Koula 4 - Testament ke Siki 1960 (Kabba Laka)

¹ Tokou dèdè nai mpa tar ke dooudjé, ndjè kòrdjé ke mbai ke tòkou kei Allah té, ke Sadducéendjé ndé dodè té.

² Mèdè toodè mbata dèdè ntòdjou tar dooudjé, ke dèdè ntòdjou tar kï mè bwa yo té mè Jésus té.

³ Dèdè dwaadè, diladè kei koula té ta ngebe bara, mbata loou ndoul mbä.

⁴ Maredjé baya baya ke horodè té ke wo tar ndja, do mèdè té, dèdè ngosiba ke dooudjé dourou mi.

⁵ Ke bara ke si, mbaidjé lodè ke tòkou dooudjé ke ndjè da maketourou ndedjidjé mbòna naaté Jérusalem té.

⁶ Ke Anne mbai lo ndjè kòrdjé, ke Caïphe ke Jean ke Alexandre, ke dèdè toï ke nto to gel mbaidjé lo ndjè kòrdjé.

⁷ Tokou dèdè dila Pierre ke Jean horodè té, dèdè ndoudjoudè, Ke singa lo na aséh ke ri na a sésè edaidjé né nèn wa?

⁸ Tokou ban Pierre dousou ke Ndil ke madji toï, pa aredè, Mbaidjé lo Juifdjé ke tòkou dooudjé,

⁹ Tokou ao esangidjé tar lodjè bokonè mbata né ke madji ke nda ke ndjè rò too nèn, ke ka deo di a doou nèn isi madji wa,

¹⁰ Ase kare egeridjé tar nèn toï, ke dooudjé lo Israël toï tò, ke deo té lo ri Jésus Christ ke Nazareth, nè ke sésè etòlèdjé do kake dèse té, nè ke Allah arè nï tarr mè bwa yo té, deo té la ndja doou nèn arr horosè té ke rè ke madji.

¹¹ Jésus to err nèn ke sè ndjè da kei mbetidjé mbä, ke dé to tòkou kikil kei.

¹² Kadji to mè mare doou kada ang, mbata mare ri kada goto ko dara té ke to horo dooudjé té ke a kase kadjidjè.

¹³ Tokou ban, tokou dèdè do bel lo Pierre ke Jean goto, ke dèdè ngeré ke Pierre ke Jean to dooudjé ke geré maketourou ang, dèdè nto dooudjé ba, mèdè edji. Dèdè ngeré ke Pierre ke Jean disi ke Jésus mba nga.

¹⁴ Mbata dèdè do doou ke ndjè rò too ke rè dé madji arr horodè té, dèdè déh ke tar ta tél né karedè ang.

¹⁵ Tokou dèdè mpa daredè ta kao daka ke horo ndjè gange sariadjé té, dèdè mpa horodè té, sariadjé té, dèdè mpa horodè té,

¹⁶ Mpana, Djèdjè dja da di ke dooudjé nèn wa? Mbata deo té lodè tokou né mori téh kem dooudjé té ke Jérusalem toï, djèdjè djase ta mai ang.

¹⁷ A ta kare tar nèn ndja horo dooudjé té marè ang nga, ase kare djèdjè ndangedè ta pa kare mare doou kada ke ri nèn ang nga.

¹⁸ Tokou ban dèdè mmardè, ke dèdè ndangedè ta pa aséh ta tòdjou tar ke ri Jésus ang nga.

¹⁹ A Pierre ke Jean ntél tar aredè, Di a to gaté gaté kem Allah té, ta ko tar losè wota tar lo Allah, sésè asidjé gange tar nèn.

²⁰ Mbata djèdjè djase ta pa tar ke djèdjè djo ke kemdjè ke djo ke mbidjè mbä to.

²¹ Tokou dèdè ndangedè bai, dèdè dïyadè dare dao, mbata dèdè dinga deo ta koundadè ang mbata lo dooudjé, mbata dooudjé toï òsou gadji Allah mbata né ke dèdè nda mbä.

²² Mbata doou ke inga madji deo té lo né mori nèn, bal la ase wota bal doso.

²³ Tokou dèdè dïyadè dare dao, dèdè dao rò ndjè bokoradjé té lodè. Dèdè mpa tar ke tòkou ndjè kòrdjé ke tòkou dooudjé pa aredè.

²⁴ Tokou dèdè do tar nèn, dèdè mpa naaté dare Allah, mpana, Mbaibé Allah, i ke da dara ke nange nèn, ke tòkou man ke né toï ke mèdè té,

²⁵ Ke deo té lo ta bòdjèdjè David, ndjè koula loi, I pa deo té lo Ndil ke madji toï, Mbata di a Gentildjé pa ke ongou, Ke dooudjé dang dang edji tar ba ba wa?

²⁶ Mbaibédjé ke nange nèn ï tarr, Ke mbaidjé mbona naaté mba ta mbeté Mbaibé Seigneur ke ta mbeté Christ la.

²⁷ Mbata tokoro mè béh té nèn, Hérode ke Ponce Pilate djokem, ke Gentildjé ke dooudjé lo Israël mbona naaté ta mbeté Ngon ke madji loi Jésus, nè ke i ila oubou dè té mbä.

²⁸ Dèdè mbòna ta da né ke dji ke mei edji leo ta karedè nda.

²⁹ Loshénè Mbaibé Seigneur, wo tar ndange lodè, are djèdjè ndjè kouladjé loi ta pa tar loi ke bel kada ang.

³⁰ Tokou i oula dji ta kòrou rò too ke ta da né tòdjou, ke né ta kare mè dooudjé ounda do biä, deo té lo ri Ngoni Jésus ke madji toï.

³¹ Tokou dèdè ndoudjou Allah mbä, loou ke dèdè disi kendé yè, ke mèdè toï dousou ke Ndil ke madji toï, ke dèdè mpa tar lo Allah ke bel ang.

³² Dooudjé toï ke wo mèdè té, dèdè disi ke mè kadaba ke kedji kadaba, ke doou kada pa ang, né ke to dja té to né la ndja. Dèdè mbòn né lodè toï naaté mbata dèdè toï.

³³ Ndjè kouladjé pa tar nadji ke singa nya do tar kï mè bwa yo té lo Mbaibé Seigneur. Tokou mè madji to dodè té toï.

³⁴ Doou kada horodè té isi ba ang, mbata dèdè toï ke disi ke ndoo aséh kei, dèdè nlabe toï. Dèdè doun narè né ke dèdè nlabe mbä,

³⁵ Dila narè nèn no gòl ndjè kouladjé té, baa dèdè nkai dare dooudjé kada kada asedè tokou né doudè.

³⁶ Tokou ban Joseph, nè ke ndjè kouladjé ounda ria na Barnabas, yèn pana, Ngon ndedji, ke gel Lévi ke dèdè doudjè béh Chypre té,

³⁷ Nè nlabe ndòò la, nè noun narè nila nò gòl ndjè kouladjé té.