Koula 3 - Testament ke Siki 1960 (Kabba Laka)

¹ Pierre ke Jean ao ta kao tòkou kei Allah té ke kade ke to ka doudjou Allah, kade tél ase djikada to kade doudjou,

² Dooudjé oto doou kada ke doudjè to ndjè mete. Ke ndò ke ndò dèdè dïyè tadeo tòkou kei Allah té, ria na Koura, ta koi né dji dooudjé té ke ao mè tòkou kei Allah té.

³ Tokou nè no Pierre ke Jean dao ta kande mè tokou kei Allah té, nè ndoudjoudè mbata koidè né.

⁴ Pierre ke Jean dèè nya, nè mpana, Wodjè.

⁵ Nè naadè nya mbata nè nedji pana da karè mare né.

⁶ Pierre pana, Narè aséh lor to djim té ang, a né ke to djim té ma mari, ke ri Jésus Christ ke Nazareth, ï tarr, ndja.

⁷ Pierre waa dja ke kòl, nouè ke tarr. Loshénè loshénè gòlè ke sèngelè gòlè inga singa.

⁸ Nè nkoudja, nï tarr narr, nè ndja, nè nao mè tòkou kei Allah té kedè, nao ndja, nao nkoudja ke nao mpiti Allah.

⁹ Dooudjé toï woè nao ndja ke nao mpiti Allah.

¹⁰ Dèdè ngeré nto nè ke nisi tadeo tòkou kei Allah té, ria na Koura, ta koi né, mèdè sangedè ke mèdè ounda dò biä mbata né ke da doou nèn.

¹¹ Tokou nè nao ngange Pierre ke Jean, dooudjé toï aïngorou ròdè té kare kei té lo Salomon, mèdè ounda do biä nya.

¹² Tokou Pierre wo tar nèn, nè mpa nare dooudjé mpana. Dooudjé lo Israël, mbata di a mèsè sangesè mbata tar nèn wa, aséh mbata di a aaidjédjè ban wa, tokou to singa lodjè ndja aséh tar ke madji lodjè ndja ke are doou nèn ta ndja wa?

¹³ Allah lo Abraham ke lo Isaac ke lo Jacob, Allah lo kadjèdjè òsou gadji Ngonè Jésus mbä, nè ke sésè wèèdjé ke mbetédjè nò Pilate té, tokou Pilate ndiki ta kïyè.

¹⁴ A sésè mbetidjé ndjè kada ke madji toï ke gaté gaté toï mbä, ke sésè edoudjidjé ta karesè ndjè toï doou mbä.

¹⁵ Sésè etòlidjé Mbai tébe mba, a Allah arè nï tarr mè bwa yo té. Djèdjè nto tar nadji tar nèn.

¹⁶ To ria, ke ko mè té ke ria ke are doou nèn singa ke sésè woèdjé ke egerèdjé. To ko mè té deo té lo Jésus ke are doou nèn rò ke siki kemsè té toï.

¹⁷ Loshénè ngakömdjé, mam ngeré ke sésè edaidjé ban mbata sésè egeridjé gatang, deo kadaba tokou mbaidjé losè da tokou ban to.

¹⁸ A tar ke Allah pa dongor ke ta prophètedjé toï ke Christ la ase kinga né ongou, tokou ban nè nda toï mbä.

¹⁹ Tokou ban mbetidjé kedji né da ke madjang losè, etélidjé bai ta kare mè Allah ase ta kïya né ke madjang losè, ta kare ndò kinga rònèl ta dé ke rò Mbaibé Seigneur té.

²⁰ Tokou ban nè na kase koula Christ ndja ke nè mmarè ke daka mbata losè, Jésus ndja.

²¹ Nè ke dara ase ta ngemè sar ndò da né toï ke Allah pa ta prophètedjé té la ke madji dongor kèté leo.

²² Moïse pana, Mbaibé Allah a koula prophète kada karesè ke ï horo ngakösè té, deo kadaba tokou ma ndja. To tar losè ta ko tar toï ke nè na pa karesè.

²³ Tar a dé tokou ban, dooudjé kada kada toï ke wo tar lo prophète nèn ang, na toudjoudè toï horo dooudjé té.

²⁴ Prophètedjé toï ke pa tar mbä, sar Samuel ke dèdè ke ndé gè té, dèdè mpa tar ndò nèn toï to.

²⁵ Sésè etoidjé ngandjé lo prophètedjé, ke ngandjé lo tar ke Allah to are bòsésè mba, tokou nè mpa nare Abraham, Ke mè ngandjé té loi gel dooudjé toï ke nange nèn a kinga madji.

²⁶ Allah ke are Ngonè ï tarr, noulè ròsè té dongor, ta da madji kesè, ta télsè kada kada toï ta kïya né ke madjang losè.