Jean 4 - Testament ke Siki 1960 (Kabba Laka)

¹ Tokou ban, tokou Mbaibé Seigneur geré Pharisiendjé wo ndjè kao go Jésus té ke nè ndadè baptême wota ngä Jean,

² A Jésus ndja da baptême ang, to ndjè kao gè tédjé,

³ Nè nï Judée ntél ke Galilée té.

⁴ To tar la ta ndai ke nange té ke Samarie.

⁵ Tokou ban nè ntéh béh té kada ke Samarie, ria na Sychar, ngosiba ke nange ke Jacob are ngonè Joseph dongor.

⁶ Bwa man lo Jacob éh nou. Mbata Jésus ndja nya nè nénge nya, tokou ban nè nisi ngosiba ke bwa man nèn. Kade dé ngosiba ta karr dana ase misä.

⁷ Dènè kada ke Samarie dé ta to man. Jésus pa arè, Arem man maih.

⁸ Ndjè kao gè tédjé ao béh ta ndoko mourou.

⁹ Dènè ke Samarie pa arè, Mbata di wa i ke to Juif edoudjoum man kaih, ma dènè ke Samarie wa? Mbata Juifdjé ndikina ke Samaritaindjé ngadji ang.

¹⁰ Jésus tél pa arè, Tokou i geré né kare ba lo Allah, ke nè ke mpa nari, Arem man maih, i a doudjè kèté, ke nè na kari man tébe.

¹¹ Dènè pa arè, Mbaibé, i isi ke né ta to né man ang, bwa man nèn ourou nya, tokou ban i to man tébe nèn loou té ke da wa?

¹² I tokou boui wota bòdjèdjè Jacob, nè ke naredjè bwa man nèn, ke nè ndja naih man nèn ke nganè, ke mangedjé la wa?

¹³ Jésus tél pa arè, Doou ke aih man nèn, kounda man a koè marè,

¹⁴ A doou ke aih man ke ma karè, kounda man a koè marè ang. Man nèn ke ma karè a dé to dòman mèa té, ke téh ke tébe ke ndò ke ndò.

¹⁵ Dènè pa arè, Mbaibé, arem man nèn, tokou ban kounda man a kom marè ang nga, aséh mam ndé deo nèn ta to man marè ang.

¹⁶ Jésus pa arè, Ao, ebar ngabidjè, etél.

¹⁷ Dènè tél pa arè, Misi ke dingao ang. Jésus pa arè, I pa nèn madji, misi ke dingao ang,

¹⁸ Mbata i isi ke dingaodjé mi leo. Nè ke nisi sei bashénè nèn to ngabidjè ang, tar nèn i pa ase tokoro.

¹⁹ Dènè pa arè, Mbaibé, ma mo i to prophète.

²⁰ Kadjèdjè wal Allah do err té nèn. Sésè epaidjé, Jérusalem to to loou ke ase ta kare dooudjé wal Allah kendé.

²¹ Jésus pa arè, Dènè, wo tar lom, ndò ao dé, ndò nèn sésè a walidjé Bòi Allah do err té nèn ang, aséh Jérusalem té ang.

²² Sésè ewalidjé né ke sésè egeridjé ang. Djèdjè nwal né ke djèdjè ngeré, mbata tar kadji to ngà Juifdjé.

²³ A ndò ao dé, téh loshénè mba, tokou dooudjé ke wal Allah ke tokoro, dèdè da wal Bòi Allah ke ndii lodè deo tar té ke tokoro, mbata Bòi Allah sange dooudjé tokou ban ta walè.

²⁴ Allah to Ndil, dèdè ke nwalè to tar lodè ta walè ke ndii lodè deo tar té ke tokoro.

²⁵ Dènè pa arè, Mam ngeré Messie ata dé, nè ke dèdè mmarè to Christ, tokou nè na téh nè na pa né toï karedjè.

²⁶ Jésus pa arè, Ma ke mpa sei, mam nto nè.

²⁷ Tokou nè mpa tar nèn, ndjè kao gè tédjé téh, mèdè isa mbata nè mpa tar ke dènè nèn, a doou kada pa tar ang, I sange di wa? aséh, Mbata di i pa tar sa wa?

