Koula 2 - Testament ke Siki 1960 (Kabba Laka)

¹ Tokou ndò Pentecôte dé mba, dèdè toï mbona loou kadaba.

² Loshénè loshénè tar téh dara, dé tokou lél bourä. Nè ndousou kei toï ke dèdè disi kendé.

³ Né téh ròdè té, né tokou ndò pourou baya ke kai kada kada, disi do dooudjé té kada kada toï.

⁴ Mèdè toï dousou ke Ndil ke madji toï, dèdè mpa tar ke mare ta ke dang dang ke Ndil ndja aredè ta pa.

⁵ Mare dooudjé ke to Juifdjé disi béh Jérusalem té, dooudjé ke ngem tar lo Allah. Dèdè nto gel dooudjé dang dang toï ke isi do nange té nèn.

⁶ Dooudjé baya baya mbòna naaté tokou dèdè do tokou tar nèn. Dodè tourou mbata dèdè kada kada toï do dèdè mpa tar ke ta koudjoudè ndja.

⁷ Mèdè ounda do bia, dèdè dedji nya mpana, Woidjé, dooudjé toï ke pa tar to to dooudjé ke Galilée té ang wa?

⁸ To to di baa djèdjè kada kada toï djo tar koudjoudjè ndja wa?

⁹ Dooudjé Parthe ke dè ke Mèdes, ke Elamit, ke dèdè ke disi Mésopotamie, ke dèdè ke Judée ke Cappodoce ke Pont ke Asie,

¹⁰ Ke dèdè ke Phrygie ke Pamphylie ke Egypte, ke maredjé ke mare nange ke Libye ke to nange té ke Cyrène, ke dooudjé ke to ndjè mbaadjé ke ï Rome té, Juifdjé ke dooudjé ke tourou ròdè to Juifdjé to.

¹¹ Dèdè ke Crétois ke Arabe, djèdjè djo dèdè mpa tar lo tokou koula lo Allah ke ta koudjoudjè kada kada ndja.

¹² Mèdè toï ounda do biä ke mèdè sangedè. Dèdè mpa tar horodè té, Yèn to to di wa?

¹³ Maredjé koukoudè pana, Dèdè nèn vin ke siki dadè.

¹⁴ Pierre ao arr tarr horodè té dòkou gérè kada, nè nila mber mpa naredè, Dooudjé ke Judée, ke sésè toï ke isidjé Jérusalem té, ase kare egeridjé tar nèn, etoukaidjé mbisè ta ko tar lom.

¹⁵ Mbata vin da dooudjé nèn ang tokou sésè edjidjé, mbata kade ï dél ase mouta ba bai.

¹⁶ Yèn to tar ke prophète Joël pa leo,

¹⁷ Allah pa, Ndò ke goukou a dé tokou ban, Ma ma kongou Ndil lom do dooudjé té toï, Ngansè ke dingao ke ngansè ke dènè a pa tar lo Allah, Ke basädjé losè a ko né tokou mare lo ni, Ke boukadjé losè a ko né ke ni baya.

¹⁸ Tokoro, ke ndò té ke nou, ma ma kongou Ndil lom do ndjè kouladjé té lom ke dingao ke ndjè kouladjé té lom ke dènè, ke dèdè da pa tar lo Allah.

¹⁹ Ke ma ma tòdjou né ke dara ke tarr, ta kare mè dooudjé ounda do biä, ke né tòdjou ke nange nèn, tar mese ke pourou ke sa pourou.

²⁰ Kade a tél ndoul, ke nnè a tél mese dongor ndò lo Mbaibé Seigneur dé, ndò ke to tokou ndò ke bo ke tòdjou ndokoo.

²¹ Tar a dé tokou ban, dooudjé kada kada toï ke bar ri Mbaibé Seigneur a kinga kadji.

²² Dooudjé lo Israël, woidjé tar nèn. Jésus ke Nazareth doou ke Allah oulè horosè té ke tokou koula, ke né ta kare mè dooudjé ounda do biä, ke né tòdjou ke Allah da deo té la kemsè té, sésè ndja egeridjé tokou ban.

²³ Jésus nèn ke dèdè dwèè deo té lo tar ke Allah edji mèa té leo ta da, ke tar ke nè ngeré leo, sésè arèdjé dji dooudjé té ke mbeté tar ndedji ta tòlè do kake dèse té.

