Lugu 1 - Testament ke Siki 1960 (Kabba Laka)

¹ Mbata dooudjé nya ounkotè ta da mè maketourou té, tar né ke téh horodjè té,

² Deo kadaba tokou dèdè daredjè, dèdè ke do ke kemdè ke mpa tar nadji tar ndja dongor kèté.

³ Ke mem té ma mo madji to, Théophile ke madji nya, ta da tar nèn mè maketourou té ke deoè té madji mbata loi, mbata mam nsange né toï gaté gaté ke ndò té ke dongor.

⁴ Ta kari geré tar ke tokoro do né té ke dèdè ntòdjou leo.

⁵ Ndò té lo Hérode, mbaibé ke Judée té, doou ke ndjè kòr kada éh tén, ria na Zacharie. Nè nto doou ke gel dooudjé té lo Abia. Nè ntaa dènè kada ke to gel ngandjé lo Aaron, ria na Elisabeth.

⁶ Dèdè djokem nto gaté gaté kem Allah té, dèdè ndja deo tar ndedji té ke tar lo Mbaibé Seigneur madji, tar kada to dòdè té ang.

⁷ A ngondè goto mbata Elisabeth to dènè ke ao katé, ke dèdè djokem ndé bouka mba.

⁸ Bana tokou Zacharie da koula kòr no Allah té, ndò ke to tar la ta da,

⁹ Deo té lo tar lo ndjè kòrdjé, ntoura dè té ta kao mè tokou kei té lo Mbaibé Seigneur ta nounga yambo.

¹⁰ Dooudjé ke baya baya toï doudjou Allah loou té ke daka ke kade nounga yambo té.

¹¹ Ange lo Mbaibé Seigneur kada téh rò Zacharie té, nao narr er kòl bann té ke nounga yambo kendé.

¹² Tokou Zacharie wo ange, mèa ounda do biä ke bel dè.

¹³ Ange pa arè, Eda bel ang, Zacharie. Allah wo doudjou loi, dènè loi Elisabeth a koudjou ngon ke dingao, i a kounda ria na Jean.

¹⁴ I a kinga rònèl ke koukou, rò dooudjé baya a nèldè ndò koudjè té.

¹⁵ Mbata nè na dé tokou kem Mbaibé Seigneur té. Nè na kaih vin ke koto ngadji ang, mèa a dousou ke Ndil ke madji toï ke ndò koudjè té.

¹⁶ Nè na tél mè ngandjé lo Israël baya rò Mbaibé Allah té lodè.

¹⁷ Nè na kao no Mbaibé Seigneur té ke ndil ke singa tokou lo Élie, ta tél mè bo ngandjé rò ngandè té, ke ta tél dooudjé ke ndjè mbeté tar ta ndja kemkarè té lo ndjè ke gaté gaté, ta da mè mare dooudjé dé gaté gaté mbata Mbaibé Seigneur ndja.

¹⁸ Zacharie pa are ange, Ma ma geré tar nèn to di wa? Mbata mam nto bouka ke bal dènè lom baya nya to.

¹⁹ Ange tél pa arè, Mam nto Gabriel ke arr no Allah té, nè noulam ta pa kari, ta kari tar ke madji nèn.

²⁰ Wo, gòsi a koutou, i a pa tar ang nderèng ndò té ke né nèn toï a dé, mbata i wo mei té ke tar lom ang, tar né toï ke a téh ke ndòè.

²¹ Dooudjé ngebe Zacharie, ke mèdè edji mbata nè nisi gè eo nya mè tòkou kei Allah té.

²² Tokou nè ntéh daka, nè nase ta pa tar kedè ang. Dèdè ngeré nè no né tokou lo ni mè tokou kei Allah té. Nè nyè dja naredè, a nè néh to doou ke pa tar ang.

²³ Tokou ndò koula la asenga, nè nao kei té la.

