Koula 10 - Testament ke Siki 1960 (Kabba Laka)

¹ Mare doou kada isi Césarée té, ria na Corneille, ndjè ngem ndjè pouroudjé dòdòkou, ke ridè na Italienne.

² Nè nto doou ke ngem tar lo Allah, ke nè mmel Allah ke dooudjé ke kei la toï. Nè nare né la nya dooudjé ba, ke nè ndoudjou Allah ke ndò ke ndò.

³ Ndò kada tokou kade ao tél ase djikada, nè no ke ni gaté gaté ange lo Allah kada dé rè té ke pa arè, Corneille.

⁴ Nè nèè ke bel nya, mpana, Di wa Mbaibé? Ange pa arè, Doudjou Allah loi ke né kinga loi ke i are dooudjé ba, téh no Allah té tokou né ke ikè ang.

⁵ Bashénè oula dooudjé Joppé té, aredè ndé ke Simon ke dèdè mmarè na Pierre.

⁶ Nè nisi ke Simon ndjè da ngira, kei la to mbòr tòkou man katé té.

⁷ Tokou ange ke pa sa tar tél mbä, Corneille bar nganlokisidjé la djo, ke ndjè pourou kada ke ngem tar lo Allah horodè té ke ndjè da sa.

⁸ Goukoudang nè mpa tar nèn toï naredè, nè nouladè ke Joppé té.

⁹ Ndò ke goukou tokou dèdè dao deo bo, tokou dèdè ndé ngosiba ke béh, Pierre ao do kei té ta doudjou Allah, ngosiba ke kade arr dana ke ase misä.

¹⁰ Boo dè ke nè ndiki ta kousa né. Tokou dèdè dao nda mourou, Pierre ao ni.

¹¹ Nè no dara teï ke mare né tokou tòkou koubou ao disi ke nange, nto ke tè sò.

¹² Dadjè ke gòl sò ke lidjé ke nange ke eldjé ke dara to mè té.

¹³ Nè no ndou ke pa arè, Ï tarr Pierre, etòl nèn ousa.

¹⁴ A Pierre pana, Eë, Mbaibé Seigneur, mbata ma mousa né ke madjang aséh né yem ndò kada ang.

¹⁵ Ndou tél dé pa arè gar djo, Né ke Allah toko mbä, ebarè to né ke madjang ang.

¹⁶ Né nèn da ban gar mouta, loshénè loshénè dwaa né lé ke dara.

¹⁷ Tokou mè Pierre sangè nya ta geré gel ni ke nè no nèn to di wa, wo, dooudjé ke Corneille ouladè, goukoudang dèdè ndoudjou sè kei lo Simon éh da wa, dèdè darr tadeo kei té.

¹⁸ Dèdè mmar né ke tarr ndoudjou tokou Simon ke dèdè mmarè na Pierre to nou.

¹⁹ Tokou Pierre ao edji do tar ni té lé bai, Ndil ndja pa arè, Wo, dooudjé mouta ao sangi.

²⁰ Ï tarr, edisi nange, ao kedè, emaitar kada ang, mbata ma ndja mouladè.

²¹ Pierre ao ròdè té pana, Mam nto nè ke sésè esangèdjé, edéidjé mbata di wa?

²² Dèdè mpana, Corneille, ndjè ngem ndjè pouroudjé, doou ke gaté gaté ke bel Allah, nè ke dooudjé ke to Juifdjé toï pa tar la tokou madji nya, Allah oula ange la kada ke madji toï are tòdjè ta bari ta dé kei la, ta ko tar tai té.

²³ Tokou ban Pierre bardè, aredè ndé mè kei té, naredè loou to. Ke sindò nè nï tarr nao kedè, ke mare ndjè ke to ngaködjèdjè ke Joppé té ao sa.

²⁴ Mare ndò ke gè té dèdè ntéh Césarée. Corneille ao ngebedè, ke nè mmar ngaköè ke ndjè bokoradjé la ta mbòna naaté.

²⁵ Tokou Pierre ata kande mè kei té, Corneille tila kèmè, noso nange nò gòl Pierre té, nao nwalè.

²⁶ A Pierre wèè ke tarr pana, Ï tarr, ma ndja nto doou tò.