²⁴ A Allah arè nï tarr mbata nè nòrou né ongou yo mbä, mbata yo ase ta ngemè ang.

²⁵ Mbata David pa tar la, Ma mo Mbaibé Seigneur nòm té ke ndò ke ndò, Mbata nè nisi do dji kòlem té ta kare né a yèm ang,

²⁶ Mbata yèn mem koukou ke ndöm pa ke koukou, tokou ban da rom a kisi ke mè ngebe to.

²⁷ Mbata i a kïya oumam loou té ke djabao ang, ke i a kïya ndjè kada loi ke madji toï ta ndoum ang.

²⁸ I tòdjoum deo tébe mbä, i a kare mem dousou ke koukou mbòri té.

²⁹ Ngakömdjé, ma mase pa tar lo kadjèdjè David madji toï karesè, ke nè noei mba ke dèdè ndoubè to, ke dòbarè to horodjè té bokonè bai.

³⁰ Tokou ban, mbata nè nto prophète, ke nè ngeré Allah tòè ke koubou rè leo, ke Allah a karè ngon kada ke nè na koudjè ta kisi ngèndé béh kö té la,

³¹ Nè no tar dongor ke nè mpa tar kï mè bwa yo té lo Christ mbä, ke nè nai loou té ke djabao ang, ke da rè ndoum ang to.

³² Jésus nèn ke Allah arè nï tarr, djèdjè toï nto tar nadji tar nèn.

³³ Tokou ban mbata Allah wèè ke tarr do dji kòlè té, ke mbata nè ninga ke dji Bòi Allah té tar ke madji lo Ndil ke madji toï, nè nongou yéh nèn ke sésè woidjé ke kemsè ke mbisè.

³⁴ Mbata David ao dara ang, nè ndja mpana, Mbaibé Seigneur pa are Mbaibé Seigneur lom, Isi dò dji kòlem té,

³⁵ Sar mam nda ndjè kembaadjé loi ta karedè ndé to né kongou gòli.

³⁶ Tokou ban are dooudjé ke kei lo Israël toï geré ke tokoro ke Allah are Jésus isi to Mbaibé Seigneur ke to Christ to, Jésus nèn ke sésè etòlèdjé do kake dèse té.

³⁷ Tokou dèdè do tar nèn, bel ourou mèdè té, dèdè mpa dare Pierre ke mare ndjè kouladjé, Ngaködjè, djèdjè dja da di wa?

³⁸ Pierre pa aredè, Mbetidjé kedji né da ke madjang losè, ao ingaidjé baptême kada kada toï ke ri Jésus Christ, nè ke na kïya né ke madjang losè, tokou ban sésè a kingaidjé né kinga ba lo Ndil ke madji toï.

³⁹ Mbata tar nèn to mbata losè ke ngansè, ke to mbata dèdè toï ke disi deo eo, dèdè kada kada toï ke Mbaibé Allah lodjè bardè rè té.

⁴⁰ Bana Pierre pa tar ke mare tar baya baya, ke nè ndedjidè mpana, Etéhdjé are Allah adjisè ke horo gel dooudjé té ke madjang nèn.

⁴¹ Tokou ban dèdè ke do tar la mèdè té, dèdè dinga baptême mbä. Ndò té ke nou dooudjé ngosiba ke dourou mouta mbona kedè.

⁴² Dèdè disi ta ko tar ke ndjè kouladjé tòdjoudè ke mè kadaba, ke ta koukou mourou ke ta doudjou Allah tò.

⁴³ Bel da dooudjé kada kada toï, ke deo né té ke ndjè kouladjé da ta kare mè dooudjé ounda do biä ke né tòdjou nya.

⁴⁴ Dèdè toï ke do mèdè té disi loou kadaba, ke dèdè mbòn né lodè toï naaté mbata dèdè toï.

⁴⁵ Dèdè nlabe ndòò lodè ke né lodè, dèdè nkaina né horodè té kada kada toï asedè tokou né doudè.

⁴⁶ Ndò ke ndò dao tòkou kei Allah té naaté, ke dèdè dön mourou mè kei té lodè, dèdè dön mourou lodè ke mè kada ke koukou.

⁴⁷ Dèdè mpiti Allah, ke dèdè ndé madji kem dooudjé té toï. Ke ndò ke ndò Mbaibé Seigneur mbòna kedè dèdè ke dinga kadji.