²⁴ Go ndò té ke nèn, dènè la Elisabeth waa sem. Nè niyaa rè nnè mi, mpana,

²⁵ Tokou ban Mbaibé Seigneur da sem ndò ke nè no tar lom leo, ta kòrou ròkoul lom horo dooudjé té.

²⁶ Ke nnè misä, Allah oula ange Gabriel béh té kada ke Galilée, ri béh nèn na Nazareth.

²⁷ Noulè rò ngomandé té kada, ke doou ria na Joseph doudjou ta tèè. Nè nto doou ke mè kei gel dooudjé té lo David. Ri ngomandé nèn na Marie.

²⁸ Ange dé rè té pana, Laphia, i kada ke inga mè madji mbä, Mbaibé Seigneur éh sei.

²⁹ Mè Marie ounda dè biä nya mbata tar nèn. Nè nedji mèa té tar laphia nèn to to di an wa?

³⁰ Ange pa arè, Eda bel ang Marie, mbata i inga mè madji kem Allah té mbä.

³¹ Wo, i a kwaa sem, ke i a koudjou ngon ke dingao, i a kounda ria na Jésus.

³² Nè na dé tokou, ke da barè ngon lo nè ke nouta toï. Ke Mbaibé Allah a karè ngèndé mbai lo bèdjè David,

³³ Nè na ko kei lo Jacob ke ndè ke ndò, béh ko la a keo ndò kada ang.

³⁴ Marie pa are ange. Nèn ase ta dé to di wa, mbata mam ntaa ngao ang bai?

³⁵ Ange pa arè, Ndil ke madji toï a dé dòi té, ke singa lo nè ke nto nouta toï a kisi dòi té. Tokou ban ngon ke madji toï ke i a koudjè, da barè Ngon lo Allah.

³⁶ Wo, ngoköi Elisabeth ke to bouka dènè waa sem ngon ke dingao. Loshénè to nnè misä ke nè ke dèdè mmarè dènè ke ao katé.

³⁷ Mbata tar kada ke ngeng ke Allah goto.

³⁸ Marie pana. Wo, mam nto ngonlokisi ke dènè lo Mbaibé Seigneur, are né toï dé rom té deo té lo tar loi. Ange ao nga ïyè.

³⁹ Ndò té ke nèn, Marie ï ao loshénè loshénè mare nange té ke err to tén, ke béh té kada lo Juda.

⁴⁰ Nè nao mè kei té lo Zacharie, nda laphia Elisabeth.

⁴¹ Tokou Elisabeth wo laphia lo Marie, ngon ï mèa té, ke mè Elisabeth dousou ke Ndil ke madji toï.

⁴² Nè mpa ke tarr, I ke éh madji nya horo dènèdjé té, ke ngon ke téh mei té to madji nya.

⁴³ Tar ke madji nèn dé rom té mba di wa, mbata kö Mbaibé Seigneur lom dé rom té?

⁴⁴ Mbata wo, tokou ndou laphia loi oso mbim té, ngon ke mem té ï ke rònèl.

⁴⁵ Madji éh ke nè ke no mèa té mbä, tar toï ke Mbaibé Seigneur oula arè a dé tokou ban.

⁴⁶ Marie pana, Mem piti Mbaibé Seigneur,

⁴⁷ Ke ndil lom isi ke rònèl mè Allah té, ndjè kadjim.

⁴⁸ Mbata nè no tar ke ba lo ngonlokisi la ke dènè. Mbata wo, sar loshénè gel dooudjé toï da barem to dènè ke madji wota.

⁴⁹ Mbata nè ke nisi ke singa nya, nda tokou né mbata lom, ria na madji toï.

⁵⁰ Mè madji la to do dooudjé té ke da bel la, sar gel dooudjé té toï bal ke bal.

⁵¹ Nè ntòdjou singa la ke dja, nè nsärè dèdè ke mpiti ròdè ndja ke kedji ke mèdè té.

⁵² Nè nòrou tòkou dooudjé ke ngèndé mbai té lodè, ke nè mpiti dangetédjé.

