Jude 1 - Testament ke Siki 1960 (Kabba Laka)

¹ Jude, bere lo Jésus Christ ke ngokö Jacques, da maketourou are dèdè ke Allah bardè ke daka mbä, dèdè ke Allah Bòdjèdjè ndikidè nya, ke ngemdè mbata Jésus Christ.

² Mè madji ke mè woul ke ndiki bar nya mbata losè.

³ Sésè ke mam ndikisè nya, mam ndiki nya ta da maketourou karesè mbata tar kadji lodjè toï, ma mo to tar lom ta da maketourou ta ndedjisè ta ngem ko mè té ngeng, ke dare ndjè ko mè tédjé gar kada ase ndò toï.

⁴ Mbata mare dooudjé ake horosè té hoi, dèdè ke ngange saria nèn dodè té ke maketourou pa leo dongor, dooudjé ke mbeté Allah ke ntourou tar tokou mè madji lo Allah lodjè deo boo té ke madjang, ke mbeté ndjè tòdjou tar ke kadaba, Mbaibé lodjè Jésus Christ.

⁵ Mam ndiki ta kolè mèsè, sésè ke egeridjé né toï nèn, gè té ke Mbaibé Seigneur adji dooudjé ke Egypte té, tokou nòroudè ke dang, nè ntòl ndjè ke wo mèdè té ang.

⁶ Ke angedjé ke ngem loou kisi lodè ke dongor ang, a dïya loou kisi lodè ndja, nè ntòdè ke koulaa narè ke ke ndò ke ndò loou té ke ndoul nya sar gange saria lo tòkou ndò.

⁷ Deo kadaba tokou Sodome ke Gomorrhe ke mare béh ke ngosi kedè, ke nda deo kadaba ke dooudjé nèn to, deo koun ròdè ndja to né kaiya, ke dao go né da rò té dang dang, ndadè to né tòdjou, deo né ongou té lo pourou ke ke ndò ke ndò ke dèdè dinga saria kendé.

⁸ A deo kadaba ban to, dooudjé nèn da madjang ke da ròdè ke ni lodè, dèdè mbeté tar lo ndjè ke ö béh, ke dèdè ntadji né ndokoo.

⁹ A tokou Michel tòkou ange maitar ke Satan ke nè nkòl sa mbata rò Moïse, nè nase gange saria tadji dè té ang, a nè mpana, Mbaibé Seigneur ndja a ndangi.

¹⁰ A dooudjé nèn pa tar tadji do né té ke dèdè ngeré ang, ke deo né té ke dèdè ngeré da rò té tokou dadjé ke éh ke gousou ang, dèdè ntoudjou mè né té nèn.

¹¹ Ongou a ködè, mbata dèdè ndja deo té lo Caïn, dèdè daïngòrou ndjange ndjange tar té ke gatang lo Balaam mbata kinga kouka, ke dèdè doei deo maitar té lo Koré.

¹² Dèdè nto né yèdo horosè té ndò kon mourou ndiki té losè, tokou dao dön kesè dare mèdè ndan ke bel ang, dèdè ngem ròdè ndja, dèdè nto ndi ke il ke man éh kendé ang, ke lél òroudè dang dang, dèdè nto kakedjé ke nai papal té ke kandédè goto, doei gar djo, ngiradè òrou mbä.

¹³ Dèdè nto man katé ke ï ngeng, ke da kouldè ke madjang ke daka, ndètélendèdjé ke téh yo né dang dang, ngem loou ke ndoul nya mbata lodè ke ndò ke ndò.

¹⁴ To mbata lodè to ke Enoch, gel doou ke shiri lo Adam, pa tar lodè ke daka, pana, Wo, Mbaibé Seigneur dé ke ndjè ke madji toï la ke baya baya,

¹⁵ Ta gange saria do dooudjé té toï, ke ta tòdjou ndjè ke mbeté Allah koula lodè toï ke dèdè mbeté Allah kendé, ke dèdè nda deo mbeté Allah té, ke ta tòdjou tar ke ngeng toï ke ndjè né da ke madjang ke mbeté Allah pa dè té.

¹⁶ Dèdè nto ndjè nanè, dooudjé ke ndjè ongou ke sange mèdè tar té toï, dèdè ndja go boo té ke ròdè té, dèdè ke mboro ke tar nya, mmel kem dooudjé ta kinga né.

¹⁷ A sésè ke mam ndikisè nya, oundaidjé mèsè dò tar té ke ndjè kouladjé lo Mbaibé lodjè Jésus Christ pa leo.

¹⁸ Dèdè mpa daresè, ndò té ke goukou dooudjé ke ndjè koukou dooudjé da to. Dèdè da ndja go boo té ke da rò té lodè ke mbeté Allah.

¹⁹ To to dèdè ke dare tar kaina ï, ke nto dooudjé ke nange nèn, dèdè déh ke Ndil ndja ang.

²⁰ A sésè ke mam ndikisè nya, ngengidjé dò ko mè té losè ke madji toï, edoudjidjé Allah deo Ndil té ke madji toï.

²¹ Ngemidjé ròsè mè ndiki té to Allah tokou sésè ao ngebidjé mè madji lo Mbaibé lodjè Jésus Christ, ke are tébe ke ke ndò ke ndò.

²² Ndedjidjé maredjé, dèdè ke mmaitar.

²³ Adjidjé maredjé, òridjédè do pourou té, edaidjé mè madji ke maredjé ke bel, mbetidjé lé koubou ke yèdo da rò to kendé.

²⁴ A nè ke nase ngemsè baa a kosoidjé ang, ke na karesè etéhdjé ke tar kada dòsè té ang no né ndokoo té la, ke koukou nya.

²⁵ Are Allah kadaba ndjè kadjidjè deo té lo Jésus Christ Mbaibé lodjè, to ndokoo, ke né ke bo wota, ke singa, ke ta ko béh, leo kèté dongor bal toï, ke bashénè, ke ke ndò ke ndò toï. Amen.