Lugu 2 - Testament ke Siki 1960 (Kabba Laka)

¹ Ndò té ke nou, César Auguste oula ta kare dooudjé toï da ridè maketourou té.

² Ndò ta da ri dooudjé maketourou té ke dongor, to ndò ke Quirinius isi ndjè ko loou Syrie té.

³ Dooudjé toï ao ta da ridè maketourou té, dèdè kada kada toï dao béh koudjoudè té ndja.

⁴ Joseph to ï Galilée ke béh Nazareth té, nao Judée té, béh lo David, ri béh nèn na Bethléhem, mbata nè nto doou ke mè kei gel dooudjé té lo David.

⁵ Nè nao ta da ria maketourou té deo kadaba ke Marie, dènè ke nè ndoudjou ta tèè. Sem lo Marie tokou nya.

⁶ Tokou dèdè disi nou, ndò koudjou lo Marie ase.

⁷ Nè noudjou ngon ke dingao, ngon derè. Nè nkè ke koubou ke ngal, nilè mè sandoukou né kousa té lo mangedjé, mbata dinga loou ta kisi mè kei té ang.

⁸ Loou té ke nou, dooudjé ke ndjè koul batidjé isi daka mè mou té, dèdè disi ta ngem batidjé lodè ke tilti.

⁹ Ange lo Mbaibé Seigneur kada téh ròdè té, ke ndokoo lo Mbaibé Seigneur kiridè. Bel dadè nya.

¹⁰ Ange pa aredè, Edaidjé bel ang, mbata woidjé, mam ndé ta karesè tar ke madji ke rònèl nya, ke ao dé rò dooudjé té toï.

¹¹ Mbata doudjou ndjè kadjisè bokonè mè béh té lo David, nè ke nto Christ Mbaibé ndja.

¹² Yèn to né tòdjou mbata losè, sésè a koidjé ngon kada ke nkè ke koubou ke ngal, ke nè nto mè sandoukou né kousa té lo mangedjé.

¹³ Loshénè loshénè ndjè dòòdjé ke dara baya baya éh ke ange nèn, dao mpiti Allah, mpana,

¹⁴ Òsou gadji Allah ke loou té ke tarr wota toï, ke mè woul horo dooudjé té ke nange nèn, dèdè ke nda né ke nèlè.

¹⁵ Tokou angedjé ïyadè tél ke dara, dooudjé ke ndjè koul batidjé pa horodè té, Aredjè djao Bethléhem té, ta ko né nèn ke dé mba, ke Mbaibé Seigneur tòdjoudjè.

¹⁶ Dèdè dao ndjange ndjange, dèdè dinga Marie ke Joseph, ke ngon ke to mè sandoukou né kousa té lo mangedjé.

¹⁷ Tokou dèdè doè, dèdè mpa ke daka tar ke dèdè do mbata ngon nèn.

¹⁸ Dooudjé toï ke wo tar nèn, mèdè edji nya do tar té ke ndjè koul batidjé pa aredè.

¹⁹ A Marie ngem tar nèn toï, nedji nounda mèa té.

²⁰ Dooudjé ke ndjè koul batidjé tél, dao dòsou gadji ke mpiti Allah, mbata tar toï ke dèdè do ke mbidè ke kemdè, deo kadaba tokou mpa daredè mbä.

²¹ Gè té ke ndò djidjo ndai, tokou dèdè doudja ta motè, dounda ria na Jésus, ri ke ange ounda dè té dongor baa Marie waa sem.

²² Tokou ndò toko lo Marie asenga, ndò toko rò tokou tar ndedji lo Moïse tòdjoudè, dèdè dao sa Jérusalem té ta karè Mbaibé Seigneur.

²³ Deo kadaba tokou maketourou ndedji lo Mbaibé Seigneur pa, Ngan deredjé ke dingao kada kada toï ke téh mè ködèdè té, da bardè madji toï mbata Mbaibé Seigneur.

²⁴ Dèdè dao ta kare né polo deo kadaba tokou tar ndedji lo Mbaibé Seigneur pa, egoutou djo aséh ngan derdjé djo.

²⁵ Ndò té ke nou, doou kada éh Jérusalem té ke ria na Siméon. Doou nèn to gaté gaté ke nè ngem tar lo Allah. Nè ngebe tar mè madji mbata Israël, ke Ndil ke madji toï to dè té.

