Jean 20 - Testament ke Siki 1960 (Kabba Laka)

¹ Ke ndò té ke dongor ndò shiri, ke sindò dongor baa loou arè, Marie Magdala dé bwa yo té. Nè no tokou err ke ta bwa té to ke kòrou mbä.

² Tokou ban nè naïn, ndé rò Simon Pierre té ke mare ndjè kao go Jésus té ke Jésus ndikè, nè mpa naredè, Dòrou Mbaibé Seigneur bwa yo té mbä, djèdjè ngeré loou ke dilè kendé ang.

³ Tokou ban Pierre ke mare ndjè kao go Jésus té nèn ntéh daka, dèdè dao ke deo bwa yo.

⁴ Dèdè djokem daïn deo kadaba, a mare ndjè kao gè té ndai Pierre, nè ntéh bwa yo té dongor.

⁵ Tokou ban nè noula dè, no mè bwa, nè no koubou lin nou, a nè nande mè té ang.

⁶ Tokou ban Simon Pierre dé gè té, a nao mè bwa yo té, a no koubou lin nange.

⁷ Koubou ke nto né dè to ke koubou lin ang, a ourou to dang.

⁸ Tokou ban mare ndjè kao go Jésus té ke téh bwa yo té dongor, nè nao mè té to, nè no ke nè no mèa té.

⁹ Mbata dèdè nai ngeré tar maketourou lo Allah ang bai, ke pana to tar la ta kï mè bwa yo té.

¹⁰ Tokou ban ndjè kao gè tédjé nèn tél kei lodè.

¹¹ Marie arr ta bwa yo té, ao no. Tokou nè nao nnò tokou ban, nè noula dè no mè bwa yo.

¹² Nè no angedjé djo ke koubou ke ndaa ròdè té, mare kada isi ke dè té a mare kada isi ke gòlè té ndja to, ke loou té ke nin Jésus to kendé.

¹³ Ke dèdè mpa sa na, Dènè, mbata di a i ao no né wa? Nè mpa naredè, Mbata dòrou Mbaibé Seigneur lom mbä, ke mam ngeré loou ke dilè kendé ang.

¹⁴ Tokou nè mpa ban mbä, nè ntourou rè nè no Jésus arr nou, a nè ngeré to Jésus ang.

¹⁵ Jésus pa sa na, Dènè, mbata di a ao no né wa? I ao sange doou di wa? Mèa pana, Doou ke ndjè ngem ndoo, nè mpa sa na, Ebemdjè, tokou i ilè mare loou té, etòdjoum loou ke ilè kendé, a ma ma konè.

¹⁶ Jésus pa sa na, Marie. Nè ntourou rè, mpa sa ke tar Hébreu Rabboni, ke pana, Ndjè tòdjou tar.

¹⁷ Jésus pa sa na, Òroum ang, mbata mam nai ma mao béh lo Bòi Allah ang bai. A ao rò ngakömdjé té, epa aredè, ma mao ke béh lo Bòi ke Bòsésè, ke ma mao ke béh lo Allah lom ke Allah losè.

¹⁸ Marie Magdala ao pa are ndjè kao go Jésus té, ma mo Mbaibé Seigneur mbä, ke nè mpa tar lé ke nè mpa narè.

¹⁹ Tokou ban, tokou kade woei mbä, ndò té ke dongor ndò shiri, ndjè kao gè tédjé outou tadeo kei mbata bel lo Juifdjé dadè. Jésus dé arr horodè té, mpa naredè, Mè woul éh kesè.

²⁰ Tokou nè mpa tar nèn mbä, nè ntòdjoudè dja ke karè. Tokou ban ndjè kao gè tédjé éh ke rònèl tokou dèdè do Mbaibé Seigneur.

²¹ Tokou ban Jésus pa aredè bai, Mè woul éh kesè. Deo kadaba tokou Bòi Allah oulam mbä, tokou ban ma moulasè.

²² Tokou nè mpa tar mbä, nè nto kem dodè, nè mpa naredè, Etaaidjé Ndil ke madji toï.

²³ Doou ke sésè ïyaidjé né ke madjang la, né ke madjang la goto. Doou ke sésè ngemidjé madjang dè té, madjang la to dè té.

²⁴ Thomas, ke mmarè na Ndounga, kada kedè ke to dökou gérè djo, tokou Jésus dé nè néh kedè ang.

²⁵ Tokou ban mare ndjè kao gè tédjé pa arè na, Djèdjè djo Mbaibé Seigneur mbä. A nè mpa naredè, Tokou ma mo doo ngaonarè ke dja té ke ma moula ngaodjim kem doo ngaonarè té ang, ke ma moula djim karè té ang, ma ma ko mem té ang.

²⁶ Gè té ndò djidjo, ndjè kao gè tédjé éh mè kei té bai, ke Thomas éh kedè. Tokou tadeo kei to ke koutou, Jésus dé arr horodè té, pana, Mè woul éh kesè.

²⁷ Goukoudang nè mpa nare Thomas, Oula ngaodji wo djim ke oula dji karem té, emaitar ang, wo mei té.

²⁸ Thomas tél pa arè, Mbaibé Seigneur lom ke Allah lom.

²⁹ Jésus pa sa na, Mbata i wom, i wo mei té wa? Madji éh ke dooudjé ke wom ang, a dèdè do mèdè té.

³⁰ Tokou ban Jésus da mare né mori nya nò ndjè kao gè tédjé, ke nda maketourou té nèn ang.

³¹ Tar nèn nda maketourou té, baa sésè asidjé ko mèsè té Jésus to da rò Christ, Ngon lo Allah, mbata sésè woidjé mèsè té, sésè asidjé kinga tébe ke ria.