Koula 7 - Testament ke Siki 1960 (Kabba Laka)

¹ Mbai lo ndjè kòrdjé pana, Yèn to tokou tokoro wa?

² Etienne pana, Ngakömdjé ke bòidèdè, woidjé tar lom. Allah ke ndjè ndokoo téh rò kadjèdjè Abraham té, ndò ke nè nisi Mésopotamie té, dongor ke nè nisi Charran té.

³ Nè mpa narè, Ïya béh loi, ïya ngaköidjé, ao béh té ke ma ma tòdji.

⁴ Tokou ban nè ntéh ke nange té ke Chaldée, nao nisi béh té ke Charran. Goukoudang bèdjè woei mbä, Allah orè béh té ke nou, narè ndé béh té ke nèn ke sésè isidjé kendé bashénè.

⁵ Ke nè narè ndòò to né ndouba ke nange nèn ang, ngadji ngal ase gòlè ang, a nè mpa nè na karè nange nèn mbata la ndja ke nganè ke a dé goukou, nai ngonè goto bai.

⁶ Allah pa tar tokou ban, gel dooudjé la a kisi ndjè mbaadjé mè béh tè lo mare dooudjé. Dèdè da kwaadè bere ke da dadè madjang bal kòr sò.

⁷ Allah pana, Ma ma gange saria dò dooudjé té ke dèdè nda koula lodè, ke goudoudang dèdè da téh daka, dèdè da walem loou té ke nèn.

⁸ Allah are Abraham tar koudja ta motè. Tokou ban Abraham oudjou Isaac, ke nè noudja ta motè tokou ndò la ase djidjo, ke Isaac oudjou Jacob ke Jacob oudjou kadjèdjè dòkou gérè djo.

⁹ Mbata mè da kadjèdjè do Joseph té, dèdè ndokè ke béh Egypte té, a Allah éh sa.

¹⁰ Nè nòrè mè né ongou té toï, nè narè ta dé madji, ke nè narè kemkarè no Pharaon té, mbaibé ke Egypte té, ke mbaibé arè tè ta kisi ndjè ngem Egypte ke kei la toï.

¹¹ Boo biriri oso do nange Egypte té ke Canaan té toï, ke né ongou da nya, ke kadjèdjè inga mourou ang.

¹² Tokou Jacob wo mourou éh béh Egypte té, nè noula kadjèdjè dongor gar kada.

¹³ Ndò ke dao gar djo Joseph tòdjou tar la ke daka are ngaköèdjé, tokou ban Pharaon geré tar lo gel dooudjé lo Joseph.

¹⁴ Joseph oula bar bèdjè Jacob ke dooudjé la toï ta dé rè té, déh dooudjé dòshiré gérè mi.

¹⁵ Jacob ao ber ke béh Egypte té. Nè noei, nè ke kadjèdjè to.

¹⁶ Dèdè doun nindè ntél dao kedè béh té ke Sichem, dèdè diladè bwa yo té ke Abraham ndoko ke narè argent ke ngandjé lo Hémor ke Sichem té.

¹⁷ A tokou ndò dé ngosiba ta kinga né ke Allah pa are Abraham leo, dooudjé tokou, ke dèdè ndé baya baya Egypte té,

¹⁸ Nderèng mare mbaibé ï ta ko béh Egypte, nè ngeré Joseph ang.

¹⁹ Mbaibé lé da gousou ke gel dooudjé lodjè, nè nda né ngeng ta kare kadjèdjè ila ngandè koro mbata kare dèdè disi ke tébe ang.

²⁰ Ndè tén lé doudjou Moïse mbä, ke nè nkoura nya kem Allah té. Dèdè ngemè nnè mouta mè kei té lo bèdjè.

²¹ Tokou dèdè dilè daka mbä, ngon ke dènè lo Pharaon ounè ta ngemè tokou ngonè ndja.

²² Dèdè ntòdjou Moïse kemkarè lo dooudjé ke Egypte té toï. Nè nisi ke singa ke tar pa la ke koula la.

²³ Tokou bal la ase dòsò, nè nedji mèa té ta kao ko ngaköè, ngandjé lo Israël.

²⁴ Tokou nè no dao nda madjang ke mare kada, nè nouma doou ke dao ndè madjang deo kounda té, nè nounda Egyptien.

²⁵ Nè nedji tokou ngaköè geré Allah ata kadjidè deo dja té, a dèdè ngeré ban ang.

²⁶ Ndò ke goukoudang nè ntéh ròdè té tokou dèdè dao mmainatar, nè ndiki ta ndedjidè ta kisi madji, nè mpana, Dooudjé, sésè etoidjé ngaköna, mbata di a edaidjé madjang horosè té wa?

²⁷ A doou nèn ke da madjang ke ngoköè ngese Moïse ke dang, pana, Na ari ta kisi mbai ke ndjè gange saria lodjè wa?

²⁸ I ndiki ta tòlem tokou i toï Egyptien takenè wa?

²⁹ Mbata tar nèn Moïse aïn, nè nao nisi to ndjè mbaa nange té ke Madian, loou ke nè noudjou nganè ke dingao djo.

³⁰ Goukoudang bal dòsò ndai mbä, ange ke dara kada téh rè té mè kòr té ke tokou err té ke Sinaï, mè ndò pourou mè berkam té.

³¹ Tokou Moïse wo né nèn nè nedji dò né té ke nè no. Tokou nè ndé ngosiba ta ko, ndou Mbaibé Seigneur téh berkam tén lé pana,

³² Mam nto Allah lo kasésè, Allah lo Abraham ke lo Isaac ke lo Jacob, Rò Moïse isa, nè nase ta ko loou ang.