²⁶ Ndil ke madji toï tòdjè leo, pana, nè na kwoei ang nderèng nè na ko Christ lo Mbaibé Seigneur.

²⁷ Deo té lo Ndil ndja, nè ndé mè tokou kei Allah té, tokou kö ngon ke bèdjè ndé ke ngon Jésus, ta da sa deo kadaba tokou tar ndedji pa.

²⁸ Siméon taa ngon nèn ke dja, nè nòsou gadji Allah, mpana,

²⁹ Mbaibé Seigneur, bashénè are ndjè koula loi ao ke mè woul, deo té lo tar loi.

³⁰ Mbata kem wo kadji loi,

³¹ Ke i da no dooudjé té toï,

³² Lokarè ta ndokoo kem Gentildjé té, ke nè ndokoo mbata dooudjé loi Israël.

³³ Bèdjè ke këndjè dedji nya do tar té ke mpa dò ngon é nèn.

³⁴ Siméon pa tar ke madji dòdè té, ke nè mpa nare këndjè Marie, Wo, mmar ngon nèn ke daka mbata tar koso ke tar kï lo dooudjé ke baya lo Israël, ke mbata né tòdjou ke dèdè da mbeté.

³⁵ Kiaa a kòsou mei ndja to, ta kare tar kedji ke mè dooudjé té ke baya téh daka.

³⁶ Prophète ke dènè kada éh nou, ria na Anne, ngon lo Phanuel, doou ke gel dooudjé té lo Aser. Bal la baya nya. Nè nisi ke ngaoèdjè bal shiri to ngomandé.

³⁷ Nè nisi dènè ndouba nderèng bal la ase dòdjidjo gérè sò. Nè nïya mè tokou kei Allah ang, nè mpiti Allah deo kïya mourou ke doudjou Allah tilti rem kade rem.

³⁸ Nè ndé kade tén ndja, nè nda woio Allah, ke nè mpa tar lo ngon nare dooudjé toï ke ngebe kadji ke Jérusalem té.

³⁹ Tokou dèdè nda né toï tokou tar ndedji lo Mbaibé Seigneur tòdjoudè, dèdè ntél dao Galilée té ke béh lodè ndja Nazareth.

⁴⁰ Ngon lé tokou ke nè ndé mongou, mèa dousou ke kemkarè, ke mè madji lo Allah to dè té.

⁴¹ Këndjè ke bèdjè dao Jérusalem té bal kada kada toï, ndò kon mourou Pâque té.

⁴² Tokou bal lo Jésus ase dòkou gérè djo, dèdè dao tokou dèdè nda ke bal toï.

⁴³ Tokou tar mourou goto nga, dèdè dao ntél, a ngon Jésus nai goukou Jérusalem té. Këndjè ke bèdjè ngeré ang.

⁴⁴ Dèdè dedji mèdè té na néh horo dooudjé té. Dèdè ndja deo bo ndò kada, dèdè nsangè horo ngaködè té ke bokoradjé té lodè.

⁴⁵ Tokou dèdè doè ang, dèdè ntél Jérusalem té, dao nsangè.

⁴⁶ Gè té ndò mouta dèdè doè mè tokou kei Allah té. Nè nisi horo ndjè tòdjou tardjé té. Nè no tar lodè ke nè ndoudjoudè gel tar.

⁴⁷ Dooudjé toï ke woè, mèdè ounda dò biä mbata kemkarè la, ke mbata tar ke nè ntél naredè.

⁴⁸ Tokou dèdè doè, mèdè ounda dò biä, këndjè pa arè, Ngonem, mbata di a eda tokou ban kedjè wa? Wo, bòidjè ke ma nsangi ke ongou.

⁴⁹ Nè mpa naredè, Esangemdjé mbata di wa? Egeridjé to tar lom ta kisi mè kei té lo Bòi ang wa?

⁵⁰ Dèdè ngeré gel tar ke nè mpa naredè ang.

⁵¹ Nè nao kedè, ndé Nazareth té, nè no tar lodè. Këndjè ngem tar nèn toï mèa té.

⁵² Jésus tokou ke kemkarè ke mongou, nè ninga mè madji no Allah té ke no dooudjé té to.