Lugu 13 - Testament ke Siki 1960 (Kabba Laka)

¹ Mare dooudjé éh nou lé té ndja ke pa tar lo dooudjé ke Galilée are Jésus, dèdè ke Pilate polè mesedè ke né polo.

² Jésus tél tar aredè, Sésè edjidjé dooudjé ke Galilée nèn to ndjè né da ke madjang wota maredjé ke Galilée té, baa dèdè dinga né ongou ban wa?

³ Ma mpa maresè, Eë, a tokou sésè mbetidjé kedji né da ke madjang losè ang, sésè toï a kwoeidjé tokou ban tò.

⁴ Aséh dèdè dòkou gérè djidjo ke tokou kei ke ngal ke Siloè oso dòdè té ke tòldè, sésè edjidjé dèdè nto ndjè né da ke madjang wota mare dooudjé toï ke isi Jérusalem té wa?

⁵ Ma mpa maresè, Eë, a tokou sésè mbetidjé kedji né da ke madjang losè ang, sésè toï a kwoeidjé tokou ban to.

⁶ Nè mpa tar gousou nèn, Doou kada doubou kake toungoutisa mè ndoo té la, nè ndé ta sange kandè, a kandè goto.

⁷ Nè mpa nare ndjè ngem ndoo, Wo, to bal mouta ke mam ndé nsange kandé kake toungoutisa nèn, a minga kada ang. Etoukè mbata nè ngange nange nèn ba mba di wa?

⁸ Ndjè ngem ndoo tél tar arè pana, Ebemdjè, ïyè ba mbata bal nèn bai, nderèng mam ntouka nange ngirè té, ke ma mongou shi kòè té.

⁹ Tokou nè nan kandè ke bal ke ao dé, tokou ban to madji, tokou bo nan ang, i ase ta toukè.

¹⁰ Jésus ao tòdjou tar mè kei Allah té kada ndò sabbat té.

¹¹ Dènè kada éh nou ke isi ke ndil ke toudjou singa la bal dòkou gérè djidjo, dounè doukou nya ke nè nase karr ke tarr mbarang ang.

¹² Tokou Jésus woè, nè mmarè mpa narè, Dènè, rò too loi goto.

¹³ Nè nila dja dè té, ke lé té ndja nè narr ke tarr mbarang, nè nòsou gadji Allah.

¹⁴ Ongou da mbai ke ngem né kei Allah té, mbata Jésus òrou rò too ndò sabbat té, nè mpa nare dooudjé, Ndò misä to ta da koula, edéidjé ke ndòn lé ta kare nòrou rò too losè, edéidjé ndò sabbat té ang.

¹⁵ Mbaibé Seigneur tél tar arè pana, Sè ndjè kere ngemdjé, sésè kada kada toï etouridjé mange aséh kororo losè loou kousa né té ndò sabbat té ang wa, ta kao kedè kare daih man ang wa?

¹⁶ Dènè nèn ke to ngon lo Abraham ke Satan tòè bal dòkou gérè djidjo, ase kare ntoutè ke né ke tòè ndò sabbat té ang wa?

¹⁷ Tokou nè mpa ban, ròkoul da ndjè kembaadjé la toï. Dooudjé toï ke mbona, ròdè nèldè nya mbata nè ke madji toï ke nè nda.

¹⁸ Tokou ban Jésus pana, Béh ko lo Allah to tokou di wa? Ma ma tòdjou tarè pana to tokou di wa?

¹⁹ Nè nto tokou kandé sénevé kadaba ke doou kada oun doubou mè ndoo té la. Nè ntòkou ndé to bouka kake, eldjé ke ao tarr da kei lodè barkemè té.

²⁰ Nè mpa marè bai, Ma ma tòdjou tar béh ko lo Allah to tokou di wa?

²¹ Nè nto tokou sér ke dènè oun polonè ndoudjou mourou ase kaa mouta, nderèng toï ti.

²² Jésus ao deo té la, nè nao béh té ke bo ke béh té ke ngadji, ntòdjou tar tokou nè nao ta kao Jérusalem té.

²³ Mare doou kada pa arè, Mbaibé Seigneur, dèdè ke dinga kadji to to dooudjé kada kadaba wa?

²⁴ Nè mpa naredè, Edaidjé ke singa ta kao ta deo té ke to ngadji. Ma mpa maresè, maredjé baya ao sange ta kao mè té, a dèdè da kase ang.

²⁵ Tokou ndjè kei ï tarr ke outou tadeo kei la mba, sésè ounidjé kotè ta karr daka, ta kounda tadeo kei, ao epaidjé, Mbaibé òrou aredjè. Nè na tél tar karesè, Mam ngeré loou ke sésè ïdjé kendé ang.

²⁶ Bana sésè ounidjé kotè ta pana, Djèdjè djon mourou ke djaih nòi té, ke i tòdjou tar béh té lodjè tò.

²⁷ A ndjè kei a pana, Ma mpa maresè, mam ngeré loou ke sésè ïdjé kendé ang, abidjé, ïyamdjé sésè toï ke edaidjé né ke madjang.

²⁸ Loou té ke nou sésè a nòidjé ke man kemsè, ke sésè a kousaidjé ngangesè, tokou sésè a koidjé Abraham ke Isaac ke Jacob ke prophètedjé toï mè béh ko té lo Allah, a sésè dilasè daka.

²⁹ Mare dooudjé a kï er loou té ke kade téh, ke er loou té ke kade woei, ke er loou té ke tarr, ke er loou té ke ber, dèdè da kisi ta table té mè béh ko té lo Allah.

³⁰ Woidjé, maredjé ke to ndjè ke goukou, da to ndjè ke dongor, ke maredjé ke dongor, da to ndjè ke goukou.

³¹ Lé té ndja mare Pharisiendjé dé pa arè, Ïya loou ke nèn mbata Hérode ndiki ta tòli.

³² Jésus pa aredè, Abidjé, epaidjé are tai nèn, wo, mam ntouba ndildjé ke madjang, ke mam nda rò dooudjé ke ndjè rò toodjé dé madji bokonè ke bara tò, ke ndò ke mouta mam nda toï ase.

³³ Bana ma mase ndja deo té lom bokonè ke bara ke nouna, mbata prophète kada a kase kwoei ke loou té ke dang ke Jérusalem té ang.

³⁴ Jérusalem, Jérusalem ke toï prophètedjé, ke tila dèdè ke douladè dari ke err. Gar baya mam ndiki ta mbòn ngani naaté, tokou ko koundja mbòn nganè ko bakè té, a i ndiki ang.

³⁵ Wo, kei loi a dé kari ba. Ma mpa maresè, sésè a komdjé marè ang nga, sar sésè a paidjé, Madji éh ke nè ke ndé ke ri lo Mbaibé Seigneur.