³³ Mbaibé Seigneur pa arè, Òrou ndar ke gòli té, mbata loou ke i arr kendé to nange ke madji toï.

³⁴ Tokoro ma mo né ongou ke da dooudjé lom ke isi Egypte té, ke ma mo kila mè lodè, mam ndé ta kadjidè. Edé loshénè ma ma koulai Egypte té.

³⁵ Moïse, nè ke dèdè mbetè, dèdè ke mpana, Na ari ta kisi mbai ke ndjè gange saria wa? Allah oulè tokou mbai ke ndjè kadjidè tò, deo dji ange té ke téh rè té mè berkam té.

³⁶ Nè nare dooudjé téh daka, goukoudang nè nda né ta kare mè dooudjé ounda do biä, ke né tòdjou béh Egypte té, ke mbòr tòkou man Kasè ke mè kòr té bal dòsò.

³⁷ Yèn to Moïse nèn ke pa are ngandjé lo Israël, Allah a koula prophète kada karesè ke ï horo ngakösè té, deo kadaba tokou ma ndja.

³⁸ Yèn to nè ke nisi horodè té mè kòr té ke ange ke pa arè dò err Sinaï té, ke néh ke kadjèdjè tò, ndò ke nè ninga tar tébe lo Allah ta karedjè.

³⁹ Kadjèdjè mbeté ta ko tar la, a dèdè ngese Moïse ke dang, dèdè ntél dounda mèdè ke Egypte té.

⁴⁰ Tokou dèdè mpa dare Aaron, Eda mare kòr allahdjé aredjè ta kao nòdjè té, mbata Moïse nèn ke aredjè ntéh daka nange té ke Egypte, djèdjè ngeré né ke dè ang.

⁴¹ Dèdè nda ngon mange to kòr lodè ke ndò té ke nou, dèdè ndé ke mare né ta kare kòr nèn, ke ròdè nèldè mbata koula ke djidè da.

⁴² A Allah tél, nè naredè ta wal nédjé ke dara tokou maketourou lo prophètedjé pa, Sésè aremdjé dadjè ke ntòldè ke né polo mè kòr té bal doso wa, O kei lo Israël?

⁴³ Sésè otoidjé kei koubou lo Moloch, ke ndètélendè lo kòr Remphan, Kòrdjé ke sésè edaidjé mbä ta waldè. Ma ma kilasè deo eo giri Babylone té.

⁴⁴ Kadjèdjè éh ke kei koubou tar nadji mè kòr té, deo kadaba tokou nè ke mpa nare Moïse ta da kei nèn, ase ta da né deo kadaba tokou nè no ke né ke Allah tòdjè leo.

⁴⁵ Mare kadjèdjè ke goukou oun kei koubou nèn, dèdè ke Josué, ndò ke dèdè dao ta taa nange lo Gentildjé, ke Allah toubadè ke daka no kadjèdjè té. To tokou ban nderèng ndò té lo David.

⁴⁶ Nè ke ninga mè madji kem Allah té, ke nè ndoudjou deo ta sange ta da kei kisi mbata Allah lo Jacob.

⁴⁷ A to to Salomon ke da kei mbata la.

⁴⁸ A nè ke nto nouta toï, nisi mè kei té ke dooudjé da ke djidè ang, tokou mare prophète pa,

⁴⁹ Dara to ngèndé kisi lom, Ke nange to to né kongou gòlem té, Di a edaidjé kei karem wa, Mbaibé Seigneur pa, Aséh loou di a to loou kwaa ròm wa?

⁵⁰ Djim da nédjé toï ang wa?

⁵¹ Sè dooudjé ke gòbousè ngeng, ke oudjaidjé kedji ke madjang mèsè té ke mbisè té ang, sésè mbetidjé Ndil ke madji toï ke ndò ke ndò. Deo kadaba tokou kasésè da leo, sésè edaidjé tokou ban tò.

⁵² Prophètedjé ke da, kasésè ngädè ke tar ang wa? Dèdè ntòl dèdè ke mpa tar ke daka dongor kèté ke nè kada ke gaté gaté nao ndé. Nè ke sésè ndokèdjé, etòlèdjé loshénè bai.

⁵³ Sésè ke ingaidjé tar ndedji ke doula né deo té lo angedjé leo, ke sésè ngemidjé tar ndedji nèn ang.

⁵⁴ Tokou dèdè do tar nèn ongou da mèdè nya, dèdè nger ngangedè moï moï no Etienne té.

⁵⁵ A Etienne dousou ke Ndil ke madji toï, aa loou dara, no ndokoo lo Allah, ke Jésus arr dò dji koi Allah té.

⁵⁶ Nè mpana, Woidjé, ma mo dara teï, ke Ngon lo doou arr do dji kòl Allah té.

⁵⁷ Dèdè dourouki ke tarr, dèdè doutou mbidè, dèdè daïngòrou ke dè té naaté.

⁵⁸ Dèdè dilè daka giri béh té, ntilè ke err. Dèdè ke nto nadji nèn dila koubou lodè no gòl basä té kada ke ria na Saul.

⁵⁹ Tokou dèdè dao ntilè ke err, Etienne doudjou Allah pana, Mbaibé Jésus, etaa ndilem.

⁶⁰ Nè nongou mekedjé gòlè nange, nè mpa ke tarr, Mbaibé Seigneur ïya né ke madjang nèn dèdè té ang. Tokou nè mpa ban mba nè ntibi.