Koula 8 - Testament ke Siki 1960 (Kabba Laka)

¹ Saul ndiki gè kedè ta tòlè. Ndò té ke nou tokou ngätar oso do dooudjé té ke kei Allah té ke Jérusalem, dèdè toï nsärèna nange té ke Judée ke Samarie toï, ndjè kouladjé ndja nai.

² Mare dooudjé ke ngem tar lo Allah doubou Etienne, dèdè nnè nya mbata la.

³ A Saul toudjou dooudjé ke kei Allah té, nè nao mè kei té kada kada, nwaa dingaodjé ke dènèdjé, niladè kei koula té.

⁴ Tokou ban dèdè ke nsärèna, dao loou té ke dang dang, dèdè mpa tar lo Allah.

⁵ Philippe ao mare béh té ke Samarie kada, nè mpa tar lo Christ naredè.

⁶ Dooudjé baya baya ndiki gè naaté ke tar ke Philippe pa aredè, tokou dèdè do tar la ke do né tòdjou ke nè nda.

⁷ Mbata ndildjé ke madjang ao téh mè dooudjé té baya baya ke to ndjè woeidjé, dèdè dourouki ke tarr. Dooudjé baya baya ke debe ròdè woei, ke dèdè ke doso mete, rò too lodè goto.

⁸ Tokou ban koukou dousou mè béh té nèn nya.

⁹ Doou kada éh nou ria na Simon, nè nto ndjè ndön né mè béh té dongor, ke nare mè dooudjé ke Samarie ounda dò biä, nè mpana nè ndja nto to tokou doou.

¹⁰ Dèdè toï do tar la madji, dooudjé ke ngadji ke tokou dooudjé mpana, Doou nèn to singa lo Allah nèn ke dèdè mmar to Tokou né ke bo.

¹¹ Dèdè do tar la mbata ndò gè eo nè nare mèdè ounda dò biä ke né ndön la ke nè nda.

¹² A gè té dèdè do mèdè té tokou Philippe pa tar ke madji lo béh ko lo Allah ke ri Jésus Christ, dèdè dinga baptême, dingaodjé ke dènèdjé tò.

¹³ Simon ndja wo mèa té tò, gè té ke nè ninga baptême mbä, nè nao nisi ke Philippe. Mèa ounda do biä tokou nè no né tòdjou ke tokou né mori ke Philippe da.

¹⁴ Tokou ndjè kouladjé ke isi Jérusalem té wo na dooudjé ke Samarie té oun tar lo Allah mbä, dèdè doula Pierre ke Jean ròdè té.

¹⁵ Tokou dèdè ndé mbä, dèdè ndoudjou Allah mbata lodè, mbata kare dèdè dinga Ndil ke madji toï.

¹⁶ Mbata nè nai ndé do doou té kada ang bai, dèdè dinga baptême ke ri Mbaibé Jésus ba.

¹⁷ Tokou ban Pierre ke Jean dila djidè dodè té, dèdè dinga Ndil ke madji toï.

¹⁸ Tokou Simon wo dèdè dinga Ndil deo kila dji ndjè kouladjé do dooudjé té, nè ndiki ta karedè narè,

¹⁹ Mpana, Aremdjé singa nèn to, tokou ban doou ke ma mila djim dè té ase kinga Ndil ke madji toï tò.

²⁰ A Pierre pa arè, Narè loi toudjou deo kadaba sei, mbata i ounda mei ta kinga né kinga ba lo Allah deo narè té.

²¹ Mare koula aséh tar nèn kada to tar loi ang, mbata mei to gatang kem Allah té.

²² Tokou ban mbeté kedji né da ke madjang loi nèn, edoudjou Mbaibé Seigneur baa Allah a kïya kedji ke madjang ke to mei té.

²³ Mbata ma mo i to mè ongou té, ke mei ate käng ke né ke madjang toï.

²⁴ Simon tél tar pana, Edoudjidjé Mbaibé Seigneur mbata lom, mbata tar kada ke sésè epaidjé nèn ase kare dé dòm té ang.

²⁵ Tokou ban, tokou dèdè mpa tar nadji, ke dèdè ntòdjou tar lo Mbaibé Seigneur mbä, Pierre ke Jean ntél dao ke Jérusalem té, dèdè mpa tar ke madji béh té ke Samarie baya baya.

²⁶ A ange lo Mbaibé Seigneur kada pa are Philippe, Ï tarr ao er ke ber, ao ke deo bo ke téh Jérusalem ao Gaza. Deo nèn to deo ke mè kòr té.

²⁷ Nè nï tarr, nè nao. Wo doou kada ke to Éthiopien, doou ke òrou gemè, nè nto tokou ndjè koula lo Candace, mbai ke dènè lo dooudjé ke Éthiopie. Nè nto ndjè ngem né kinga toï lo dènè nèn. Nè nao Jérusalem té mbä ta wal Allah.

²⁸ Tokou nè nao ntél, nè nisi mè pousse sounda té, nè nao ntoura maketourou lo prophète Ésaïe.

²⁹ Ndil ndja pa are Philippe, Ao ngosiba mbòr pousse té nèn.

³⁰ Tokou ban Philippe aïn ao rè té, nè no doou nèn ao toura maketourou lo prophète Ésaïe. Nè ndoudjè, I geré né ke ao toura nèn wa?

³¹ Nè mpana, Mase ta geré to di, tokou doou tòdjoum ang wa? Nè ndoudjou Philippe ta kai kao kisi sa.

³² Tar ke nè ntoura mè maketourou té lo Allah to ban, Nè nto tokou bati ke dèdè dao sa ta tòlè, Aséh tokou ngon bati ke isi tè moundou nò dooudjé té ke ngisa bi rè, Tokou ban nè nteï tè ang.

³³ Mè tar ròkoul té la dèdè mbeté ta gange saria la gaté gaté, Na a kase tòdjou gel dooudjé la wa? Mbata dòrou tébe la ke nange nèn.

³⁴ Nè ke nòrou gemè mpa nare Philippe, Mam ndoudji, prophète pa tar lo doou ke di wa, tar la ndja aséh tar lo mare doou wa?

³⁵ Tokou ban Philippe òrou tè, nè nounkotè ke tar maketourou nèn, nè ntòdjè tar ke madji lo Jésus.

³⁶ Tokou dèdè dao deo bo, dèdè ntéh mare man té, nè ke nòrou gemè mpa, Wo, man to nèn, di a òkou deo ta karem minga baptême wa?

³⁷ Philippe pana, Tokou i wo mei té toï, i ase. Nè ntél tar mpana, Ma mo mem té ke Jésus Christ to to Ngon lo Allah.

³⁸ Nè nare pousse arr loou kada, dèdè djokem dao mè man té, Philippe ke nè ke nòrou gemè, ke Philippe dè baptême.

³⁹ Tokou dèdè ntéh man ke daka, Ndil lo Mbaibé Seigneur oun Philippe ke dang, nè ke nòrou gemè noè marè ang nga. Nè nao deo la ke koukou nya.

⁴⁰ Dinga Philippe béh té ke Azot, tokou nè nao ndai, nè mpa tar ke madji mè béh té toï nderèng nè ntéh Césarée.