Jean 18 - Testament ke Siki 1960 (Kabba Laka)

¹ Tokou Jésus pa tar nèn mbä, nè ke ndjè kao gè tédjé dourou man Cédron. Ndòò éh nou, nè nao mè té ke ndjè kao gè tédjé.

² Judas, doou ke ndjè ndokè, nè ngeré loouè to, mbata Jésus ao nou ke ndjè kao gè tédjé gar baya.

³ Tokou ban Judas, gè té ke nè ntaa ndjè pouroudjé ke padjadjé dji tòkou ndjè kòrdjé ke Pharisiendjé té, nè ndé kedè ke lampe, ke ngèl, ke né doo.

⁴ Tokou ban, mbata Jésus geré né toï ke ao dé dè té, nè ntéh ke daka mè ndòò té, nè mpa naredè, Doou di a sésè ao esangèdjé wa?

⁵ Dèdè ntél tar darè, Jésus ke Nazareth. Jésus pa aredè, Ma méh nèn. Judas, doou ke ndjè ndokè, arr kedè tò.

⁶ Tokou ban, tokou nè mpa naredè, ma méh nèn, dèdè ntél ke godè, doso nange.

⁷ Tokou ban nè ntél ndoudjoudè, Doou di a sésè ao esangèdjé wa? Dèdè mpana, Jésus ke Nazareth.

⁸ Jésus tél tar, Ma mpa maresè ma méh nèn. Tokou ban, tokou sésè esangemdjé, ïyaidjédè dèdè nèn, aredè dao.

⁹ Baa ta kare tar ke nè mpa ase ta dé to tar ke tokoro, Dèdè ke i aremdè, mem woei dodè té kada ang.

¹⁰ Tokou ban Simon Pierre, ke éh ke tòkou kiaa, nè nòrou ntouka né bere lo mbai lo ndjè kòrdjé, ngange mbia ke koi. Ri bere lé na Malchus.

¹¹ Tokou ban Jésus pa are Pierre, Etél ke kiaa loi oula bòlè té. Ma ma kaih mè ngonarè té ke Bòi Allah arem ta kaih ang wa?

¹² Tokou ban ndjè pouroudjé ke ndjè ngem ndjè pouroudjé, ke padjadjé lo Juifdjé, dèdè dwaa Jésus dèdè ntòè.

¹³ Ke dèdè dao sa darè Anne dongor, mbata nè nto bo dènè lo Caïphe, nè ke nto mbai lo ndjè kòrdjé balè tén.

¹⁴ Caïphe to doou ke ndjè ndedji Juifdjé leo, to madji tokou doou kada a kwoei mbata dooudjé.

¹⁵ Simon Pierre ke mare ndjè kao go Jésus té kada ndja go Jésus té. Mbata mbai lo ndjè kòrdjé geré ndjè kao go Jésus té ke kada nèn, nè nande ke Jésus kei té lo mbai lo ndjè kòrdjé.

¹⁶ Pierre arr ta kei té daka. Tokou ban ndjè kao go Jésus té nèn ke mbai lo ndjè kòrdjé geré, nao daka nao mpa tar ke ngonlokisi ke dènè ke ao ngem ta kei, baa ta kare Pierre dé mè té.

¹⁷ Tokou ban ngonlokisi ke dènè ke ao ngem ta kei, nè mpa nare Pierre, I to ndjè kao go doou té nèn tò wa? Nè mpana, Ma ang.

¹⁸ Beredjé ke padjadjé darr mbòr pourou mï té, ke nyél, mbata koul ödè. Dèdè dao ndibi pourou nèn, Pierre arr kedè ao ndibi pourou tò.

¹⁹ Tokou ban mbai lo ndjè kòrdjé doudjou Jésus tar lo ndjè kao gè tédjé, ke tar ke nè ntòdjou.