²⁸ Tokou ban dènè ïya djo la, nè nao béh, nè mpa nare dooudjé,

²⁹ Edéidjé, woidjé doou ke pa arem tar né toï ke mam nda leo. Nè nto Christ ang wa?

³⁰ Dèdè ntéh mè béh té, dèdè ndé sa.

³¹ Tokou dènè ao mbä, ndjè kao go Jésus té doudjè, dèdè mpana, Ndjè tòdjou tar, ön mourou.

³² Nè mpa naredè, Ma méh ke mourou ke sésè egeridjé ang.

³³ Tokou ban ndjè kao gè tédjé pa horodè té, mare doou dé ke mourou arè wa?

³⁴ Jésus pa aredè, Mourou lom to ta da né tokou nè ke noulam ndiki, ta da koula la ase.

³⁵ Sésè epaidjé ang, goukoudang nnè sò nai koudja ko téh wa? Ma mpa maresè, ounidjé kemsè ke tarr, woidjé ko tòkou ndaa ase koudja.

³⁶ Doou ke oudja ko inga kouka la, nè mbòn kandè mbata tébe ke ke ndò ke ndò. Tokou ban doou ke doubou ke doou ke oudja, dèdè dase kisi ke koukou naaté.

³⁷ Tar ke tokoro to mè tar té nèn, Doou kada doubou, mare doou oudja.

³⁸ Ma moulasè ta koudja ko mè ndoo té ke sésè ndòòidjé ngadji ang. Mare dooudjé da koula leo, sésè etaaidjé touroudè ke koula nèn.

³⁹ Samaritaindjé nya ke béh tén, dèdè do mèdè té sa mbata tar ke dènè pa to tar nadji, Nè mpa narem tar né toï ke mam nda leo.

⁴⁰ Tokou Samaritaindjé dé rè té, dèdè ndoudjè nya ta kisi kedè. Nè nto nou ndò djo.

⁴¹ Mare dooudjé nya wo mèdè té sa mbata tar la ndja.

⁴² Dèdè mpa dare dènè nèn, Bashénè djèdjè djo mèdjè té sa, mbata tar loi ang, a mbata djèdjè ndja djo tar la ase, djèdjè ngeré nè nto doou ke ndjè kadji ke tokoro ke nange nèn.

⁴³ Gè té ndò djo nèn, nè nï nao ke Galilée.

⁴⁴ Jésus ndja pa tar nadji, dooudjé ke béh lo prophète ndja pitè ang.

⁴⁵ Tokou nè ntéh Galilée té, dooudjé ke Galilée tèè madji, mbata dèdè do né toï ke nè nda Jérusalem té leo ndò té ke bo, mbata dèdè dao ndò té ke bo nèn to.

⁴⁶ Jésus tél ao Cana té ke Galilée, béh ke nè ntél man téh to vin leo. Padja kada éh nou, ke ngonè ke dingao to ke rò too Capernaüm té.

⁴⁷ Tokou doou nèn wo Jésus ï ke Judée ao ke Galilée té, nè nao rè té, ndoudjè nya ta kao kòrou rò too lo ngonè, mbata ngon: dé ngosiba ta kwoei.

⁴⁸ Tokou ban Jésus pa arè, Tokou sésè woidjé né mori ang ke; né ta kare mèsè isa, sésè ndikidjé ta ko mèsè té ang.

⁴⁹ Padja pa arè, Mbaibé edé, ao dongor baa ta ngonem woei.

⁵⁰ Jésus pa arè, I ndja ao, ngoni isi ke tébe. Doou nèn wo mèa té ke tar ke Jésus pa arè, ke nè ntél deo té la.

⁵¹ Tokou nè nao deo bo, beredjé la dé, dèdè mpa darè, ngoni isi tébe.

⁵² Tokou ban nè ndoudjoudè rò too la goto ke kade ban wa. Dèdè mpa darè, Takenè, kade arr dana ase shiri rò too la goto.

⁵³ Tokou ban bo ngon geré to to kade nèn ndja ke Jésus pa arè, Ngoni to ke tébe. Nè no mèa té, ke dooudjé ke kei la toï.

⁵⁴ Yèn to né mori ke djo ke Jésus da gè té ke nè nï Judée ta kao Galilée té.