Koula 13 - Testament ke Siki 1960 (Kabba Laka)

¹ Mare prophètedjé ke ndjè tòdjou tardjé déh kei Allah té ke Antioche, Barnabas ke Siméon, nè ke dèdè mmarè na Niger, ke Lucius ke béh té ke Cyrène, ke Manahem doou ke mè kei té lo Hérode, mbai ke debe nange té kada, ke Saul.

² Tokou dèdè dao nwal Mbaibé Seigneur ke dïya mourou, Ndil ke madji toï pana, Òridjé Barnabas ke Saul ke daka arem mbata koula ke ma mmardè ta da.

³ Tokou ban, gè té dèdè dïya mourou ke dèdè ndoudjou Allah mba, dèdè dila djidè dodè té, douladè dare dao.

⁴ Tokou ban, mbata Ndil ke madji toï ouladè, dèdè dao ber ke Séleucie té, dèdè dao mè to té nou ta kao nange té ke Chypre.

⁵ Tokou dèdè ntéh Salamine té, dèdè mpa tar lo Allah mè kei Allah té lo Juifdjé. Jean éh kedè ta da kedè tò.

⁶ Tokou dèdè dao do nange té toï ke man goukou girè nderèng Paphos, dèdè dinga doou kada ke to ndjè né ndön, prophète ke ndjè ngem lo Juifdjé ria na Bar-jésus.

⁷ Nè néh ke mbai Sergius Paulus, doou ke ndjè kemkarè. Nè ndja mmar Barnabas ke Saul mbata nè ndiki ta ko tar lo Allah.

⁸ Élymas ndjè né ndön, yèn to tar ke tòdjou ria, nè mbetédè, nè nsange ta tourou mè mbai ta ko mèa té ang.

⁹ A Saul, nè ke dèdè mmarè to Paul tò, dousou ke Ndil ke madji toï, aa Élymas nya.

¹⁰ Nè mpana, I ngon lo Satan, i ke to ndjè kembaa lo né ke gaté gaté, ke mei dousou ke né kere ke né ke madjang toï, ndò di a i a kïya ta toudjou deo ke gaté gaté lo Mbaibé Seigneur wa?

¹¹ Loshénè wo, dji Mbaibé Seigneur to dòi té, kemi a tò ke i a ko kade mbata mare ndò kada kada ang. Loshénè loshénè moum ke londoul oso dè té. Nè mmam loou ta sange dooudjé ta kwaa dja ta tòdjè deo.

¹² Tokou mbai wo tar nèn nè no mèa té, mèa ounda dò biä mbata tar lo Mbaibé Seigneur ke dèdè ntòdjè.

¹³ Bana Paul ke dooudjé ke ao sa doun to Paphos té, dèdè ndé béh té ke Perge ke Pamphylie. Jean ïyadè, nè ntél nao Jérusalem té.

¹⁴ Dèdè ndai deo té ke Perge ntéh béh té ke Antioche ke Pisidie. Ndò sabbat dèdè dao mè kei Allah té, dèdè disi nange.

¹⁵ Gè té dooudjé toura maketourou ndedji ke maketourou lo prophètedjé, mbaidjé ke kei Allah té oula tar are Paul, pana, Ngaködjèdjè, tokou sésè éhdjé ke mare tar ndedji mbata dooudjé, epaidjé.

¹⁶ Tokou ban Paul ï tarr yè dja pana, Dooudjé lo Israël, ke sésè ke ebelidjé Allah, woidjé,

¹⁷ Allah lo dooudjé lo Israël nèn bar kadjèdjè ke daka, ke nè naredè ta dé né piti tokou dèdè disi nange té ke Egypte, ke nè nòroudè kendé ke singa dja.

¹⁸ Nè ngemdè mè kòr té bal ase ngosiba ke bal doso.

¹⁹ Tokou nè ntoudjou mare gel dooudjé shiri ke nange té ke Canaan, nè naredè nange lodè tokou né ndouba mbata bal ase ngosiba ke bal kòr sò gérè dòmi.

²⁰ Gè té nèn nè naredè ndjè gange sariadjé nderèng prophète Samuel.

²¹ Goukoudang dèdè ndoudjou mbata mbaibé, Allah aredè Saul ngon lo Kis, doou kada lo gel dooudjé lo Benjamin, mbata bal dòsò.

²² Tokou nè nòrè ke dang, Allah bar David ta kisi mbaibé lodè, nè ke nè mpa tar nadji la mpana, Ma minga mè David té ngon lo Isaï, doou tokou mem ndiki, nè na da né toï tokou mam ndiki.

²³ Deo gel dooudjé té lo David, Allah are dooudjé lo Israël ndjè kadji ke to to Jésus, deo kadaba tokou nè mpa mbä.

²⁴ Dongor baa nè ntéh, Jean pa tar baptême ta mbeté kedji né da ke madjang are dooudjé lo Israël toï.

²⁵ Tokou Jean ata da koula la toï ase, nè mpana, Sésè edjidjé mam nto na wa? Mam nto nè ang. Eë, kada ao dé gom té, ke ma mase toutou koulaa ndar gèlè té ang.

