Jean 6 - Testament ke Siki 1960 (Kabba Laka)

¹ Go né té nèn, Jésus ao toura tokou man Galilée té, ke ria to Tibériade.

² Dooudjé baya baya ao gè té, mbata dèdè do né mori ke Jésus da ke ndjè rò toodjé.

³ Jésus al do err té, nè nisi nou ke ndjè kao gè tédjé.

⁴ Ndò ke bo ndò Pâque lo Juifjdé dé ngosiba.

⁵ Tokou ban, tokou Jésus oun kèmè ke tarr, nè no dooudjé baya baya ao dé rè té, nè mpa nare Philippe, Djèdjè djase ndoko mourou da wa, baa ta kare dooudjé nèn ön wa?

⁶ Nè mpa tar nèn ta nèè, mbata nè ndja ngeré né ke nè na da.

⁷ Philippe tél tar arè, Mourou ke ndoko ke denier kòr djo asedè ang, baa ta kare dèdè kada kada dön ngadji ngadji.

⁸ Ndjè kao gè té kada, ria na André, ngokö Simon Pierre, pa arè,

⁹ Ngon ngadji isi nèn ke mourou orge mi ke kaindjidjé djo, yèn to di baa dooudjé baya baya bé wa?

¹⁰ Jésus pana, Aridjé dooudjé toï isi nange. Mou baya baya to loou té ke nou, tokou ban dooudjé toï isi nange, dèdè dase dourou mi.

¹¹ Tokou ban Jésus taa mourou, gè té ke nè nda woio Allah, nè nkai mourou dèdè ke disi nange, tokou ban nè naredè kaindjidjé to, dooudjé toï ön tokou mèdè ndiki.

¹² Gè té ke dèdè dön mèdè ndan, nè mpa nare ndjè kao gè tédjé, Mbòidjé kese mourou ke nai, mbata kare né kada nai ang.

¹³ Tokou ban dèdè mbòn kesè nèn, dousou karè dòkou gérè djo ke kese mourou mi lo kandé orge, ke nai goukoudang ke dèdè dön mbä.

¹⁴ Tokou ban, tokou dooudjé nèn wo né mori ke nè nda, dèdè mpana, Tokoro nè nto prophète nèn ke ata dé nange nèn.

¹⁵ Tokou ban, tokou Jésus geré dèdè ndiki ta dé ta korè ke singa ta kisi to mbaibé, nè nïyadè nao do err té, nè ndja ke kadè.

¹⁶ Tokou kade woei mbä, ndjè kao gè tédjé ao kare tòkou man té.

¹⁷ Dèdè dao mè to té, ta kao toura tokou man té ke Capernaüm. Loou ndoul mbä, a Jésus nai dé ròdè té ang.

¹⁸ Man ï nya mbata lél oula nya.

¹⁹ Tokou ban, goukoudang ndjè kao gè tédjé òrou haï ase kourou deo mi aséh misä, dèdè do Jésus ndja do man té. Nè ndé ngosiba ke to, bel dadè.

²⁰ A Jésus pa aredè, To to ma ndja, ïyaidjé bel.

²¹ Tokou ban dèdè ndiki ta kounè mè to té. Loshénè loshénè to téh kare kongo té, loou ke dèdè dao kendé.

²² Ke sindò, dooudjé baya baya ke nai toura tokou man té, dèdè do mare to nou ang, sè to kadaba. Dèdè ngeré Jésus ao mè to té ke ndjè kao gè tédjé ang, a to ndjè kao gè tédjé ke ndai ke kadedè ba.

²³ A mare to ke ï Tibériade dé ngosiba ke loou ke dèdè dön mourou kendé nou, gè té ke Mbaibé Seigneur da woio mbä.

²⁴ Tokou ban, tokou dooudjé ke baya baya nèn wo Jésus ke ndjè kao gè tédjé déh nou ang, dèdè ndja dao mè to té, dèdè ntéh Capernaüm té, dèdè dao nsange Jésus.

