Jean 7 - Testament ke Siki 1960 (Kabba Laka)

¹ Go né té nèn Jésus ndja Galilée té, mbata nè ndiki ta ndja Judée té ang, mbata Juifdjé sange deo ta tòlè.

² Bana ndò ke bo lo Juifdjé, ndò ke bo ke nda né kei kam dé ngosiba mbä.

³ Tokou ban ngaköèdjé pa arè, Ï nèn ao loou té ke Judée, baa ta kare ndjè kao goi tédjé ase ko koula loi ke i ao da.

⁴ Mbata doou kada da né loou kiyèè té ang, tokou nè ndiki dooudjé toï ta geré. Tokou i da nédjé nèn, etéh daka ke kem dooudjé té toï.

⁵ Mbata ngaköèdjé ndja wo mèdè té sa ang.

⁶ Tokou ban Jésus pa aredè, Ndò lom nai dé ang bai, a ndò losè to ke ndò toï.

⁷ Nange nèn ase mbetésè ang, a nè mbetem, mbata ma mpa tar nadji la, mbata koula la to madjang.

⁸ Sésè abidjé ndò ke bo té nèn. Ma mao ndò ke bo té nèn loshénè ang, mbata ndò lom nai asang bai.

⁹ Gè té nè mpa né nèn naredè, nè nai Galilée té.

¹⁰ Tokou ngaköèdjé ao ndò ke bo té nèn mbä, gè té goukou nè nao to, a ke kem dooudjé té ang, mbata nè ndiki ta kare dooudjé toï woè ang.

¹¹ Juifdjé sangè ndò té ke bo, dèdè mpana, Nè néh da wa?

¹² Dooudjé maitar nya horodè té mbata la. Maredjé pana, Nè nto doou ke madji, maredjé pana, Ban ang, nè neré dooudjé nya.

¹³ Doou kada pa tar la nò dooudjé té ang, mbata dèdè disi ke bel lo Juifdjé.

¹⁴ Tokou ndò ke bo oso Jésus ao mè tòkou kei Allah té, nao ntòdjou tar.

¹⁵ Tokou ban mè Juifdjé isa, dèdè mpana, Deo di a doou nèn geré ta toura maketourou, mbata nè nao kei tòdjou maketourou té ndò kada ang wa?

¹⁶ Tokou ban Jésus tél pa aredè, pana, Tar ke mam ntòdjousè to ngäm ang, a to ngä nè ke noulam.

¹⁷ Tokou doou kada ndiki ta da né tokou Allah ndiki, nè na geré tar nèn tokou to ngä Allah, aséh tokou ma mpa tar ke mem té ndja.

¹⁸ Nè ke mpa tar ke mèa té ndja, nè nsange piti la ndja, a nè ke nsange piti lo nè ke noulè, nè nto doou ke tokoro, nè ke gatang to mèa té ngadji ang.

¹⁹ Moïse aresè tar ndedji leo ang wa? Ke doou losè kada ngem tar ndedji ang. Mbata di a esangidjé deo ta tòlem wa?

²⁰ Dooudjé ke baya baya tél tar, I éh ke ndii ke madjang, doou di a sange deo ta tòli wa?

²¹ Jésus tél pa aredè, Mam nda koula kada mbä, tokou ban mèsè toï isa.

²² Moïse aresè tar koudja ta mote leo, mbata lo ngä Moïse ang, a to ngä ndjè gel koudjousè. Sésè oudjaidjé ta mote doou ndò sabbat té.

²³ Tokou doou are doudja ta motè ndò sabbat té ta ngem tar ndedji lo Moïse, ongou ösè dom té mbata mam nda rò mare doou dé madji ndò sabbat té wa?

²⁴ Egangidjé saria tokou kemsè wo ang, a egangidjé saria gaté gaté.

²⁵ Tokou ban maredjé horo ndjè ke Jérusalem té pana, Yèn to doou ke dèdè nsange deo ta tòlè ang wa?

²⁶ Woidjé, nao mpa tar no dooudjé té ke bel ang, a dèdè mpa sa tar kada ang. Mbaidjé lodjè geré tokoro nè nto Christ ndja wa?

