Lugu 5 - Testament ke Siki 1960 (Kabba Laka)

¹ Tokou dooudjé mbona sa ta ko tar lo Allah, Jésus arr kare man Génésareth té.

² Nè no to djo dò man té, a ndjè ndön mandjé téh daka mbä, dao ntoko boura lodè.

³ Nè nao mè to té kada ke to lo Simon. Nè ndoudjè ta kao dèbè eo ngadji dò man té. Nè nisi mè to té ntòdjou dooudjé tar.

⁴ Tokou nè nïya ta pa tar, nè mpa nare Simon, Ao kei man té ke ourou nya, ilaidjé boura losè ta kwaa kaindjidjé.

⁵ Simon tél tar pana, Ndjè tòdjou tar, djèdjè djila boura tilti pi, djèdjè djwaa né kada ang, a mbata i pa, ma ma kila boura.

⁶ Tokou dèdè nda ban, dèdè dwaa kaindjidjé baya baya, boura lodè ata tir.

⁷ Tokou ban dèdè nkebe ndjè bokoradjé lodè ke isi mè mare to té, ta karedè ndé doumadè. Dèdè ndé, dousou to djokem tokou ban to ata ndii.

⁸ Tokou Simon Pierre wo né nèn, nè noso nò gòl Jésus té, mpana, Ïyam Mbaibé Seigneur, mbata mam nto doou ke madjang.

⁹ Mbata mèa ounda dò biä, ke dèdè toï ke déh sa to, mbata kaindjidjé baya baya ke dèdè dwaadè.

¹⁰ Jacques ke Jean, ngan lo Zébédée, ke to dooudjé ke ouma Simon, mèdè ounda dò biä to. Jésus pa are Simon, Eda bel ang, a nderèng bokonè i a kao ta sange dooudjé.

¹¹ Tokou dèdè ndé ke to lodè ta kongo té, dèdè dïya né toï, dao go Jésus té.

¹² Tokou Jésus éh mare béh té ke kada, doou ke ndjè bandji kada dé. Tokou nè no Jésus, nè noso ke natenè no gòl Jésus té, nè ndoudjè nya, mpana, Mbaibé Seigneur, tokou i ndiki, i ase ta dam madji.

¹³ Jésus oula dja òrè pana, Mam ndiki, edé madji. Loshénè loshénè bandji la goto.

¹⁴ Jésus ndedjè ngeng ta pa kare doou kada ang. Nè mpana. Ao tòdjou ròi ndjè kòr, are né kare ba mbata ròi dé madji, deo kadaba tokou Moïse pa leo, to tar nadji kem dooudjé té.

¹⁵ Tar lo Jésus bar wota nya. Dooudjé baya baya mbona ta ko tar la, ke ta kare ròdè dé madji.

¹⁶ A Jésus ïyadè, nao mè kòr té, nao ndoudjou Allah.

¹⁷ Mare ndò kada tokou nè nao ntòdjou tar, mare Pharisiendjé ke ndjè tòdjou tar ndedjidjé disi ngosiba. Dèdè ndé ke béh té toï ke Galilée ke Judée ke Jérusalem. Singa lo Mbaibé Seigneur éh ke Jésus ta da rò dooudjé madji.

¹⁸ Wo, mare dooudjé dé ke doou kada dò twa té, ke debe rè woei mbä. Dèdè nsange deo ta kao sa rò Jésus té.

¹⁹ Tokou dèdè dinga deo ta kao rè té ang, mbata dooudjé ke mbona baya baya, dèdè dal do kei té, dòrou do kei doula doou nèn no Jésus té ke twa ke nto kendé.

²⁰ Tokou Jésus wo ko mè té lodè, nè mpana, Dingao, né ke madjang loi goto nga.

²¹ Ndjè da maketourou ndedjidjé ke Pharisiendjé dedji tar pana, Yèn to na baa pa tar sa ke Allah wa? Na ase kïya né ke madjang sè Allah kadaba ang wa?

²² Tokou Jésus geré kedji lodè, nè ntél tar naredè, Mbata di a edjidjé tar nèn mèsè té wa?

²³ Di baa to né ke ngeng wota wa, ta pana, Né ke madjang loi goto nga, aséh ta pa, ï tarr, ndja ke gòli?

²⁴ A ta karesè egeridjé Ngon lo doou éh ke singa nange té nèn ta kïya né ke madjang, nè mpa nare doou ke debe rè woei mba, Ma mpa mari, ï tarr, oun twa loi, ao kei té loi.

²⁵ Loshénè loshénè nè nï nòdè té, nè noun twa ke nto kendé, nao kei té la, nao nòsou gadji Allah.

²⁶ Mèdè toï ounda dò biä, dèdè dòsou gadji Allah, ke mèdè edji nya, mpana, Djèdjè djo mare né kòbou bokonè.

²⁷ Gè té nèn Jésus téh daka, nè no mare doou ke ndjè taa narè lʼimpôt, ria na Lévi. Nè nisi kei kouka narè lʼimpôt té. Jésus pa arè, Edé gom té.

²⁸ Nè nïya né toï, nï tarr nao go Jésus té.

²⁹ Lévi da né kousa nya mè kei té la mbata Jésus. Dooudjé ke ndjè taa narè lʼimpôtdjé baya baya ke mare dooudjé disi ta table té kedè.

³⁰ Pharisiendjé ke ndjè da maketourou ndedjidjé ke horodè té, mmaitar ke ndjè kao go Jésus té, mpana, Mbata di a sésè öndjé mourou ke aihdjé ke ndjè taa narè lʼimpôtdjé ke ndjè né da ke madjangdjé wa?

³¹ Jésus tél pa aredè, Dooudjé ke isi ke rò too ang ndiki ndjè kouma ang, a dooudjé ke ndjè rò toodjé a ndikè.

³² Mam ndé ta bar dooudjé ke gaté gaté ang, mam ndé ta bar dooudjé ke ndjè né da ke madjangdjé, ta karedè mbeté kedji né da ke madjang lodè.

³³ Dèdè mpa darè, Ndjè kao go Jean té ïya mourou gar baya, ke dèdè ndoudjou Allah to, ndjè kao go Pharisiendjé té da ban to, a ndjè kao goi té ön mourou ke aih ba.

³⁴ Jésus pa aredè, Sésè asidjé ta kare ndjè bokoradjé lo basä ke taa dènè ta kïya mourou tokou basä éh horodè té wa?

³⁵ Ndò ao dé ke dèdè da kòrou basä horodè té, tokou ban dèdè da kïya mourou ndò tén lé.

³⁶ Nè mpa tar gousou naredè to, Doou kada tir mare koubou ke siki ta kila né kem koubou ke konè ang. Tokou nè nda ban, nè na toudjou koubou ke siki, ke marè ke siki a kase yéh ke leo ang tò.

³⁷ Doou kada ongou vin ke siki bar bòl vin té ang, tokou nda ban vin ke siki a tir bòl vin, kare vin to koro ke bòl vin a toudjou.

³⁸ Ase ta kongou vin ke siki bòl vin té ke siki.

³⁹ Doou kada ke aih vin ke leo ndiki vin ke siki ang, mbata nè mpana, Yéh ke leo to madji wota.