²⁰ Jésus tél pa arè, Ma mpa tar no dooudjé té toï ke nange nèn, mam ntòdjou tar ke ndò toï kei Allah té, ke tokou kei Allah té, loou ke Juifdjé mbona kendé. Ma mpa tar loou kiyèè té kada ang.

²¹ Mbata di a i doudjoum wa? Edoudjoudè, dèdè ke do tar ke ma mpa maredè. Wo, dèdè ngeré né ke ma mpa mbä.

²² Tokou nè mpa ban mbä, padja lodè kada ke arr ngosiba ounda Jésus ke dja, pana, I tél tar ke mbai lo ndjè kòrdjé ban wa?

²³ Jésus tél pa arè, Tokou ma mpa tar ke madjang, etòdjoum né ke to madjang. Bo tokou ma mpa madji, mbata di a oundam wa?

²⁴ Tokou ban Anne oulè are Caïphe, mbai lo ndjè kòrdjé.

²⁵ Simon Pierre arr nou ao ndibi pourou. Tokou ban dèdè mpa sa na, I to ndjè kao gè té tò wa? Nè mmai, mpana, Ma ang.

²⁶ Bere lo mbai lo ndjè kòrdjé kada, ke to ngokö bere ke Pierre gange mbia, nè mpana, Ma moi sa mè ndoo té ang wa?

²⁷ Tokou ban Pierre tél mai, loshénè loshénè könra nò.

²⁸ Tokou ban dèdè dïya Caïphe, dao ke Jésus kei gange saria té. Loou arè mbä. Dèdè ndja dao mè kei gange saria té ang, mbata dèdè ndiki ta dé madjang ang, baa ta kare dèdè dase kon mourou Pâque.

²⁹ Tokou ban Pilate ao kedè daka, pana, Sésè Ounidjé do doou nèn tar di té wa?

³⁰ Dèdè ntél mpa darè, Tokou doou nèn to doou ke ndjè né da ke madjang ang, djèdjè dja kwèè kari ang.

³¹ Tokou ban Pilate pa aredè, Sésè ndja wèèdjé ta gange saria la deo tar ndedji té losè. Juifdjé pa sa na, Tar ndedji pana ase kare djèdjè ntòl doou kada ang.

³² Baa ta kare tar lo Jésus, ke nè mpa leo ta tòdjou deo kwoei la, ase ta dé to tar ke tokoro.

³³ Tokou ban Pilate tél ao kei gange saria té, nè mmar Jésus, nè mpa sa na, I to Mbaibé lo Juifdjé wa?

³⁴ Jésus tél pana, I pa tar ke mei ndja, aséh mare doou pa tar ari ke rim wa?

³⁵ Pilate tél pana, Mam nto Juif wa? Ngaköidjé ke tokou ndjè kòrdjé waai arem. Di a eda wa?

³⁶ Jésus tél pana, Béh kö lom éh nange nèn ang. Tokou béh ko lom éh nange nèn, dooudjé lom a da dòò, baa ma ma koso dji Juifjdé té ang, a loshénè béh ko lom to tokou ban ang.

³⁷ Tokou ban Pilate pa sa na, I to mbaibé wa? Jésus tél pana, I pana, mam nto mbaibé. Doudjoum mbata yèn, ke mbata yèn mam ndé nange nèn, ta pa tar nadji ke tar ke tokoro. Dooudjé toï ke to ngä tar ke tokoro wo tar lom.

³⁸ Pilate pa sa na, Tar ke tokoro to di wa? Tokou nè mpa ban mbä, nè ntél ntéh nao rò Juifdjé té, nè mpa naredè, Ma mo saria dè té ang.

³⁹ Mare tar béh losè to, a ma mïya doou kwaa kada maresè ndò Pâque té ke bo. Tokou ban sésè ndikidjé ta karem mïya Mbaibé lo Juifdjé maresè wa?

⁴⁰ Tokou ban dèdè mpa ke tarr bai, mpana, Doou nèn ang, a Barabbas. Barabbas to ndjè boukou ke bel ang.