²⁶ Ngakömdjé, ngandjé lo gel dooudjé lo Abraham, ke sésè horosè té ke ebelidjé Allah, doula tar kadji nèn daredjè mbä.

²⁷ Tar lo dèdè ke disi Jérusalem té ke mbaidjé lodè, mbata dèdè ngeré Jésus ang, ke mbata dèdè ngeré tar ke prophètedjé pa ang, ke dèdè ntoura ndò sabbat té toï, dèdè nda né nèn toï deo kadaba tokou maketourou pa, mbata dèdè ngange saria dò Jésus té mbä.

²⁸ Lé tokou dase kinga né ta gange saria yo dè té ang, dèdè ndoudjou Pilate ta kare ntòlè.

²⁹ Tokou dèdè nda né toï tokou tar ke maketourou pa dè té, dèdè dòrè ke dò kake té, dèdè ndoubè mè bwa yo té.

³⁰ A Allah arè nï tarr mè bwa yo té.

³¹ Ke ndò baya baya nè ntéh ròdè té, dèdè ke dï sa Galilée té dao Jérusalem té. Dèdè nto tar nadji la nò dooudjé té bashénè.

³² Djèdjè ndé ròsè té ke tar ke madji tar nèn ke Allah tò kadjèdèdè leo.

³³ Allah da nèn toï mbä mbata djèdjè ke nto ngandè, mbata nè nare Jésus ï tarr deo kadaba tokou maketourou lo Psaume ke djo pa aredjè, I to ngonem, bokonè mbä ma ke moudji.

³⁴ Dò tar té ke nè nare Jésus ï mè bwa yo té ta tél ta ndoum marè ang nga, Allah pa tar tokou ban, Ma ma kari mè madji ke gaté gaté lo David ke tokoro.

³⁵ Mbata yèn nè mpa mare maketourou Psaume té tò, I a kïya ndjè kada loi ke madji toï ta ndoum ang.

³⁶ Mbata David, gè té ke nè nda né toï tokou Allah edji ta da mbata dooudjé la ndja, nè ntibi, ndoubè ke kèèdjèdèdè, ke rè ndoum mbä.

³⁷ A nè ke Allah arè nï tarr, rè ndoum ngadji ang.

³⁸ Tokou ban ngakömdjé, aridjé mèsè geré, mpa daresè deo té lo Jésus nèn, Allah ïya né ke madjang.

³⁹ Deo té la, dooudjé kada kada toï ke wo mèdè té, dé gaté gate ke né toï ke sésè asidjé dé gaté gaté deo tar ndedji té lo Moïse ang.

⁴⁰ Tokou ban ngemidjé madji, mbata tar ke maketourou lo prophètedjé pa mbä a dé dòsè té ang,

⁴¹ Woidjé sésè ndjè mbeté tar, Edjidjé mèsè té, ke woeidjé, Mbata mam nda koula kada ke ndò losè, Koula nèn tokou doou tòdjousè, sésè a koidjé mèsè té ngadji ang.

⁴² Tokou Paul ke Barnabas dao daka, dooudjé doudjoudè nya ta kare mpa tar nèn daredè marè bai, ndò sabbat té ke goukou.

⁴³ Tokou dooudjé ke mè kei Allah té téh daka mba, mare Juifdjé baya ke mare dooudjé ke tourou ròdè to Juifdjé, dao go Paul té ke Barnabas. Dèdè mpa daredè, dèdè ndedjidè ta kisi madji mè tòkou mè madji té lo Allah ke ndò ke ndò.

⁴⁴ Ndò sabbat té ke goukou, nai ngadjiba dooudjé toï ke mè béh té mbona naaté ta ko tar lo Allah.

⁴⁵ A tokou Juifdjé wo dooudjé ke baya baya nèn, mè dadè nya. Dèdè mbeté tar lo Paul ke dèdè ntadjè.

⁴⁶ Paul ke Barnabas mpa tar ke daka ke bel ang, mpana, To tar lodjè ta pa tar lo Allah karesè dongor kèté. Mbata sésè mbetidjé, sésè egangidjé saria dòsè té ndja ke sésè asidjé kinga tébe ke ke ndò ke ndò ang, woidjé, djèdjè ntourou ròdjè rò Gentildjé té.

⁴⁷ Mbata Mbaibé Seigneur pa aredjè tokou ban, pana, Ma mmari ta dé lokarè mbata Gentildjé, Ta kari dé doou ta karedè tar kadji ngange nange té toï.

⁴⁸ Tokou Gentildjé wo tar nèn, mèdè koukou, dèdè mpiti tar lo Allah, ke dèdè toï ke Allah bardè ke daka dongor ta kinga tébe ke ke ndò ke ndò, dèdè do mèdè té.

⁴⁹ Tar lo Mbaibé Seigneur bar do nange té nou toï.

⁵⁰ Juifdjé ndedji tòkou köbaidjé ke ngem tar lo Allah, ke tòkou dooudjé mè béh té ta sange Paul ke Barnabas ke tar, ke dèdè ntoubadè ke dang nange té lodè.

⁵¹ Paul ke Barnabas tounda boum nange gòldè no dooudjé té, ke dèdè dao Iconium.

⁵² A ndjè kao gè tédjé dousou ke koukou ke Ndil ke madji toï.