Marəke 1 - Testament ke Siki 1960 (Kabba Laka)

¹ Tar ke madji lo Jésus Christ, Ngon lo Allah, ounkotè ban.

² Deo kadaba tokou maketourou lo prophète Ésaïe pa, Wo, ma moula ndjè koula lom dongor mari, Nè na da deo loi.

³ To to ndou doou ke ourouki mè kòr té, Edaidjé deo lo Mbaibé Seigneur, Edaidjé deo la gaté gaté.

⁴ Jean ndjè da baptême, téh mè kòr té, nè mpa tar baptême ta mbeté kedji né da ke madjang, baa ta kare Allah ïya né ke madjang.

⁵ Dooudjé toï ke nange té ke Judée, ke dèdè toï ke béh té ke Jérusalem dao rè té. Nè ndadè baptême mè man té ke Jourdain, tokou dèdè mpa madjang lodè ke daka.

⁶ Jean oula koubou bi da djambal, ke koulaa ndar to berè té. Mourou la to ebètèdjé ke oubou tèdjé ke mè kòr té.

⁷ Nè ntòdjou tar dooudjé, nè mpana, Doou kada dé gom té, nè noutam. Ma masang ta kongou mekedjé gòlem nange ta toutou koulaa ndar gòlè té.

⁸ Mam ndasè baptême ke man, nè na dasè baptême ke Ndil ke madji toï.

⁹ Ndè té ke nou, Jésus ï béh té ke Nazareth ke nange té ke Galilée, ndé nare Jean dè baptême man Jourdain té.

¹⁰ Tokou nè ntéh man ke daka, loshénè loshénè nè no ta dara teï, ke Ndil lo Allah dé dè té tokou egoutou.

¹¹ Bana tar téh dara, pana, I to to Ngonem ke mam ndiki nya, mem koukou nya mbata loi.

¹² Loshénè loshénè Ndil lo Allah oulè mè kòr té.

¹³ Nè néh mè kòr té ndò doso ke Satan nèè. Nè néh horo dadjé té ke mè kòr té, angedjé ke dara dé da sa.

¹⁴ Goukoudang dila Jean kei koula té mbä, Jésus ao nange té ke Galilée, nè mpa tar ke madji lo Allah.

¹⁵ Nè mpana, Ndò asenga, béh ko lo Allah éh ngosiba, mbetidjé kedji né da ke madjang losè, woidjé tar ke madji mèsè té.

¹⁶ Tokou Jésus ndja kare tokou man Galilée té, nè no Simon ke André, ngokö Simon, dèdè dao dila boura mè tokou man té mbata dèdè nto ndjè ndön mandjé.

¹⁷ Jésus pa aredè, Edéidjé gom té, ma ma dasè to ndjè sange dooudjé.

¹⁸ Loshénè loshénè dèdè dïya boura lodè dao go Jésus té.

¹⁹ Tokou nè ndai ngadji, nè no Jacques, ngon lo Zébédée, ke Jean ngokö Jacques, dèdè disi mè to té, dao ntòrou kem boura.

²⁰ Loshénè loshénè Jésus bardè, dèdè dïya bòdèdè Zébédée mè to té ke ndjè kouladjé, dèdè dao go Jésus té.

²¹ Dèdè dao béh té ke Capernaüm. Loshénè loshénè ndò sabbat té nè nao mè kei Allah té, ntòdjou tar.

²² Bana mèdè ounda do bia mbata tar la, mbata nè ntòdjoudè tar tokou doou ke éh ke singa ta pa tar, to tokou tar lo ndjè da maketourou ndedjidjé ang.

²³ Loshénè loshénè doou ke ndii ke madjang to mèa té, éh mè kei Allah té lodè.

²⁴ Nè mpa ke tarr, mpana, Di a to horodjè té, i ke djèdjè wa, Jésus ke Nazareth? I dé ta toudjoudjè wa? Mam ngeré i to na wa, i to nè ke madji toï lo Allah.

²⁵ Jésus ndangè, pana, Eo, etéh mè doou té nèn.

²⁶ Gè té goukou ndii ke madjang yè doou nèn ngeng, ke nè nourouki ngeng, nè ntéh mèa té mbä.

²⁷ Mèdè toï ounda do bia, tokou ban dèdè ndoudjou horodè té, mpana, Yèn to di wa? Tar ke siki. Nè ndange ndildjé ke madjang ke singa ke dèdè nda tokou nè mpa naredè.

²⁸ Loshénè loshénè tar la bar béh té toï ke do nange té ke Galilée.

²⁹ Loshénè loshénè nè ntéh daka mè kei Allah té, nè ke Jacques ke Jean dao mè kei té lo Simon ke André.

³⁰ Moum Simondjè to twa té ke rò too ke rè nounga nya, loshénè loshénè dèdè mpa tar rò too la dare Jésus.

³¹ Jésus dé waa dja, wèè ke tarr, bana rò too la eo, ke nè nda kedè.

³² Lowoul té tokou kade ata kwoei, dèdè ndé rò Jésus té ke dooudjé ke ndjè rò toodjé toï, ke ndjè woeidjé tò.

³³ Dooudjé toï ke béh té mbòna ta kei tén.

³⁴ Jésus òrou rò too dang dang lo dooudjé nya, nè ntouba ndildjé ke madjang mè dooudjé té ke baya. Nè ndange ndildjé ke madjang ta pa tar ang mbata dèdè ngerè leo.

³⁵ Do bakebé té Jésus ï tarr, ntéh nao mè mou té mbata pa tar ke Allah.

³⁶ Simon ke dèdè ke disi sa, dao go Jésus té:

³⁷ Dèdè dingè mbä, mpa darè, Dooudjé toï ao sangi.

³⁸ Jésus pa aredè, Edéidjé djao mare béh té mbata mam ndiki pa tar nou to, mbata mam ndé mbä mbata tar nèn.

³⁹ Jésus ao do nange té ke Galilée toï, mpa tar mè kei Allah té lodè, ke ntouba ndildjé ke madjang.

⁴⁰ Doou ke ndjè bandji kada dé rò Jésus té, nongou mekedjé gòlè nòè té, ndoudjè nya, mpana, Tokou i ndiki, i ase ta dam madji.

⁴¹ Jésus da mè madji, noula dja nòrè nè, mpana, Mam ndiki, edé madji.

⁴² Loshénè loshénè bandji la goto, rè dé madji.

⁴³ Loshénè loshénè Jésus oulè arè nao, ndedjè ngeng.

⁴⁴ Nè mpa narè, Ngem madji, epa tar kada are doou kada ang, ao tòdjou ròi ndjè kòr, eda né ke Moïse tòdjou leo mbata tar toko bandji, to tar nadji kemdè té.

⁴⁵ Bana dooun lé téh pa tar nèn loou toï, tokou ban Jésus ase ta ndja mè béh té kem dooudjé té ba ang, nè nisi mè mou té, ke dooudjé ï loou té toï dao rè té.