Jean 21 - Testament ke Siki 1960 (Kabba Laka)

¹ Go né té nèn, Jésus tél tòdjou rè yéh ndja ndjè kao gè tédjé ke tokou man Tibériade té. Nè ntòdjoudè tokou ban.

² Simon Pierre, ke Thomas ke mmarè na Ndounga, ke Nathanaél ke Cana té ke Galilée, ke ngan lo Zébédée, ke mare ndjè kao gè tédjé djo, dèdè déh loou kadaba.

³ Simon Pierre pa aredè, Ma mao ta sange kaindjidjé. Dèdè mpa sa, Djèdjè djao sei tò. Dèdè dao dourou mè to té, ke dèdè dinga kaindji kada tiltin lé ang.

⁴ Tokou loou arè, Jésus arr mbòr man té, a ndjè kao gè tédjé geré to Jésus ang.

⁵ Tokou ban Jésus pa aredè, Ngandjé, sésè éhdjé ke né kousa wa? Dèdè ntél mpa darè, Goto.

⁶ Nè mpa naredè, Ilaidjé boura er to té ke kòl, sésè a kingaidjé kaindji. Tokou ban dèdè dila boura, ke bashénè bai dèdè dase kòrou boura ang, mbata kaindjidjé dousou.

⁷ Tokou ban ndjè kao go Jésus té ke Jésus ndikè pa are Pierre, Yèn to Mbaibé Seigneur. Tokou ban, tokou Simon Pierre wo to Mbaibé Seigneur, nè noula koubou rè té, mbata nè néh ke gali ba, ke nè noso mè tokou man té.

⁸ Ke mare ndjè kao gè tédjé dé ke to ke lem, ndòrou né boura ke kaindjidjé dousou, mbata nange to eo ang, ase mere dji kòrdjo.

⁹ Tokou ban, tokou dèdè ntéh ngange kongo té, do pourou mï to nou, kaindji to pouro ke mourou.

¹⁰ Jésus pa aredè, Edéidjé ke mare kaindji ke waaidjé loshénè nèn.

¹¹ Tokou ban Simon Pierre ourou mè to té, nòrou boura ke nange, ke tòkou kaindjidjé dousou boura, dè dòdòkou ke dòmi gérè mouta, a lé tokou kaindjidjé to baya ban boura tir ang.

¹² Jésus pa aredè, Edéidjé öndjé mourou. Mare ndjè kao gè té kada ase ta doudjè ang, I to doou di wa? Mbata dèdè ngeré to Mbaibé Seigneur.

¹³ Jésus dé oun mourou aredè, ke kaindji tò.

¹⁴ Yèn dé gar mouta ke Jésus tòdjou rè ndja ndjè kao gè tédjé, gè té ke nè nï mè bwa yo té.

¹⁵ Tokou ban, goukoudang dèdè dön mourou mbä, Jésus pa are Simon Pierre, Simon, ngon lo Jonas, i ndikim wotadè wa? Nè mpa sa, Tokoro, Mbaibé Seigneur, i geré mam ndiki. Jésus pa arè, Are mourou ngan batidjé lom.

¹⁶ Nè ntél ndoudjè gar djo, Simon, ngon lo Jonas, i ndikim wa? Pierre pa arè, Tokoro, Mbaibé Seigneur, i geré mam ndiki. Jésus pa arè, Ngem batidjé lom.

¹⁷ Nè ntél ndoudjè gar mouta, Simon, ngon lo Jonas, i ndikim wa? Mè Pierre tooè mbata Jésus doudjè gar mouta, i ndikim wa? Nè mpa narè, Mbaibé Seigneur, i geré né toï. I geré mam ndiki. Jésus pa arè, Are mourou batidjé lom.

¹⁸ Tokoro, tokoro, ma mpa mari, tokou nai basä, i ndja oula koubou ròi té, ao né deo té ke mei ndiki. Tokou i dé to bouka, i a koula dji kare mare doou a koulai koubou, ke ouni ao sei loou té ke mei ndiki ang.

¹⁹ Nè mpa yèn baa ta tòdjè deo kwoei la, ke nata kòsou gadji Allah. Gè té nè mpa yèn mbä, nè mpa narè, Ndja gom té.

²⁰ Pierre tourou rè, a no ndjè kao go Jésus té ke Jésus ndikè godè té. Yèn to nè ke nto kare Jésus té ke dèdè dao dön né mourou ke lowoul té, ke nè mpana, Mbaibé Seigneur, doou ke da a ndokoi wa?

²¹ Tokou ban, tokou Pierre woè, nè mpa nare Jésus, Mbaibé Seigneur, di a doou nèn ao da wa?

²² Jésus pa sa na, Tokou mam ndiki ta karè nisi sar ta mam ntél, tar nèn to loi wa? I ndja gom té.

²³ Tokou ban tar nèn bar horo ngaköèdjé té, ke ndjè kao go Jésus té nèn a kwoei ang. A Jésus pa arè ang, nè na kwoei ang, nè mpana, Tokou mam ndiki ta karè nisi sar ta mam ntél, tar nèn to loi wa?

²⁴ Yèn to ndjè kao go Jésus té ke pa tar nadji né nèn, ke nè nda maketourou té. Djèdjè ngeré tar nadji la to tar ke tokoro.

²⁵ Jésus da mare né nya, tokou dèdè nda maketourou té toï, mam ngeré ang tokou loou ase nange ndja ta taa maketourou ke dèdè da da.