tar, djèdjè ndiki ta kare eda mbata lodjè né ke tokou djèdjè ndiki.

³⁶ Jésus pa aredè, Sésè ndikimdjé ta karem da di wa mbata losè?

³⁷ Dèdè mpa darè, Aredjè ta kare doou ke kada isi do dji té ke kòl, ke doou ke kada isi dò dji té ke gèl ke ndò ndokoo té loi.

³⁸ Jésus pa aredè, Sésè egeridjé né ke edoudjidjé ang. Sésè asidjé kaih ke ngonarè ke ma kaih né tò, aséh a taaidjé baptéme ke mam ntaa lé wa?

³⁹ Dèdè mpa darè, Djèdjè djase. Jésus pa aredè, A kaihdjé tokoro ke ngonarè ke ma maih. Baptême ke mam ntaa lé, sésè a taaidjé baptême lé tò.

⁴⁰ Ke ta kisi do dji kòlem té aséh ke dò dji gèlem té to tar lom ta kare ang. To mbata lodè, dèdè ke nda loou tokou ban mbata lodè mbä nga.

⁴¹ Tokou dèdè dòkou do tarn lé, mèdè toodè nya ke Jacques ke Jean.

⁴² Jésus bardè pa aredè, Sésè egeridjé dooudjé ke dèdè daredè disi mbai lo Gentildjé, dwaadè ngeng ke tokou dooudjé lodè pa ngeng.

⁴³ A to tokou ban horosè té ang. Doou ke ndiki ta dé tokou boui a nè na kisi ngonlokisi losè.

⁴⁴ Doou ke ndiki ta dé doou ke boui horosè té, nè nase da bere losè toï.

⁴⁵ Mbata Ngon lo doou ndja dé ta kare nda ngonlokisi la ang, nè ndja ta da ngonlokisi, ke ta kare tébe la tokou lo andé ta kouka né dooudjé nya.

⁴⁶ Dèdè ntéh béh Jéricho. Tokou Jésus téh ke béh Jéricho ke ndjè kao gè tédjé ke dooudjé baya baya, Bartimée, ndjè kem tò, ngon lo Timée, isi mbòr deo té ta koi né.

⁴⁷ Tokou nè no yèn to Jésus ke Nazareth, nè nao mpa ke tarr, Jésus ngon lo David, eda mè madji sem.

⁴⁸ Dooudjé tokou baya ndangè mbata kare nè neo. Nè mpa ke tarr boui wota, Ngon lo David, eda mè madji sem.

⁴⁹ Jésus arr loou kada pana, Ebarèdjé. Dèdè mmar ndjè kem tò lé, dèdè mpa darè, Are mei isi dèkèkè, ï tarr, nè nao mmari.

⁵⁰ Nè nïya koubou la, nè nï loshénè loshénè, nao rò Jésus té.

⁵¹ Jésus tél tar pa arè, I ndikim ta da di sei wa? Ndjè kem tò pa arè, Ndjè tòdjou tar, arem mo loou.

⁵² Jésus pa arè, Ao, ko mè té loi da ròi madji mbä. Loshénè loshénè nè no loou ke nè nao go Jésus té ke deo bo.