²⁷ Tokou Pierre ao pa sa, nè nao mè kei té, nè no dooudjé baya ke mbòna.

²⁸ Nè mpa naredè, Sésè ndja egeridjé deo tar ndedji té to tar lo doou ke to Juif ta mbòna aséh ta kisi ke mare doou kada ang ke to doou ke dang, a Allah tòdjoum ke ma mase bar mare doou madjang ang aséh doou to yem ang.

²⁹ Tokou ban, tokou i oula ebarem mbä, mam ndé, mam mbeté ang. Tokou ban mam ndoudji ebarem mbata di wa?

³⁰ Corneille pana, Ndò sò ke dongor, ngosiba ke kade ke nèn, mam ngem kade ke tél ase djikada ta doudjou Allah mè kei té lom, wo, doou kada arr nòm té ke koubou ke ndokoo.

³¹ Nè mpana, Corneille, Allah wo doudjou loi mbä, ke né ke i are dooudjé ba, mè Allah olè dè té.

³² Tokou ban oula dooudjé Joppé té ta doudjou mbata lo Simon, nè ke dèdè mmarè na Pierre. Nè nto mè kei té lo Simon ndjè da ngira, mbòr tokou man katé té.

³³ Yèn baa ma moula né ròi té loshénè loshénè, ke i da mè madji ta dé. Tokou ban djèdjè toï djisi naaté nèn nò Allah té, ta ko tar toï ke Mbaibé Seigneur tòdji ta pa.

³⁴ Pierre òrou tè pana, Tokoro, mam ngeré Allah piti doou kada wota maredjé ang.

³⁵ A horo gel dooudjé té toï, dooudjé kada kada ke bel Allah ke da né gaté gaté, dase kem Allah té.

³⁶ Sésè egeridjé tar ke nè noula nare ngandjé lo Israël, ke pa tar ke madji ke mè woul deo té lo Jésus Christ, nè ke nto Mbaibé Seigneur lo dooudjé toï.

³⁷ Sésè egeridjé tar ke madji ke dèdè mpa dò nange té ke Judée toï, ke ounkotè ke Galilée goukoudang tar baptême ke Jean tòdjou.

³⁸ Tar ke pana deo di a Allah oula Ndil ke madji toï ke singa dò Jésus ke Nazareth té, deo di a nè nao nda madji, ke nè nòrou dooudjé toï ke inga madjang dji Satan té, mbata Allah éh sa.

³⁹ Djèdjè ndja djo né toï ke nè nda ke nange té lo Juifdjé ke Jérusalem té. Nè ke dèdè ntòlè tokou dèdè ntòè dò kake dèse té.

⁴⁰ A Allah arè nï tarr ke ndò mouta, nè narè ta téh daka kem dooudjé té.

⁴¹ Nè ntéh kem dooudjé té toï ang, a ntéh kemdjè té, djèdjè ke Allah mberedjè mbata tar nadji, djèdjè ke djon mourou ke djaih man sa gè té ke nè nï mè bwa yo té.

⁴² Nè naredjè tè ta pa tar kare dooudjé, ke ta pa tar nadji ke nè nto doou ke Allah barè ke daka, ta kisi ndjè gange saria lo dooudjé ke isi ke tébe ke ndjè ke woei tò.

⁴³ Prophètedjé toï pa tar nadji la, ke dooudjé kada kada toï ke wo mèdè té sa, nè nïya né ke madjang lodè deo ria té.

⁴⁴ Tokou Pierre ao pa tar nèn ba bai, Ndil ke madji toï dé dodè té toï ke do tar nèn.

⁴⁵ Ndjè ko mè tédjé ke horo ndjè koudja ta motedè té ke dé ke Pierre, mèdè ounda dò biä mbata né kinga ba lo Ndil ke madji toï dé dò Gentildjé té tò.

⁴⁶ Mbata dèdè dodè mpa tar ke ta ke dang dang, ke dèdè mpiti Allah. Tokou ban Pierre pana,

⁴⁷ Doou kada ase ta kòkou man ta da dooudjé nèn baptême ang, ke inga Ndil ke madji toï deo kadaba tokou djèdjè ndja wa?

⁴⁸ Nè mpa naredè ta kinga baptême ke ri Jésus Christ. Bana dèdè ndoudjè ta kisi mare ndò ke dang bai.