²⁷ Djèdjè ngeré loou ke doou nèn ï kendé, a tokou Christ téh, doou kada a geré loou ke nï kendé ang.

²⁸ Tokou ban Jésus mpa ke tarr mè tokou kei Allah té, tokou nao ntòdjoudè tar. Nè mpana, Egeremdjé, a egeridjé loou ke mï kendé wa? Mam ndé ke mem ndja ang, nè ke noulam nè nto tokoro, a sésè egerèdjé ang.

²⁹ Mam ngerè, mbata mï béh la, ke nè noulam mbä.

³⁰ Tokou ban dèdè nsange deo ta kwèè, a doou kada wèè ang, mbata ndò la nai asang bai.

³¹ A dooudjé baya baya ke horo dooudjé té, do mèdè té sa. Dèdè mpana, Tokou Christ a téh, nè na da né mori wota yéh ke doou nèn da wa?

³² Pharisiendjé wo dooudjé baya baya ke ao maina tar horodè té mbata la. Tokou ndjè kòrdjé ke Pharisiendjé oula mare padjadjé ta kwèè.

³³ Tokou ban Jésus pana, Ma ma nai kesè ngadjiba, gè té ma mao rò nè té ke noulam.

³⁴ Sésè a sangemdjé, a kingamdjé ang. Loou té ke méh kendé, sésè asidjé téh ang.

³⁵ Tokou ban Juifdjé pa horodè té ndja, Doou nèn a kao ke da wa baa dja kase ta kingè ang wa? Nè na kao rò Juifdjé té ke särèna horo Grecdjé té, ke ta tòdjou tar Grecdjé wa?

³⁶ Tar ke nè mpa to di wa, Sésè a sangemdjé, a kingamdjé ang, ke, Loou ke méh kendé, sésè asidjé téh ang?

³⁷ Ndò ke goukou, tòkou ndò ke bo, Jésus arr mpa ke tarr, pana, Tokou doou ke kounda man öè, arè ndé rom té naih.

³⁸ Doou ke wo mèa té sem, man tébe a téh mèa té to ngamamoula, tokou maketourou lo Allah pa.

³⁹ Nè mpa tar lo Ndil ndja, ke dèdè ke do mèdè té sa data tèè gè té, mbata Ndil ndja nai dé ang bai, mbata Jésus nai taa piti ang bai.

⁴⁰ Tokou ban, gè té ke dèdè do tar nèn, maredjé horo dooudjé té ke baya baya pana, Tokoro nè nto prophète nèn ndja.

⁴¹ Mare dooudjé pana, Doou nèn to Christ. Mare dooudjé pana, Yèn to di wa, Christ a téh Galilée té wa?

⁴² Maketourou lo Allah pana Christ to doou ke gel David té ang wa, ke nè nï Bethléhem té, béh ke David éh kendé leo?

⁴³ Tokou ban tar tina ï horo dooudjé té ke baya baya mbata la.

⁴⁴ Maredjé horodè té ndiki ta kwèè, a doou kada wèè ang.

⁴⁵ Tokou ban padjadjé tél ao rò tòkou ndjè kòrdjé ke Pharisiendjé té, dèdè mpa dare padjadjén, Mbata di a edèidjé sa ang wa?

⁴⁶ Padjadjén lé pana, Ndò kada doou pa tar ban ang.

⁴⁷ Tokou ban Pharisiendjé tél tar, Nè neresè tò wa?

⁴⁸ Mare mbaidjé, aséh Pharisiendjé, do mèdè té sa wa?

⁴⁹ Dooudjé baya baya nèn ke geré tar ndedji ang, né tadji to dodè té.

⁵⁰ Nicodème, nè ke ndé rò Jésus té dongor, nè nto mare doou lodè kada, nè mpa naredè,

⁵¹ Tar ndedji lodjè gange saria do doou té, tokou do tar la dongor ang, ke gel né ke nè nda wa?

⁵² Dèdè ntél mpa darè, I to doou ke Galilée té tò wa? Esange, wo, mbata prophète kada ï Galilée té ang.

⁵³ Bana dèdè kada kada dao kei lodè.