Jean 9 - Testament ke Siki 1960 (Kabba Laka)

¹ Tokou nè nao ndai, nè no doou kada ke doudjè to ndjè kem to.

² Ndjè kao gè tédjé doudjè, pana, Ndjè tòdjou tar, doou di a da né ke madjang, doou nèn aséh bèdjè aséh këndjè, a doudjè to ndjè kem to wa?

³ Jésus tél pana, Doou nèn aséh bèdjè ke këndjè nda né ke madjang ang, yèn to baa ta kare tòdjou né koula lo Allah ke daka mèa té.

⁴ To tar lodjè ta da koula lo nè ke noulam, tokou kade nai bai, mbata til a dé ke doou kade ase da koula kendé ang.

⁵ Tokou ma méh nange nèn, mam nto lokarè ke nange nèn.

⁶ Tokou nè mpa ban mbä, nè ntiwëré nange nda to ba berre, nila ba berre nèn kem doou tén.

⁷ Nè mpa narè, Ao etoko man Siloé, yèn pana, Doula mbä. Tokou ban nè nao ntoko mbä, nga nao ntél a no loou.

⁸ Tokou ban dooudjé ke nin kei marè, ke mare dooudjé ke woè leo to ndjè né koi, dèdè mpana, Yèn to nè ke nisi to ndjè né koi lé ang wa?

⁹ Maredjé pana, Yèn to nè ndja, maredjé pana, To nè ang, nga doou nèn wo to nè ndja. Nè mpana, Ma ndja san.

¹⁰ Tokou ban dèdè mpa darè, Nteï kemi to di wa?

¹¹ Nè ntél mpana, Doou ke mmarè na Jésus, nè nda ba berre nila kem té, ke nè mpa sem, mpana, Ao man Siloé, ao etoko. Tokou ban mao ntoko, nga moun koutou ko loou.

¹² Dèdè mpa darè, Nè néh da wa? Nè mpana, Mam ngeré ang.

¹³ Dèdè ndé sa, nè ke nto ndjè kem to leo, darè Pharisiendjé.

¹⁴ Ndè to ndò sabbat ke Jésus da né ba berre teï né kèmè.

¹⁵ Tokou ban Pharisiendjé doudjè to ke siki, nè no loou to di wa? Nè mpa naredè, Nè nila ba berre kem té, ke mao ntoko mbä, ke mo loou.

¹⁶ Tokou ban maredjé horo Pharisiendjé té pana, Doou nèn ï rò Allah té ang, mbata nè ngem ndò sabbat ang. Maredjé pana, Doou ke ndjè né da ke madjang ase ta da né mori ke nè nda to di wa? Tokou ban tar tina ï horodè té.

¹⁷ Tokou ban dèdè ntél mpa ke ndjè kem to bai, I pana di tar la, mbata nè nteï kemi wa? Nè mpana, Nè nto prophète.

¹⁸ Tokou ban Juifdjé mbeté tar la, nè ke nto ndjè kem to leo, nè ke no loou bashénè, randang dèdè mmar bèdjè dè ke këndjè nè ke no loou bashénè.

¹⁹ Dèdè ndoudjoudè, mpana, Doou nèn to ngonsè ke epaidjéna oudjèdjé to ndjè kem to wa? Nè no loou bashénè to di wa?

²⁰ Bèdjè dè ke këndjè ntél tar, mpana, Djèdjè ngeré to ngondjè ke djoudjè to ndjè kem to,

²¹ A djèdjè ngeré tar ko ke no loou bashénè ang, ke djèdjè ngeré doou ke teï kèmè ang. Edoudjèdjé, nè nto doou ke tokou dang, nè ndja na pa tar la.

²² Bèdjè dè ke këndjè mpa ban mbata nda bel lo Juifdjé, mbata Juifdjé oubou ròdè dongor, pana, Tokou bo doou ke pa ke daka nè nto Christ, a da kila ndjè daka giri kei Allah té.

²³ Mbata tar nèn bèdjè dè ke këndjè mpana, Nè nto doou ke tokou dang, edoudjèdjé.

²⁴ Tokou ban Pharisiendjé barè, doou ke to ndjè kem to leo, gar djo mpa darè, Òsou gadji Allah, djèdjè ngeré doou nèn to doou ke ndjè né da ke madjang.

²⁵ Tokou ban doou nèn tél pana, Tokou nè nto doou ke ndjè né da ke madjang mam ngeré ang. Mam ngeré né kada nèn, leo mam nto ndjè kem to, a bashénè ma mo loou.

²⁶ Tokou ban dèdè mpa darè, Di a nè nda sei wa? Nda to di a nteï kemi wa?

²⁷ Nè ntél mpa naredè, Ma mpa maresè loshénè bai nèn, sésé woidjé ang, mbata di a ndikidjé ta ko bai wa? Sésè ndikidjè ta dé to ndjè kao gè tédjé dem wa?

²⁸ Dèdè ntadjè, mpana, I to ndjè kao gè té, a djèdjè nto ndjè kao go Moïse té.

²⁹ Djèdjè ngeré Allah pa tar ke Moïse leo, a doou nèn, djèdjè ngeré loou ke nï kendé ang.

³⁰ Doou nèn tél pa aredè, Né nèn ta da baa ta kare mè dooudjé ounda do biä, mbata sésè egeridjé loou ke nï kendé ang, a nè nteï kem mbä.

³¹ Djèdjè ngeré Allah wo tar lo doou ke ndjè né da ke madjang ang. Tokou bo doou doudjou Allah ke da né ke nè ndiki, Allah wo tar la.

³² Leo ke dongor nange ounkotè, doou wo mare doou ke teï kem doou ke doudjè to ndjè kem tò ndò kada ang.

³³ Tokou doou nèn ï rò Allah té ang, ndjè a kase ta da né kada ang.

³⁴ Dèdè ntél mpa darè, Doudji ke né ke madjang, i ata tòdjoudjè tar wa? Tokou ban dilè daka.

³⁵ Jésus wo na dilè daka mbä. Tokou nè ningè, Jésus pa arè, pana, Wo mei té ke Ngon lo Allah wa?

³⁶ Nè ntél tar mpana, Nè nto doou di wa, Mbaibé, baa ta karem mo mem té sa wa?

³⁷ Jésus pa arè, I woè mbä, yèn to nè ke nao mpa sei tar loshénè nèn.

³⁸ Nè mpana, Mbaibé Seigneur, ma mo mem té, ke nè nwalè.

³⁹ Jésus pana, Mam ndé nange nèn ta gange saria, ta kare dooudjé ke wo loou ang ase ta ko loou, a ta kare dooudjé ke ndjè ko loou ase dé to ndjè kem tòdjé.

⁴⁰ Dooudjé lo Pharisiendjé ke éh sa, dèdè do tar nèn, mpa darè, Djèdjè nto ndjè kem tòdjé tò wa?

⁴¹ Jésus pa aredè, Tokou bo sésè etoidjé ndjè kem tòdjé, sésè éhdjé ke né ke madjang ang, a ke epaidjéna, sésè woidjé, tokou ban né ke madjang losè nai ba.