Koula 5 - Testament ke Siki 1960 (Kabba Laka)

¹ Mare doou kada ria na Ananias ke dènè la Saphira nlabe mare ndòò la,

² Nè niyaa mare narè goukou, dènè la geré tar nèn to. Nè noun mare narè nila nò gòl ndjè kouladjé té.

³ A Pierre pana, Ananias, mbata di a Satan dousou mei ta pa tar ngem kare Ndil ke madji toï, ta kiyaa mare narè ndòò loi goukou wa?

⁴ Tokou elabe ndòò loi ang bai, to ndòò loi ang wa? Goukoudang i labe ndoo mbä, narè to loi ang wa? Mbata di a i edji tar nèn mei té wa? I ere ngem ke dooudjé ang, a i ere ngem ke Allah.

⁵ Tokou Ananias wo tar nèn, nè noso nange, nè noei. Tòkou bel da dèdè toï ke do tar nèn.

⁶ Basädjé ï to ninè, dounè ke daka, dèdè ndoubè.

⁷ Goukoudang kade ndai mare mbä ase kade mouta, dènè la dé mè kei té, nè ngeré né ke dé nèn ang bai.

⁸ Pierre pa arè, Epa arem tokou sésè elabidjé ndòò mbata narè ban. Nè mpana, Aa, tokou ban.

⁹ Pierre pa arè, Mbata di a sésè djokem ndikidjé gè mba ta kere Ndil lo Mbaibé Seigneur wa? Wo, gòl dooudjé ke doubou ngaoidjè mbä, dèdè darr tadeo kei té, dèdè da kouni ke daka.

¹⁰ Loshénè loshénè nè noso nange nò gòl Pierre té, nè noei. Tokou basädjé dé mè kei té dèdè do ninè, dèdè dounè ke daka, dèdè ndoubè mbòr ngaoèdjè té.

¹¹ Tòkou bel da dooudjé ke mè kei Allah té toï, ke dèdè toï ke do tar nèn.

¹² Deo té ke dji ndjè kouladjé da horo dooudjé té né tòdjou, ke né ta kare mè dooudjé ounda do biä nya. Dèdè toï mbona naaté kare kei té lo Salomon.

¹³ Mare doou kada ke horo dooudjé té ase mbòna ke ndjè kouladjé ang, a dooudjé pitidè nya.

¹⁴ Mare dooudjé wota dongor ke wo mèdè té mbòna kedè rò Mbaibé Seigneur té, dingaodjé ke dènèdjé baya baya tò.

¹⁵ Tokou ban dèdè doto ndjè rò toodjé deo bo, diladè dò twa té, dedji mbata tokou Pierre ao ndai ndilè ase ndai do maredjé té ke horodè té.

¹⁶ Dooudjé ke béh ngosiba ke Jérusalem mbòna to, dèdè doto ndjè rò toodjé ke ndjè ndildjé ke madjang, ke ròdè toï dé madji.

¹⁷ A mbai lo ndjè kòrdjé ï tarr ke dèdè toï ke disi sa, ke dèdè ke nto Sadducéendjé, mè dadè nya.

¹⁸ Dèdè dwaa ndjè kouladjé, diladè mè tòkou kei koula té.

¹⁹ Ke tilti ange lo Mbaibé Seigneur kada òrou tadeo kei koula, ao kedè daka, pana,

²⁰ Abidjé, arridjé mè tòkou kei Allah té, epaidjé tar tébe nèn toï are dooudjé.

²¹ Tokou dèdè do tar nèn, dèdè dao mè tòkou kei Allah té ke sindò, dèdè ntòdjou tar. Mbai lo ndjè kòrdjé dé ke dèdè ke disi sa, nè mmar ndjè gange sariadjé ke tòkou dooudjé lo ngandjé lo Israël toï ta mbona naaté. Nè noula koula kei koula té ta kare ndé ke ndjè kouladjé.

²² A tokou padjadjé dé, dèdè dingadè mè kei koula té ang, dèdè ntél, dèdè mpana,

²³ Djèdjè djo tadeo kei koula outou madji toï, ke ndjè ngem ta kei arr tadeo kei té, a tokou djèdjè djòrou tadeo kei, djèdjè djinga doou kada mè té ang.

