Jean 2 - Testament ke Siki 1960 (Kabba Laka)

¹ Goukoudang ndò mouta, ndò taa dènè to Cana té ke Galilée, ko Jésusdjè éh nou.

² Dèdè mmar Jésus ndè tén, ke ndjè kao gè tédjé tò.

³ Goukoudang vin goto, ko Jésusdjè pa arè, Vin goto.

⁴ Jésus pa arè, Dènè, di a to horodjè té, i ke ma wa? Ndò lom nai asang bai.

⁵ Këndjè pa are nganlokisidjé, Edaidjé né toï ke nè mpa naresè.

⁶ Djo err misä to nou ta toko rò tokou Juifdjé da, djo kada ase kou dòdoum mouta aséh mi.

⁷ Jésus pa aredè, Etoidjé man djo té nèn toï dousou. Dèdè nto man dare dousou djo.

⁸ Nè mpa naredè. Bashénè etoidjé abidjé né are padja. Dèdè nda tokou ban.

⁹ Tokou padja naa man nèn ke tél vin mba, nè ngeré tar vin nèn ang, a nganlokisidjé ke to man, dèdè ngeré, padja bar ndjè dènè ke siki.

¹⁰ Nè mpa narè, Dooudjé kada kada toï are vin ke madji dongor, tokou dooudjé aih nya mbä, bana dare mare vin ke madji gatang, i ngem vin ke madji wota randang bashénè.

¹¹ Né mori ke dongor nèn Jésus da Cana té ke Galilée, tokou ban nè ntòdjou ndokoo la, ke ndjè kao gè tédjé wo mèdè té sa.

¹² Go né té nèn nè nao Capernaüm té, nè ke këndjè ke ngaköèdjé, ke ndjè kao gè tédjé, dèdè disi nou ndò baya ang.

¹³ Ndò Pâque lo Juifdjé dé ngosiba, Jésus ao ke Jérusalem té.

¹⁴ Nè ninga mè tokou kei Allah té dooudjé ke labe mangedjé ke batidjé ke derdjé, ke dooudjé ke mbel narè disi kendé.

¹⁵ Gè té nè nda djoula mba, nè ntoubadè toï ke daka tokou kei Allah té, ke batidjé ke mangedjé to. Nè nsärè narè lo dooudjé ke mbel narè, nè ntila table lodè.

¹⁶ Nè mpa nare dèdè ke dao nlabe derdjé, Ounidjé nédjé nèn toï ongidjé daka, edaidjé kei lo Bòi tokou kei né ndoko ang.

¹⁷ Ndjè kao gè tédjé ounda mèdè do tar té ke maketourou lo Allah pa, Boo kei loi a dam.

¹⁸ Tokou ban Juifdjé tél pa arè, I aredjè né mori di wa, mbata i da né nèn?

¹⁹ Jésus tél pa aredè, Etïidjé kei nèn, ndò mouta ma ma kwaa ke tarr bai.

²⁰ Tokou ban Juifdjé pana, Dèdè nda tokou kei Allah nèn bal doso gérè misä, i a kwaa ke tarr ndò mouta ba wa?

²¹ A nè mpa tar kei ke to da rè ndja.

²² Tokou ban, goukoudang nè nï mè bwa yo té mbä, ndjè kao gè tédjé ounda mèdè do tar té ke nè mpa naredè dongor. Dèdè do tar maketourou lo Allah mèdè té, ke tar ke Jésus pa aredè dongor.

²³ Tokou Jésus éh Jérusalem té ndò ke bo ke ndò Pâque, dooudjé ke baya baya wo mèdè té ke ria, gè té ke dèdè do né mori ke nè nda.

²⁴ Mè Jésus oso pon dodè té ang, mbata nè ngeré dooudjé toï.

²⁵ Nase kare doou kada a pa tar nadji lo doou arè ang, mbata nè ndja ngeré né toï ke to mè doou té.