⁵³ Nè nda baa dèdè ke disi ke boo ndan ke né ke madji, ke nè nare ndjè né kinga ta kao wel ba.

⁵⁴ Nè nouma ngonlokisi la Israël, mbata mè madji la ikè ang.

⁵⁵ Deo kadaba tokou nè mpa nare kadjèdjè, nare Abraham ke gel dooudjé la ke ndò ke ndò.

⁵⁶ Marie isi ke Elisabeth ase nnè mouta, gè té nè ntél béh la.

⁵⁷ Bana ndò koudjou lo Elisabeth dé nga, nè noudjou ngon ke dingao.

⁵⁸ Bokoradjé la ke ngaköèdjé do Mbaibé Seigneur da sa mè madji nya, ke ròdè nèldè sa.

⁵⁹ Ndò té ke djidjo dèdè ndé ta koudja ta mote ngon, ke dèdè ndiki ta kounda ria na Zacharie, deo kadaba tokou ri bèdjè.

⁶⁰ A këndjè pana. Eë, tokou ban ang, da bar ria na Jean.

⁶¹ Dèdè mpa darè, Ri ngoköi kada to tokou ri nèn ang.

⁶² Dèdè nyè djidè dare bèdjè, ta doudjè nè ndiki ri ngon nèn na na wa.

⁶³ Nè ndoudjou mbata maketourou, nè nda mè maketourou té, ria na Jean. Mèdè toï ounda do biä.

⁶⁴ Loshénè loshénè gòsou Zacharie oudja, ke ndë teï, nè mpa tar, nè mpiti Allah.

⁶⁵ Bel da dooudjé toï ke isi ngosiba kedè. Dooudjé pa tar nèn dò nange err té ke Judée toï.

⁶⁶ Dèdè toï ke do tarn lé ngem mèdè té, mpana, Ngon nèn a to di wa? Mbata dji Mbaibé Seigneur éh sa.

⁶⁷ Mè bèdjè Zacharie dousou ke Ndil ke madji toï. Nè mpa tar lo Allah ke daka, mpana,

⁶⁸ Madji éh ke Mbaibé Allah lo Israël, mbata nè ndé no dooudjé la, ke nè nadjidè mbä.

⁶⁹ Nè nare ndjè kadji ke ngeng ï tarr mè kei té lo ngonlokisi la David mbata lodjè.

⁷⁰ Deo kadaba tokou nè mpa deo ta té lo prophètedjé la ke madji toï, ndò té ke leo.

⁷¹ Ke nè na kòroudjè dji ndjè kembaadjé té lodjè, ke djidè té toï ke mbetédjè to.

⁷² Ta da mè madji ke nè nto nare kadjèdjè, ke ta kare mèa woei dò tar kwaana medji té ke madji toï la ang.

⁷³ Tar ke madji ke nè noubou né rè nare bòdjèdjè Abraham,

⁷⁴ Ta karedjè, djèdjè ke nòroudjè dji ndjè kembaadjé té lodjè, ta da koula sa ke bel ang,

⁷⁵ Ta da ke mè ndaa kaï ke gaté gaté nòè té ndò tébe té lodjè toï.

⁷⁶ I ngon, da bari prophète lo nè ke nto wota toï, mbata i a kao kèté no Mbaibé Seigneur té ta da deo la.

⁷⁷ Ta kare dooudjé la geré tar kadji deo kïya né ke madjang lodè.

⁷⁸ Deo mè madji té ke mè ndaa kaï lo Allah lodjè, mbata yèn baa lokarè ke ï ke tarr dé ròdjè té,

⁷⁹ Ta kare lokarè dèdè ke disi londoul té, ke disi kö ndil yo té, ta tòdjou gòldjè ta ndja deo mè woul té.

⁸⁰ Ngon nèn tokou ke nè ndé mongou deo ndil té. Nè nisi mè kòr té nderèng ndò ke nè ntéh daka kem dooudjé té lo Israël.