Lugu 10 - Testament ke Siki 1960 (Kabba Laka)

¹ Gè té nèn Mbaibé Seigneur bar maredjé dòshiri ke daka, nè nouladè djo djo dongor kèté, ta kare dao béh té toï, ke loou té toï ke nè ndja ndiki ta kao kendé.

² Nè mpa naredè, Ko ke ndoo baya nya, a ndjè kouladjé éh baya ang, tokou ban edoudjidjé Mbaibé ke ndjè ndoo ko ta koula ndjè kouladjé mè ndoo ko té la.

³ Abidjé deo losè, woidjé, ma moulasè daka tokou lo ngan batidjé horo ndjakemdjardjé té.

⁴ Abidjé ke bòl narè ang, ke tokou bòl ang, ke ndar gòlsè té ang, edaidjé laphia doou kada ke deo bo ang.

⁵ Kei ke sésè abidjé mè té, epaidjéna dongor, Mè woul isi mè kei tén lé.

⁶ Tokou ngon ke mè woul éh nou, mè woul losè a kisi dè té. A tokou goto, mè woul a tél ròsè té.

⁷ Isidjé mè kei tén lé, öndjé mourou ke aihdjé né ke dèdè da karesè, mbata ndjè koula ase kinga kouka la. Abidjé mare kei té ke dang dang ang.

⁸ Béh ke sésè etéhdjé té ke dèdè ntaasè, öndjé né ke dèdè dounda nòsè té.

⁹ Òridjé rò too lo ndjè rò toodjé mè béh tén lé, epaidjé aredè, Béh ko lo Allah dé ngosiba kesè.

¹⁰ A tokou sésè etéhdjé béh té kada ke dèdè ntaasè ang, etéhdjé deoè té, epaidjé,

¹¹ Boum nange béh losè ndja ke to gòldjè té, djèdjè ntounda ke dang dòsè té, bana ase kare egeridjé tar béh ko lo Allah dé ngosiba.

¹² Ma mpa maresè, ndò té ke nou, saria lo béh nèn a to wota saria béh Sodome.

¹³ Ongou a dai Chorazin, ongou a dai Bethsaïda, mbata tokou dèdè nda tokou koula ke Tyr ke Sidon leo ke nda horosè té, dèdè da mbeté kedji né da ke madjang lodè leo, da koula koubou ke madjang ta kisi bou pourou.

¹⁴ Ndò gange saria té, saria losè a to wota saria lo Tyr ke Sidon.

¹⁵ Kei Capernaüm, da piti sar ke dara wa? Da kao sei djabao.

¹⁶ Doou ke wo tar losè, wo tar lom, doou ke mbetésè, nè mbetem, doou ke mbetem, nè mbeté nè ke noulam.

¹⁷ Dèdè dòshiri ntél ke rònèl, mpana, Mbaibé Seigneur, ndildjé ke madjang ndja wo tar lodjè deo té lo ri.

¹⁸ Nè mpa naredè, Ma mo Satan ï dara oso tokou lo ndi ke tél.

¹⁹ Woidjé, ma maresè singa ta kouba li ke ï, ke ta ndai singa lo ndjè kembaa toï, ke né kada a dasè madjang ang.

²⁰ Ekoukidjé mbata tar nèn ang, mbata ndildjé wo tar losè, a ekoukidjé mbata nda risè mè maketourou té ke dara.

²¹ Lé té ndja mè Jésus koukou deo té lo Ndil ke madji toï, mpana, Mam ndai woio Bòi, Mbaibé Seigneur ke dara ke nange nèn, mbata i iyaa tar nèn ke ndjè kemkarèdjé ke ndjè geré gel tardjé, ke i tòdjoudè ngandjé ke ngadji. Aa, Bòi, mbata tokou ban to madji kemi té.

²² Bòi arem nè toï djim té mba, ke doou kada geré ang Ngon to na wa, sè Bèdjè ndja. Doou kada geré ang Bòi Allah to na wa, sè Ngon ndja, ke doou ke Ngon ndiki ta tòdjè karè.

²³ Bana nè ntourou rè nò ndjè kao gè tédjé, mpa naredè hoi, Madji éh ke kem dooudjé ke wo ke kemdè né ke sésè woidjé.

²⁴ Mbata ma mpa maresè, prophètedjé ke mbaibédjé baya leo ndiki ta ko né ke sésè woidjé, a dèdè do ang, ke mbidè ndiki ta ko tar ke mbisè wo, a dèdè do ang.

²⁵ Wo, mare ndjè tòdjou maketourou ndedji kada ï ta naa Jésus, mpana, Ndjè tòdjou tar, ma mase ta da di baa ta kinga tébe ke ke ndò ke ndò wa?

²⁶ Jésus pa arè, Maketourou ndedji pana di wa? Di a etoura mè té wa?

²⁷ Nè ntél tar mpana, Ase kare i ndiki Mbaibé Allah loi ke mei toï, ke ndil loi toï, ke singa loi toï, ke kedji loi toï, ke ta ndiki doou ke ndjè nin kei mari deo kadaba tokou i ndiki ròi ndja.

²⁸ Jésus pa arè, I tél tar gaté gaté, eda ban, i a kisi ke tébe.

²⁹ A mbata nè ndiki ta da rè ndja gaté gaté, nè mpa nare Jésus, Doou ke ndjè nin kei lom to na wa?

³⁰ Jésus tél tar pana, Doou kada ï Jérusalem ao Jericho té, nè noso dji ndjè boukoudjé té, dèdè ntòrou koubou la toï, dèdè ntoundè, dèdè dao dïyè ndé ngosiba ta kwoei.

³¹ Ndjè kòr kada ao ndja deoè tén, tokou nè no doou nèn, nè noudja er kada.

³² Doou ke to Lévite da tokou ban tò, tokou nè ndé loou té ke doou nèn éh tén, nè noè, nè noudja er kada.

³³ A mare Samaritain kada, tokou nè nao ndja deo tén, ndé loou té ke doou nèn éh tén, tokou nè noè, nè nda mè madji sa.

³⁴ Nè nao rè té, ntò doo la, nongou oubou ke vin kem doo té. Bana nè noundè dò kororo té la ndja, nao sa kei to té ke nè ngemè nou.

³⁵ Gè té ndò kada, nè nòrou narè denier djo nare ndjè ngem kei, mpana, Ngemè madji. Tokou i ouka narè wotadè ke nèn, ma ma koukai ndò té ke mam ntél.

³⁶ Ke horo dooudjé té ke mouta nèn, i edji na da tokou doou ke ndjè nin kei nare doou ke oso dji ndjè boukoudjé té wa?

³⁷ Nè mpana, Nè ke nda mè madji sa. Jésus pa arè, Ao eda deo kadaba tokou ban.

³⁸ Tokou dèdè dao deo té lodè, nè nao mè béh té kada. Dènè kada ria na Marthe tèè ke kei la ndja.

³⁹ Nè néh ke ngoköè ke dènè kada ria na Marie. Marie isi no goi Mbaibé Seigneur té, no tar ke nè ntòdjè.

⁴⁰ Koula ke mè kei té djòkou Marthe nya, nè nao rò Jésus té mpana, Mbaibé Seigneur, to madji kemi té ke ngoköm ïyam ta da koula ke kadam ba wa? Epa arè ta koumam.

⁴¹ Mbaibé Seigneur tél tar arè pana, Marthe, Marthe, mei sangi ke ongou dai mbata né nya.

⁴² Né kadaba ke ase toï. Marie mbere né ke madji, ke da kòrou dja té ngadji ang.