²⁵ Tokou dèdè dingè toura tokou man té, dèdè mpa darè, Ndjè tòdjou tar, i téh nèn kade té ke da wa?

²⁶ Jésus tél pa aredè, pana, Tokoro, tokoro, ma mpa maresè, sésè esangemdjé ang mbata sésè woidjé né mori, a sésè esangemdjé mbata sésè öndjé mourou mèsè ndan.

²⁷ Edaidjé koula mbata mourou ke a toudjou ang, a edaidjé koula mbata mourou ke a to mbata tébe ke ke ndò ke ndò, mourou ke Ngon lo doou a karesè, mbata Bòi Allah ndja to nè ke né to la.

²⁸ Tokou ban dèdè mpa darè, To tar lodjè ta da di ta da koula lo Allah wa?

²⁹ Jésus tél pa aredè, Koula lo Allah éh nèn, ta ko mèsè té ke nè ke Allah oulè.

³⁰ Tokou ban dèdè mpa dare, Tokou ban i a da né mori di wa, baa ta kare djèdjè djase ta ko, ke ta kare djèdjè djo mèdjè té sei? I da koula di wa?

³¹ Kadjèdjè ön mourou mè kòr té leo, tokou maketourou lo Allah pa, Nè naredè mourou ke ï dara dé ta kon.

³² Tokou ban Jésus pa aredè, Tokoro, tokoro, ma mpa maresè, to Moïse ke aresè mourou ke ï dara dé ang, Bòi aresè mourou ke tokoro ke ï dara dé.

³³ Mbata mourou lo Allah to yéh ke ï dara dé nange, ke nè nare tébe dooudjé ke nange nèn.

³⁴ Tokou ban dèdè mpa darè, Mbaibé Seigneur, aredjè mourou nèn ke ndò toï.

³⁵ Jésus pa aredè, Mam nto mourou tébe, doou ke dé rom té boo a dè ngadji ang, ke doou ke wo mèa té sem, kounda man a koè ndò kada ang.

³⁶ Ma mpa maresè, sésè womdjé mba, a sésè woidjé mèsè té ang.

³⁷ Dooudjé toï ke Bòi Allah arem, dèdè da dé rom té. Doou ke dé rom té, ma ma kilè daka ngadji ang.

³⁸ Mbata ma mï dara mam ndé ta da né ke mam ndiki ang, a ta da né tokou nè ke noulam ndiki.

³⁹ Yèn to né tokou nè ke noulam ndiki, nè ndiki mare né kada nai ang ke né toï ke nè narem mba, ke ma ma karè nï tarr ndò té ke goukou.

⁴⁰ Mbata yèn to né ke Bòi ndiki, dooudjé kada kada toï ke wo Ngonè, ke wo mèdè té sa, nè ndikidè ta kinga tébe ke ke ndò ke ndò, ke ma ma karedè dï tarr ndò té ke goukou.

⁴¹ Tokou ban Juifdjé nanè sa, mbata nè mpana nè nto mourou ke ï dara dé nange.

⁴² Dèdè mpana, Yèn to Jésus, ngon lo Joseph, ke djèdjè ngeré bèdjè ke këndjè ang wa? Deo di wa nase pana. Ma mï dara mam ndé nange mbä?

⁴³ Jésus tél pa aredè, Nanèdjé horosè té ang.

⁴⁴ Doou kada ase ta dé rom té ang, tokou Bòi Allah ke oulam barè ang, a ma ma karè nï tarr ndò té ke goukou.

⁴⁵ Maketourou lo prophètedjé pana, Allah a tòdjou tar karedè toï. Dooudjé kada kada toï ke wo, ke wo gel tar lo Bòi Allah mba, ndé rom té.

⁴⁶ Doou kada nai wo Bòi Allah ang bai, nè kada ke nï rò Allah té, nè no Bòi Allah mbä.