²⁴ Tokou mbai ke tòkou kei Allah té ke tòkou ndjè kòrdjé do tar nèn, mèdè sangedè nya mbata lodè, mèdè edji nya tar nèn a dé tokou tar di wa.

²⁵ Doou kada dé pa aredè. Dooudjé ke ongidjédè kei koula té, dèdè darr mè tokou kei Allah té, dao ntòdjou dooudjé tar.

²⁶ Tokou ban mbai ke tokou kei Allah té ke padjadjé dao dwaadè ndé kedè, dèdè ndadè ke singa ang mbata dèdè nda bel mbata dooudjé a tiladè ke err.

²⁷ Tokou dèdè ndé kedè mba, dèdè daredè disi nò ndjè gange sariadjé té. Mbai lo ndjè kòrdjé doudjoudè,

²⁸ Mpana, Djèdjè ndangesè ta tòdjou tar ke ri nèn ang, woidjé loshénè sésè edousidjé Jérusalem ke tar tòdjou losè, ke sésè ndikidjé ta kila tar mese lo doou nèn dòdjè té.

²⁹ A Pierre ke ndjè kouladjé ntél tar, dèdè mpana, Djèdjè djase ko tar lo Allah wota lo dooudjé.

³⁰ Allah lo kadjèdjè are Jésus ï tarr, nè ke sésè etòlèdjé tokou etòèdjé do kake té.

³¹ Allah wèè ke tarr do dji kòlè té ta karè nisi mbai ke ndjè kadji, ta kare dooudjé lo Israël ta mbeté kedji né da ke madjang, ke ta kïya né ke madjang lodè.

³² Djèdjè nto tar nadji lo né nèn, ke Ndil ke madji toï ke Allah are dèdè ke do tar la to tar nadji to.

³³ Tokou dèdè do tar nèn ongou da mèdè nya, dèdè ndiki ta tòldè.

³⁴ A Pharisien kada horo ndjè gange sariadjé té, ria na Gamaliel, ndjè tòdjou tar ndedji ke dooudjé toï òsou gadjè, nè nï tarr mpa tar ta kare dïya ndjè kouladjé karedè dao daka ngadji.

³⁵ Nè mpa naredè, Dooudjé lo Israël, ngemidjé ròsè madji né ke ndikidjé ta da ke dooudjé nèn.

³⁶ Mbata dongor ndò té ke nèn, Theudas ï tarr, nè mpana nè ndja nto to tokou doou, dooudjé ase kòr sò mbona sa, a nè ninga yo, ke dèdè toï ke dao gè té nsärèna to, ke tar lodè dé to né ke ba.

³⁷ Goukoudang ke go doou tén, Judas ke Galilée té ï ndò da ri dooudjé maketourou té. Nè nòrou mare dooudjé gè té. Nè noei to, ke dèdè toï ke dao gè té nsärèna dang dang.

³⁸ Tokou ban ke tar nèn bokonè, ma mpa maresè, òridjé dooudjé nèn ang, ïyaidjédè ba, mbata tokou tar nèn aséh koula nèn to kä dooudjé, né na toudjou.

³⁹ A tokou né nto ngä Allah, sésè a kasidjé ta toudjoudè ang. Baa da kosè to dooudjé ke ndjè da dòò ke Allah.

⁴⁰ Tokou ban dèdè do tar ndedji la, ke tokou dèdè mmar ndjè kouladjé ròdè té mba, dèdè ntoundadè ke dèdè ndangedè ta pa tar ke ri Jésus ang, dèdè dïyadè dare dao.

⁴¹ Tokou ban dèdè dï ntéh no ndjè gange sariadjé té, mèdè koukou nya mbata Allah wodè madji ase ta kinga ongou né ròkoul mbata ria.

⁴² Ndò toï mè tokou kei Allah té, ke mè kei té lodè, dèdè dïya ta tòdjou tar ang, ke ta pa tar ke madji lo Jésus ke nè nto Christ ndja.