⁴⁷ Tokoro, tokoro, ma mpa maresè, doou ke wo mèa té isi ke tébe ke ke ndò ke ndò.

⁴⁸ Mam nto mourou tébe.

⁴⁹ Kasésè ke ön mourou mè kòr té leo, dèdè doei mbä.

⁵⁰ Yèn to mourou ke ï dara dé, baa ta kare doou ke ön a kwoei ang.

⁵¹ Mam nto mourou tébe, ke ï dara dé mba. Tokou doou ön mourou nèn, nè na kisi tébe ke ndò ke ndò, ke mourou ke ma ma kare mbata tébe ke nange nèn to rom ndja.

⁵² Tokou ban Juifdjé maitar horodè té, pana, Doou nèn ase ta karedjè rè djon to di wa?

⁵³ Tokou ban Jésus pa aredè, Tokoro, tokoro, ma mpa maresè, tokou sésè öndjé rò Ngon lo doou ang, ke sésè aihdjé mese la ang, sésè isidjé ke tébe mèsè té ang.

⁵⁴ Nè ke nön rom ke naih mesem, nè nisi ke tébe ke ke ndò ke ndò, a ma ma karè nï tarr ndò té ke goukou.

⁵⁵ Mbata rom to mourou ke tokoro, ke mesem to nè kaih ke tokoro.

⁵⁶ Nè ke nön rom ke naih mesem, nè nisi mem té, ke ma misi mèa té.

⁵⁷ Tokou Bòi ke ndjè tébe oulam, ke ma misi ke tébe mbata tar lo Bòi Allah, tokou ban doou ke öm, nè na kisi ke tébe to mbata tar lom.

⁵⁸ Yèn to mourou ke ï dara dé, to tokou mourou nèn ke kasésè ön leo ang, ke dèdè doei mbä. Nè ke nön mourou nèn, nè na kisi tébe ke ndò ke ndò.

⁵⁹ Jésus pa né nèn toï mè kei Allah té, tokou nè ntòdjou tar Capernaüm té.

⁶⁰ Tokou ban, tokou ndjè kao gè tédjé baya wo tar nèn, dèdè mpana, Yèn to tar ke ngeng, doou di ase ta ko tar nèn wa?

⁶¹ Mbata Jésus geré mèa té ndja ke ndjè kao gè tédjé nanè mbata tar nèn, nè mpa naredè, Mèsè toosè mbata tar nèn wa?

⁶² Tokou ban, tokou sésè woidjé Ngon lo doou ao dara loou té ke nè nisi kendé dongor, sésè edaidjé di wa?

⁶³ To ndii ndja ke are tébe, rò da né kada ang, tar nèn ke ma mpa maresè to ndii ke to tébe.

⁶⁴ Mare dooudjé éh horosè té ke wo mèdè té ang. Mbata Jésus geré dongor kèté dooudjé ke wo mèdè té ang, ke doou nèn ke ata ndokè.

⁶⁵ Nè mpana, Mbata yèn ma mpa maresè leo, doou kada ase ta dé rom té ang, tokou Bòi Allah arè mèa té ta dé ang.

⁶⁶ Mbata tar nèn, ndjè kao gè tédjé baya tél, dèdè ndja sa mare ang.

⁶⁷ Tokou ban Jésus pa aredè dòkou gérè djo, Sésè ndikidjé ta kao tö wa?

⁶⁸ Simon Pierre tél tar arè. Mbaibé Seigneur, djèdjè dja kao rò na té wa? I isi ke tar tébe ke ke ndò ke ndò.

⁶⁹ Djèdjè djo mèdjè té mbä, djèdjè ngeré i to nè kada ke madji toï lo Allah.

⁷⁰ Jésus tél tar aredè, Ma mmarsè dökou gérè djo, ke kada horosè té to to Satan ang wa?

⁷¹ Nè mpa tar nèn ke ri Judas, ngon lo Simon Iscariot, mbata to nè ke na ndoko Jésus, nè nto kada lo dèdè dökou gérè djo.